［愛情純愛］既然忘記唔到佢，不如試下中意我⋯？: 38. 請好好地留意我

岑諾新：做緊咩？

「啱啱做完功課，做咩？」

岑諾新：冇咩，有啲悶

「即係搵我攝時間咁話⋯好過份！」

岑諾新：都唔係攝時間嘅，對大家都有好處



岑諾新指嘅「好處」係⋯有助感情增長之類⋯？佢原來係真心答應，本來我仲有啲懷疑佢係唔係真係決定好

「係咩～係掛～」

岑諾新：做咩要自問自答

「冇呀～」

「聽日一唔一齊番學？」



我望住岑諾新「輸入中⋯」，然後又變回「在線上」，之後再變成「輸入中⋯」，佢打緊啲咩？

岑諾新：好，巴士站等你

我將手機螢幕鎖上，大字型咁灘喺床上，不知不覺就瞓著咗，睜開眼嘅時候，已經係第二日朝早

我企喺廁所嘅鏡前梳起馬尾，整番好我嘅校呔，反好衣領，用梳再梳一下馬尾將頭髮梳順

「搞掂～」我對住鏡微微一笑，然後轉身行出廁所朝客廳行去



我孭起書包，企喺門口著上皮鞋，然後打開大門出門口，今日我同岑諾新約好咗喺巴士站度等

「有啲緊張添⋯」我伸手放喺自己嘅胸口前，感覺到今日嘅心跳比平日有啲快

今日係我同岑諾新「嘗試中意對方」嘅第一日，所以有啲緊張

我行到巴士站附近，遠遠地已經見到岑諾新企咗喺度耷低頭睇手機

「早晨！」我小跑到佢嘅面前同佢打招呼

「早晨。」岑諾新臉上掛上淡淡嘅笑容，「行啦。」

岑諾新行到去隊伍嘅最後企，我企喺佢嘅身旁，佢一直都耷低頭睇手機呢～

望住岑諾新嘅側面，我第一次喺呢個距離之下，認真咁望佢⋯



「佢嘅下巴嘅線條好好睇⋯」我喺心中不禁帶着少許驚訝地講道，「側面好好睇⋯」

佢嘅臉型同輪廓都好好睇，渾身散發住嘅冷酷氣場同佢嘅外表好夾

難怪當初孫慧伶會中意佢啦，生得咁好睇真好呢～

「嗯？」岑諾新就好似察覺到我望住佢一樣，佢望向我，「做咩？」

「冇咩～」我自然地微笑道，巴士亦喺呢個時候到站，「有車啦～」

我同佢好似平時一樣企番喺同一個位置，我同佢上到車後，因為後要仲有人上車，所以未閂門

我回頭望過去，望向上車嘅人，同平時一樣好多學生呢～



「咦？」我發現咗一個身影，我隨即握一下岑諾新嘅手，「係孫慧伶。」

岑諾新望向上車嘅孫慧伶，然後又收回視線望向我

「你提住佢嘅話，我中意唔到你。」岑諾新望住我，輕輕一笑地道

「我先啱啱講一次。」我不禁一笑，「而且我又冇要你即刻中意我～」

「下下諗住之前嗰個又點中意？」岑諾新微微聳肩

「我點知啫⋯！」我輕輕抿唇，「又冇叫你即刻⋯叫你試下咋嘛～」

「就試下嘛。」岑諾新望向窗外，垂着嘅手嘅指尖掂到我嘅手，輕輕地牽起我嘅手

佢嘅舉動好自然，望向窗外係特登嘅？因為唔想尷尬？



我微微耷低頭望住我地嘅牽着嘅手，佢嘅手，好暖，真係⋯佢冇真係用力咁拖實我，只係輕輕地扣着我嘅手，我好輕易就可以掙脫出嚟

我微微抬起頭望向佢，佢嘅視線停留喺車窗外；我望一望向樓梯嗰邊

「唔想望到孫慧伶⋯？」我喺心中默默地猜想道，「所以先望向外面？」

我都唔知道佢點諗，不過事實上孫慧伶就企喺離我地唔遠嘅地方，巴士嘅下層，由輪椅位到樓梯又隔幾遠？其實好近，只有兩、三個人嘅距離

我往岑諾新嘅方向行咗一步，佢瞄咗我一眼，本來微微斜着企嘅佢挺直腰板企好起嚟

岑諾新比我高成大半個頭，佢微微耷低頭望一望我，然後又移開了視線

佢好似，連眼尾嘅餘光都唔想望到孫慧伶一樣，一直避開



唔知道係唔係我多心諗太多，不過我嘅直覺係咁樣覺得

「喂⋯」我輕輕拉咗佢隻手一下，岑諾新望一望我後微微耷低頭，我踮起腳尖湊近佢嘅耳邊，「決定好要試下中意我未？」

「嗯。」岑諾新頓一頓後回答道

「咁你留意我一個人就足夠。」我喺佢耳邊講道

我同佢對上視線，岑諾新露出淡淡嘅微笑

「係，係。」岑諾新回答我，佢望住我，視線冇再落喺窗外嘅街道上，「落車啦。」

岑諾新拉一拉我隻手，等巴士開咗門之後拉住我落車

我跟喺佢身後落車，輕輕地回握佢嘅手，佢回頭望向我，臉上掛上淡淡嘅笑容；我下意識回頭一望，見到孫慧伶邊睇手機邊行




IG Link: https://www.instagram.com/nd_cotttoncandy/?hl=zh-tw