［愛情純愛］既然忘記唔到佢，不如試下中意我⋯？: 44. 正式約會（中）

不過喺去格仔鋪前，我都係想去買嘢飲先

岑諾新企喺一旁等我，我買咗一杯芝士奶蓋烏龍茶，拎到之後當然係即刻飲一啖啦～

我用飲管輕輕地將奶蓋同烏龍茶攪拌咗一下，再飲一淡，奶蓋嘅膩配上烏龍茶嘅淡香微甜，兩者剛好中和咗

「你試唔試？唔係好甜。」我將茶遞到岑諾新嘅面前

岑諾新一臉遲疑地望住我手上拎住嘅茶，然後望一望我



「嗯？」我疑惑地望住佢，佢應該想試但又猶疑緊

我微微耷低頭嘅時候視線剛好落喺飲管上

尷尬啦！難怪佢一臉想飲但又猶疑緊飲唔飲啦！

「Sor、sorry⋯！」我頓時用手捉住飲管，將飲管上淡淡嘅唇膏印抹去，「你試唔試⋯？」

岑諾新見我將唇膏印抹咗之後先飲咗一啖，尷尬死啦真係⋯！



買完嘢飲，我同佢一齊上咗去上面嘅格仔鋪行

「入呢間睇下～」我拉住岑諾新嘅手行入一間喺博角位置嘅格仔店

岑諾新冇不情不願，只係我個人覺得行街呢啲嘢，男仔通常都唔會有興趣，我指嘅係同女仔一齊行街嗰陣

我行到去其中一格放咗香水嘅格前，拎起唔同嘅香水嚟聞，我有時出街都會噴香水，不過唔係啲好濃味嘅嗰種，我中意味道淡啲，淡香嗰種

「咩嚟？」企喺我隔離嘅岑諾新好奇地問我



「香水呀～」我將香水放到佢嘅鼻前，「聞下，呢個係茉莉花香，陣味好淡好舒服。」

岑諾新聞咗一聞之後微微點頭

「你今日係唔係有噴香水？」岑諾新喺我拎另一枝香水出嚟嘅時候問道

「係呀，你又知嘅？」我有啲意外佢會知道，我今日噴嘅呢隻香水係類似BB爽身粉嘅味嚟，應該好淡先係

「啱啱喺地鐵嗰陣已經聞到。」岑諾新望住放香水隔離嗰一格

「陣味應該好淡先係⋯」我細細聲地講道，偷偷地望咗岑諾新一眼

「同你好夾，香水。」岑諾新經過我身旁行去另一邊嘅時候講道

我回頭望向佢，心裏有啲愕然，對於佢講出嘅說話



我提起手聞一聞自己嘅衫袖，淡淡嘅爽身粉香味黏喺衫袖上，佢話⋯同我好夾嘅香味

我地行咗幾間格仔店，其實都只係周圍行下冇咩指定行邊，經過覺得有趣就入去睇下

「睇緊咩？」岑諾新企喺我身旁

我手上拎住咗隻公仔，係個企鵝造型嘅吊飾嚟，好似個波一樣嘅企鵝公仔

「呢個公仔。」我將公仔遞比岑諾新睇，「好QQ呀呢個～」

「呢個可愛啲。」岑諾新拎起另一隻拎住荷包蛋嘅企鵝公仔

「佢拎住隻蛋嘅～」我笑住講道，眼尾瞄到格中有另一隻拎住一塊鳴門卷，「睇下呢隻！佢拎住鳴門卷！」



「你中意呢個？」岑諾新將我拎喺手上嘅荷包蛋企鵝公仔拎走

「唔⋯我都唔知，因為兩個都好可愛⋯」我猶疑不決地望住我手上嘅公仔，又望一望岑諾新手上嘅，「你覺得呢？」

「比我。」岑諾新朝我伸手，我一臉疑惑地將手上拎住嘅荷包蛋嘅企鵝公仔放到佢嘅手上，「兩個都買。」

「吓？」我訝異地望住佢，佢一接過公仔就直接行咗去比錢，「喂！買呀？」

「買。」岑諾新將錢遞比店員，「我要呢隻。」

岑諾新將拎住鳴門卷嘅企鵝公仔放到我手心，我有啲手足無措，我望一望轉身行出鋪頭嘅佢，又望一望店員小姐，佢望住我微微一笑

我追上岑諾新，佢一臉理直氣壯咁望住我，將公仔塞入袋中，然後又望一望我

「係要一對⋯？」我望住手上嘅公仔，不禁喺心中問道，「我地再去行下～」



岑諾新微微點頭，轉身就行，我頓時跟上佢嘅步伐

我微微耷低頭望向岑諾新嘅手，要唔要主動拖佢？但佢會唔會唔想拖我其實？

我試探般用指尖掂咗佢隻手一下，佢冇望過嚟，但手卻向我伸過嚟，掂到我嘅指尖後伸手拖住我

「如果唔想拖嘅話，唔拖都唔緊要。」我微微探頭望佢

岑諾新一聲不吭，只係默默地用力拉咗我一下，我向前行咗兩步行喺佢身旁

「多人。」岑諾新緩緩地開口講道，然後就冇再講其他嘢

行多咗一陣之後，我感覺開始肚餓啦已經，個肚都開始空盪盪



「你餓唔餓？我有少少餓⋯」我輕輕握緊佢嘅手一下然後問道

「你想食咩？」岑諾新直接問道




IG Link: https://www.instagram.com/nd_cotttoncandy/?hl=zh-tw