「今日放學之後你有冇嘢做?」我企喺岑諾新隔離問道

「冇呀。」本來做緊嘢嘅岑諾新抬頭望我,「做咩突然間咁問?」

「要唔要一齊去行下?」我望一望周圍,然後耷低頭細細聲地對佢講道

「行下?行咩?」岑諾新邊問邊將放喺枱上嘅筆記放番入file入面,「你想去行?同我一齊⋯」

本來望住我嘅岑諾新講講下緩緩地撇開臉唔望我,將file塞入桶櫃中



「嗯嗯!」我點點頭

坐喺佢前面嘅嗰個同學行走咗,我坐咗佢個位,同岑諾新打對面咁坐

「我地一齊去呀!」我微笑着對佢講道,「一齊去旺角行下好唔好呀?」

「旺角?」岑諾新有啲愕然,「好似有少少遠⋯」

「你唔想去呀?」我見到佢好似唔太感興趣便問道,我嘅聲線都平淡咗落嚟



仲以為可以作為第一次約會一樣同佢出去⋯原來佢唔想⋯

唔通佢睇穿咗我⋯?

「今日太趕,星期六啦。」岑諾新企起身同時對我講道,「如果係以約會作前提嘅話。」

我猛然抬起頭望向岑諾新,岑諾新拎住放喺枱上嘅另一個file,輕輕地用file拍落我個頭度,然後直接向locker行去

「原來唔係唔想⋯」我嘅心鬆咗一口氣,原來只係我諗多咗





「唔⋯著咩衫好呀?」

我望住比我灘開晒放喺床上嘅衫,我已經諗咗大半個鐘,我今日仲特登早咗起身,就係為咗揀衫

雖然平時喺學校都見慣,之前亦有一齊出過街,但今次可以話係我地第一次真正嘅約會呀!

所以唔可以著得太醜,唔洗著得好靚好靚,比平時好睇就得啦~

經過我一番思量後,我最後決定上身著一件米色嘅鬆身毛衣,下身著深啡色配淺啡色嘅格仔裙,腳上著住一雙白色波鞋

出門口!我望一望時間,我特登早咗出門口,應該比約定時間早咗10分鐘左右

「有啲緊張⋯」我喺心中講道



我同岑諾新約好咗直接喺地鐵站等,所以我宜家直接去地鐵站就得

我今日嘅步速偏快,唔知係唔係因為緊張嘅關係

當我落到地鐵站嘅時候,岑諾新已經到咗,我連忙小跑到佢面前

「你咁早到嘅?」我拎起手機,螢幕一亮,我的確係早咗10分鐘到,「我已經早咗出門口!」

「冇理由要你等我,而且我都係到咗一陣。」岑諾新嘅臉上掛上淡淡嘅笑容

今日佢著住一件白色Hoodies加一件牛仔外套,黑色牛仔褲加上白波鞋,背上孭住個斜孭袋

岑諾新朝我伸手,我望一望佢,然後將手搭到佢嘅手上



今日係,第一次約會,決定試下中意佢之後嘅第一次約會⋯!

「你想去邊度行?」岑諾新喺上咗車之後問我

「冇諗呀~隨便行下啦~」我笑一笑講道,「你有冇邊度想行?有嘅話可以行~」

「冇所謂,睇你。」岑諾新微微聳肩

「好啦~」我笑一笑同時諗緊有邊度可以同佢一齊行

第一次去街去邊度好呢?唔⋯但我唔知佢中意啲咩地方喎⋯我真係一啲都唔了解佢,完全唔知道佢中意啲咩

不過我諗今日都係一個好機會比我好好咁觀察一下佢,了解佢嘅喜好

「你有冇想食啲咩?餓唔餓?」岑諾新問道



「冇所謂呀~我唔係真係咁餓,你肚餓啦?」我微微側一側頭

「唔係,我食咗少少嘢先出嚟。」岑諾新講道,「只係如果你肚餓嘅話,可以同你去食嘢。」

「行一陣先食嘢都可以呀~」我笑一笑講道,「比起食嘢,我想買嘢飲多啲。」

「陣間去到買咗嘢飲先。」岑諾新對我微微一笑

岑諾新剛話落,一大群人湧上車,我下意識地朝岑諾新嘅方向行近咗一步

「你企呢邊。」岑諾新捉住我,同我交換咗位置,我宜家背貼住玻璃企

岑諾新望一望人群,提起左手捉住座位旁嘅扶手;佢嘅手先啱啱捉實扶手,一個大叔因為前面嘅人群推撞而撞上岑諾新嘅手



我下意識縮咗一下,個大叔回頭望一望岑諾新,然後向前挪移咗兩小步

如果啱啱岑諾新冇捉住我右手邊嘅扶手,嗰個大叔向後退嘅時候就會直接撞到我

佢係因為知道多人所以先捉呢邊扶手⋯?

「好似有啲細心⋯」我喺心裏默默地講道同時,悄悄地抬眼望佢

我地到咗之後第一時間係去咗旺中嗰邊行,嗰邊有啲格仔鋪,賣嘅嘢都多款式,好啱我呢啲冇特別想行但又要行街嘅人




IG Link: https://www.instagram.com/nd_cotttoncandy/?hl=zh-tw