岑諾新默默地望咗我一眼,然後幫我將張枱搬番去本來嘅位置

「番去啦。」岑諾新對我講道,然後朝我伸手

我望一望佢隻手,不禁一笑,提手牽住佢隻手

「你真係冇嬲?」我故意想捉弄佢,微微側着頭問道,然後擺出一副惋惜嘅模樣,「早知我再望多兩眼嘛~」

岑諾新本來仲拉住我朝課室門口行去,但係因為我咁樣一講,岑諾新停咗落嚟,回頭望向我



「我話你呀,真係要望嘅話⋯」佢轉身朝我行咗兩步,騰空出嚟嘅手放喺我下巴,輕輕捏住我兩邊臉頰,「喺我真係中意你之前,好盡情望到夠,如果唔係,以後就冇機會。」

講、講咩呀突然間⋯!?

突然講啲咩霸道嘅說話?咩叫「好盡情望到夠」?岑諾新你⋯都太識講嘢啦掛⋯!?

「以後就冇機會」嘅意思係⋯如果佢中意咗我嘅話,就唔比我再望張景彥⋯?

「行啦。」岑諾新拉咗我一下,一下子將我嘅思緒都一併拉番嚟



佢直接拉住我行,我行喺佢嘅身旁,悄悄地瞄咗佢一眼

岑諾新佢就好似冇事發生一樣淡定,只有我先會對佢講嘅嘢有啲在意⋯?定係佢只係扮鎮定?

「我想買個嘢飲再番去~」我拉一下岑諾新嘅手,都冇理佢想唔想就直接拉住佢去小食部

我企喺嘢飲機前,望住嘢飲機中8成都係我中意似嘅紙包飲品,我不禁有啲猶疑不決

「飲咩好⋯?」我先係細細聲地喃喃自語,然後拉一下岑諾新嘅衫袖,「飲咩好?每個都想飲⋯」



「揀最中意飲嗰個。」企喺我身後嘅岑諾新淡淡地講道

我回頭望咗佢一眼,岑諾新一直望住喺籃球場嗰邊,喺球場打緊波嘅都係我地級嘅男仔,有張景彥⋯當然仲有其他人!

我㩒咗包蜜桃茶,彎下腰將膠板掀起,拎咗包蜜桃茶出嚟

「你想打波?」我企喺岑諾新隔離,同佢一齊望住球場,「好似識你咁耐,都冇見過你會同楊朗然佢地打波~」

「冇特別中意打波因為⋯」岑諾新定睛望住球場上嘅人

有時覺得,岑諾新收起咗好多心事一樣,明明好多嘢需要呻,但係佢偏偏收起唔講⋯

望住佢臉上嘅冷漠,總覺得佢好似係為咗令人唔察覺佢嘅心事而擺出一副冷漠嘅模樣

「咦⋯」我注意到放喺場邊長櫈上嘅書包,我認得嗰個書包,「嗰個書包係⋯孫慧伶嘅書包⋯?」



岑諾新唔係想打波,只係睹物思人⋯?

我就企喺佢隔離呀,我地唔係有相同想法嘅人咩?明明我可以理解,我會明白⋯

平時講起佢地,好似都係我講嘅多,岑諾新好少講,唔忍到忍無可忍嘅時候都唔講

我知道佢在意,望佢嘅表情,我就知道,即使佢好努力咁壓抑自己都好,但又點可能瞞得過同佢有相同感受嘅我?

「佢番嚟啦。」我悄聲提佢,孫慧伶大概係去完洗手間番嚟

我回頭望向旁邊同樣可以行出去籃球場嘅走廊,見到孫慧伶臉帶着微笑朝住出面行去

「番去。」岑諾新喺孫慧伶行到出籃球場嘅瞬間轉身背向球場



「哦,好呀。」我點一點頭,岑諾新都唔等我就自己直接行

我向球場回望多一眼,孫慧伶坐低喺一旁嘅長櫈上,大概係等埋張景彥先走啦⋯

我都唔想落後太多,望咗一眼之後就轉身跟喺岑諾新嘅身後

「搭車車~番屋企~」我一蹦一跳地行去岑諾新嘅身旁

「懶可愛。」岑諾新望一望我,無奈地講道

「咩懶可愛呀~我冇扮可愛㗎~」我笑一笑,同佢一齊踏出校門,順便挪揄道,「而且你眼中唔係得佢咋咩~有望到我㗎咩?」

「你咁大個人喺我隔離,我點會睇唔到?」岑諾新淡淡地回答,稍稍望我一眼,嘴角微微揚起

「係咩~」我望住佢笑問道



「係呀!」岑諾新回答嘅同時,一下子拉起我嘅手,輕輕地拖住我

上到巴士,我地照舊坐喺上層尾段嘅座位,啱啱喺上樓梯嘅時候我地鬆開咗手,一坐低,岑諾新將書包除落嚟平放喺大腿上

岑諾新喺褲袋中拎出手機,右手拎住手機,左手搭咗喺書包上面

我把玩着掛喺書包上嘅企鵝公仔,我用眼尾瞄咗一下岑諾新嘅書包上掛住嘅嗰一隻公仔

「岑諾新。」我伸手拍咗佢兩下,微微側身面向佢坐,「你中意咩類型嘅人?」

我突然間心血來潮想知道,而且我知道嘅話都唔係一件壞事呀~

岑諾新望向我,但佢冇即刻答,而係好似猶疑咗一下、諗咗一下



「我都唔知。」岑諾新回答道,「冇諗過呢個問題。」

「哦⋯」我點一點頭

「做咩咁問?」岑諾新問道

「突然想問下咋嘛~」我笑一笑講道,「冇咩特別。」




IG Link: https://www.instagram.com/nd_cotttoncandy/?hl=zh-tw