［愛情純愛］既然忘記唔到佢，不如試下中意我⋯？: 40. 你會不會也⋯

「其實我真係唔係想逼你中意岑諾新，我點會唔知你有幾中意張景彥呀⋯」詠妍望住我，從佢嘅聲線中我可以聽得出佢嘅對我擔心，「但係我個人覺得，佢真係唔值得你等⋯佢唔係真心中意你已經係一個問題，佢最後到底係因為啲咩而同你分手，你真係唔知咩⋯？」

嗰陣我同張景彥分手之後，我成日都捉住詠妍訴苦，一講就喊一講就喊⋯

詠妍從來都冇覺得我煩之類，同佢講嘅時候佢都係安靜地聆聽

「中唔中意岑諾新係你嘅決定，我支持你就係。」詠妍微微聳肩

我朝岑諾新嘅方向望去，我嘅心依舊平靜



岑諾新偶然抬頭望向我，見到我望住佢，佢笑咗一笑

「佢會唔會同我諗緊一樣嘅嘢？」我喺心中自言自語地問道

佢會唔會同我一樣，諗緊係唔係真係可以中意我？

佢會唔會同我一樣，諗緊點樣放低嗰個人？

佢會唔會同我一樣，諗緊我係唔係同佢諗緊一樣嘅嘢？



「突然間覺得，要中意一個人好難⋯」我苦笑着講道

⋯

「蔣倩盈，陣間放學之後，你可唔可以留一留低？」Miss問我，我拎住疊簿同Miss一齊行落去1樓，「想搵你幫手做啲嘢。」

「可以呀。」雖然心入面唔太想，不過算啦，反正都冇咩嘢做

我將英文嘅功課放喺簿櫃中，然後不急不忙地行樓梯上番課室



「喂。」有人喺我後面拍咗我一下

我回頭一望，係岑諾新

「見到你就啱。」我正好要話比佢知我放咗學之後要留低，「啱啱Miss叫我放學留低做嘢，你可以番去，自己。」

「哦。」岑諾新迅速地、毫不在意地哦咗一聲

佢嘅回答簡單直接，快到我以為佢識讀心術之類，估到我想講啲咩

「嘖⋯」我擺出一臉厭惡嘅表情，「你可唔可以唔好對我咁冷淡呢？」

「好冷淡咩？」佢完全冇呢個自覺，仲好意思問我番

「你唔覺㗎咩⋯」我無奈地講道



「我本來就係咁同你講嘢⋯」岑諾新微微聳肩，「所以冇特別冷淡呀。」

「哦！」我稍微大聲咗少少咁哦咗一聲

最後一堂完咗之後，我落到去教員室嘅門口等Miss，Miss到底有咩嘢要我幫佢手？

「你咁快就落堂嘅？」Miss推開教員室嘅門行出嚟，行到我面前，手上拎咗一疊紙，「比你嘅任務好簡單，幫我釘一釘筆記，聽日你地上堂用嘅，三張一份，釘完放喺你地自己簿櫃就得。」

「哦好呀。」我接過Miss手上嘅嘢，拎埋釘書機，行兩層上番課室

我番到課室坐番喺自己位，課室入面仲有人，不過我只係想快啲釘晒啲嘢快啲番屋企

「今日仲要溫默書⋯後日仲有測驗，我都未溫過⋯」我喺心裏喃喃自語起嚟，「要快啲做晒啲嘢番屋企⋯」



我數着筆記紙，每三張就拎起放喺一邊，一份打直一份打橫咁擺，陣間一次過就可以釘晒咁多份，感覺可以慳番唔少時間

「該死嘅岑諾新⋯！平時你補課我都等埋你，今日我要留低做嘢你就真係唔等我番屋企⋯！」我望一望岑諾新嘅座位，佢個位早就空空如也，咩都冇，佢肯定一放學就走咗啦

算啦，平時都係我自願等埋佢嘅，怪得邊個呀⋯唉～

「咔—咔—咔—」

課室裏只係得番我㩒釘書機嘅聲音，我翹着腿，將數好嘅筆記一份又一份咁拎起嚟釘

當你靜心聆聽嘅時候，會聽到釘書機將紙打穿嘅聲音，莫名其妙地覺得好好聽

「踏、踏。」我聽到有人行咗入嚟課室，我下意識地抬頭望向門口

「咦⋯？」我不禁有啲愕然，「你仲喺度嘅？」



企喺門口嘅人係岑諾新，佢唔係⋯番咗屋企啦咩⋯？

「等埋你先番去。」岑諾新行入嚟課室，佢嘅背上孭住書包，難怪佢個位咩都冇，「我地平時都係一齊走。」

岑諾新行到我嘅座位前，我微微一笑後耷低頭繼續釘嘢

「呀⋯！」我感覺到有嘢打落我個頭度，我一下子抬頭

岑諾新手上拎住枝嘢飲，打落我個頭度⋯

「比你。」岑諾新將枝嘢飲放低喺我枱上，然後拉開我前面嘅座位嘅櫈坐低，「我唔知你中意飲啲咩。」

「哦。」我微微點頭，「唔緊要，呢個我都飲。」



岑諾新望住我釘嘢，總覺得有啲唔自在呢～

我悄悄地抬眼望向佢，佢正望住我，我下意識就移開視線，目光唔再停留喺佢身上




IG Link: https://www.instagram.com/nd_cotttoncandy/?hl=zh-tw