［愛情純愛］既然忘記唔到佢，不如試下中意我⋯？: 41. 新歡是你嘛

走廊好似有人經過，我抬頭望出去，呀⋯係張景彥⋯

我嘅雙眸中嘅光好似又黯然失色，望住張景彥，心裏總會變得淡淡的，曾經嘅中意？宜家嘅中意？到底係因為咩原因？

如果宜家阿彥佢番轉頭嚟搵番我嘅話⋯

「咦⋯？」岑諾新嘅手伸出嚟擋喺我嘅眼前，剛好將張景彥嘅身影遮住

我望向岑諾新，佢托住下巴，微微側着頭望我，依舊目無表情依舊冷淡



「你對我會唔會有啲唔公平？」岑諾新緩緩地開口講道

「嗯⋯？」我嘅眉頭輕輕一皺

唔公平⋯？佢嘅意思係⋯

「你繼續留意佢，對我唔公平。」岑諾新淡淡然地對我講道，「你留意我一個人就足夠。」

咦？呢句⋯咪我今朝早同佢講過嘅嘢嚟⋯？



「咁你留意我一個人就足夠。」

我今日喺佢回頭望向孫慧伶嘅時候係咁樣同佢講⋯佢真係原話複製貼上一樣，同我講同一番說話

「只係下意識⋯」我望住佢，莫名其妙地有啲心虛，「下意識望過去⋯」

我抬眼望岑諾新，佢嘅手緩緩放低

「好好咁留意我，如果唔係你一直都唔會放得低。」岑諾新擺出一副認真嘅表情對我講道，「既然，揀咗我做新歡。」



突然間做咩咁樣霸道發言⋯？

「嗯⋯」我微微耷低頭，拎起釘書機繼續釘嘢

我㩒咗釘書機兩下，好輕易咁就㩒咗落去，我打開釘書機，原來冇釘

我即刻起身行出去老師枱，打開櫃桶拎釘放入釘書機中

「你企喺度做咩？」岑諾新忽然喺我身後講道

「吓、吓？」我比佢嚇咗一跳，「入釘嘛～」

「你入釘入咁耐？」岑諾新企喺我隔離，將枝嘢飲輕輕打落我嘅臉頰

「喂⋯！枝嘢飲濕㗎！」我一下子望向岑諾新，「⋯！」



好、好近⋯！

我下意識向後行咗一步，撞上咗老師枱

「你做咩⋯？」岑諾新問我，「咁大張枱都睇唔到？」

岑諾新朝我行近咗一步，我下意識提起手，輕輕地推住佢

「你突然間做咩行咁埋⋯」我嘅指尖剛好掂住佢

「你咁尷尬做咩？」岑諾新冇再行近，但佢微微彎下腰望我

「冇、冇做咩⋯！」我頓時搖搖頭，向左邊行咗兩步退開，然後番埋位坐低繼續釘嘢



岑諾新番到嚟我面前坐低，拎起一份筆記睇

我一直耷低頭工作，岑諾新坐喺我對面睇筆記，我偷偷瞄咗岑諾新一眼，佢托住腮睇筆記內容

「咔—咔—咔—」

「Okay～」我釘埋最後一份筆記，細細聲地講道，「搞掂。」

我拎起釘好晒嘅筆記疊好，伸手從岑諾新手中抽走筆記，筆記一抽走，我發現岑諾新定睛望住我

「做咩？」我輕輕抿唇後問道，然後拎起疊筆記，用橡筋綁番，「我搞掂㗎啦，陪我落去1樓放番個釘書機啦～」

我行到去簿櫃前蹲低，執一執啲簿嘅位置，騰出一個空位放疊筆記

「搞掂～」我企起身，打算番埋位拎書包



一轉身過去，見到岑諾新已經坐咗喺距離簿櫃最近嘅枱上，手上拎住我嘅書包

「唔該。」我接過書包孭到背上，順手地拉一拉條裙，「行啦～」

我同佢一齊踏出學校門口，岑諾新嘅雙手插喺褲袋中，佢今日冇伸手拖我

我地並排而行，佢冇出聲，我亦冇講嘢；我悄悄地抬頭望咗佢一眼，佢真係比我高好多呀，比我高大半個頭

「喺我眼中嘅佢，到底係一個咩存在⋯？」我不禁喺心中問自己，我抬頭望一望佢，佢一直都望住前方，「言出必行嗎⋯？」

總覺得，佢有着我冇嘅特質⋯

「雖然我未係真係中意佢，但，既然我揀咗佢⋯」我喺心中對自己講道



我主動地伸手捉住佢嘅手臂，將佢嘅左手從褲袋中抽咗出嚟

岑諾新望向我，好似想問我做咩一樣，喺佢開口問我之前，我嘅手輕輕地拖住佢嘅手，只係輕輕地扣住，係佢可以隨時將我隻手甩開嘅鬆度

「陣間見到張景彥點算？」岑諾新細細聲咁問我

「冇點算～」我聳肩，「由佢啦～新歡係你嘛～你諗下陣間見到孫慧伶嘅話點算好過啦～」

「新歡係你嘛～」岑諾新學我一樣聳肩，淡然地講道




IG Link: https://www.instagram.com/nd_cotttoncandy/?hl=zh-tw