「你地番嚟啦~」詠妍跑到我面前,一下子挽住我嘅手臂,然後望向岑諾新,「借我一下。」

岑諾新點一點頭然後行去買嘢飲,詠妍捉住我將我拉到一邊,臉帶微笑望住我

「佢答應咗。」我緩緩開口講道

「哦~咁咪好囉~」詠妍點點頭,佢行到我嘅身後,搭住我嘅雙肩將我個人擰過去岑諾新所在嘅方向,「好好咁留意下佢嘅優點啦~」

優點呀⋯?我都唔知佢有咩優點,應該話只係知少少,因為我好少真係專心咁留意佢



「佢過嚟啦~」詠妍喺我耳邊講道,「留意下佢就會中意。」

「番上去。」岑諾新對我講道然係就直接行

我同詠妍對望咗一眼,詠妍對我比咗個「Like」

雖然宜家我話會試下中意岑諾新,咁樣就可以放低張景彥,但我心入面總覺得,我好似利用緊岑諾新一樣

其實都唔係好似,我真係利用緊佢⋯



我唔知我可唔可以真係中意岑諾新,亦唔知我係唔係真係可以放低張景彥,有好多事我都唔清楚

岑諾新答應咗我嘅建議,實際上係詠妍嘅建議,邊個建議都唔重要⋯重要嘅係佢答應咗

我以為佢會因為出於對孫慧伶嘅感情而拒絕我,但佢好似好輕易咁就接受咗

「岑諾新佢諗緊啲咩⋯」我朝岑諾新嘅座位望去,佢一臉專心咁聽書呢,「點解可以咁輕易就答應我⋯」

唉~睇唔透呢~



「叮噹叮噹⋯叮噹叮噹~」

隨住放學嘅鐘聲響起,今日最後嘅課堂亦隨即完結

我執好書包,開完locker後番埋位孭起書包,行到去岑諾新嘅座位

「一齊番去?」我主動地問道

我咁樣算唔算踏出一步啦?應該算⋯?

「當然。」岑諾新將書包拉鍊拉上,孭起書包

佢對我微微一笑,我地一齊踏出校門,就好似平時一樣

上車、落車、送我番屋企,每一個流程都同平時一樣冇太大出入,每一日都一樣



「我到啦~」我先鬆開岑諾新嘅手

「嗯。」岑諾新點點頭,「聽日見。」

「嗯⋯」我微微點頭

岑諾新轉身走,佢邁出第一步時,我伸手捉住咗佢衫角

岑諾新回頭望向我,同平時對住我嘅時候一樣,目無表情

「好好留意下佢嘅優點。」

我嘅腦海中浮現出今日晏就喺小食部嗰陣詠妍同我講嘅嘢



「攬一下再走⋯」我微微一笑講道

岑諾新張開雙手,我向佢走近一步,雙手環抱着佢嘅腰,我感覺到佢輕輕地回擁着我

「好香⋯!咩味⋯?」一陣淡淡嘅香味撲鼻而來,我微微耷低頭,鼻尖湊近佢嘅冷衫,「原來係佢件冷衫⋯!」

佢件冷衫有陣柔順劑嘅味道,香香的

「你件冷衫好香。」我鬆開手抬頭望住岑諾新講道

「洗過嚟。」岑諾新捉起自己嘅冷衫聞一聞

「好啦~」我笑一笑,睇嚟佢係愛乾淨嘅孩子,「聽日見啦~」

岑諾新今次轉身走嘅同時,我都轉身朝大堂門口行去



「呼~」我灘坐喺梳化上,番咗一日學好攰

我拎起手機,手機嘅螢幕亮起,我心中嘅疑問都亮起

「我突然間要點中意佢⋯?」我心裏感到疑惑,「真係留意佢嘅優點就可以中意佢咩⋯?咁簡單⋯?」

岑諾新嘅優點呀⋯?唔⋯呃⋯我都唔知⋯一時三刻邊度講到出嚟?

「順其自然啦⋯」我最後放棄思考,選擇用一個更簡單嘅方法

唔諗啦!換衫!





傍晚時分

我正好努力咁做緊英文嘅news cutting,顧名思義即係做剪報,睇篇老師揀嘅指定篇章,然後答問題

再簡單啲咁講,係一個厭惡性工作,要剪張報紙出嚟貼落簿,會搞到隻手黑黑,好似去挖完泥咁⋯

「搞掂。」我寫埋最後兩個字喺簿上,然後將原子筆放番入筆袋

我將功課都放番入去功課file入面,頹廢地坐喺電腦椅上睇手機

「咚咚~」

手機彈出一個WhatsApp通知,我望咗一眼㩒咗一下個通知




IG Link: https://www.instagram.com/nd_cotttoncandy/?hl=zh-tw