［愛情純愛］既然忘記唔到佢，不如試下中意我⋯？: 49. 嘗試了解

落咗車之後，我地就好似平時一樣，岑諾新送我番屋企

番到去屋企大堂門外，我微微踮起腳尖，伸手攬岑諾新，我感覺到佢亦輕輕地回擁我

「岑諾新佢，其實都冇咩唔好⋯」我喺心中咁樣諗嘅同時，慢慢地收緊咗雙臂間嘅距離，「中意佢，係唔係真係會變得開心啲⋯？但如果最後，只有我一個人中意咗對方，佢冇中意我嘅話⋯」

咁，咪又係單相思⋯

我唔想要咁樣⋯我唔想再單戀一個人⋯苦澀，係單戀一個人嘅味道



岑諾新，如果你令我中意咗你，咁我都會努力咁令你中意我⋯

我感覺到岑諾新鬆開手，個人稍微向後靠，我即刻再將雙臂間嘅範圍收窄

「我透唔到氣啦⋯」岑諾新輕輕拍咗我兩下

「再攬多一陣⋯」我將頭埋喺佢嘅頸窩上蹭了蹭，「一陣就得⋯」

本來鬆咗手嘅岑諾新再次輕輕將我攬喺懷中，佢默默地耷低頭，臉頰貼喺我嘅太陽穴附近



「你做咩呀今日？」岑諾新嘅聲線好似比平日溫柔咗啲，可能只係我嘅錯覺

「冇咩特別。」我搖搖頭，「就係好似平時咁攬一下。」

「你唔好郁，你啲頭髮整到我好痕⋯」岑諾新下意識縮起咗膊頭一下，「唔好郁嚟郁去。」

我聽到佢咁講，故意郁多兩下，笑住咁抬起頭望佢

「叫你唔好郁⋯」岑諾新望住我，左手一下子㩒實我個頭唔比我再郁



「喂！㩒實我做咩？」我笑住咁問道，佢真係出咗力㩒，「放手啦！郁唔到啦！」

「就係要你郁唔到。」岑諾新笑咗一笑，但佢冇將力度放輕

我乖乖地唔再郁，因為頭髮都會亂，雖然應該都亂咗，但再郁嘅話會更亂

我稍微將頭上仰，鼻尖掂到佢嘅頸，一湊近佢嘅時候，就聞到有止汗劑嘅味道

原來佢都會噴止汗劑？我以為佢唔會，雖然唔知點解我會諗呢樣嘢

岑諾新輕拍咗我後腦勺一下

「聽日見。」 我緩緩鬆開手，轉身朝大堂走去，「拜拜。」

我不忘回頭同佢揮揮手，然後先再拉門，喺我準備行入大堂前，我忽然諗起一件好重要嘅事



我回頭打算睇下佢走咗未，一回頭，原來佢仲喺度⋯！打算等我入咗去先走？

岑諾新見到我回頭走向佢，眉頭輕輕一皺，係疑惑？

「番轉頭做咩？」岑諾新望住行到佢面前嘅我，語氣平淡問道

「有嘢唔記得咗同你講～」我笑一笑，然後對佢招手，示意佢耷低頭將耳仔湊近過嚟

岑諾新耷低頭湊近我，我嘅雙手放喺嘴邊，就好似人地講秘密一樣

「岑諾新你呀⋯要好好留意我先得呀～」我細聲地對佢講道

岑諾新聽完我講之後，緩緩地企直番個人，望住我無奈一笑



⋯

我灘喺床上發呆，諗起今日放學後喺籃球場旁邊時嘅岑諾新

佢係唔係真係望緊孫慧伶個書包嚟睹物思人？定只係我嘅錯覺，其實佢只係單純地發呆？

「唔知呀⋯」我望住天花板喃喃自語，一個翻身，由平灘變側身瞓喺床

我拎起電話，打過去比詠妍，想搵佢傾下偈講下心事咁

電話先響咗兩、三下就通咗

「做咩呀，咁好心情打過嚟？」詠妍接電話後嘅第一句就係咁

「搵你傾下偈唔得嘅～」我無奈地講道



「要咁秘密打電話嚟同我講，肯定唔係關於之前嗰個就係宜家呢個啦～」詠妍一下子就識穿咗我

「你咁勁嘅，一估就估到⋯」我都唔知要開心定點，我嘅聲線完全唔係興奮之類嘅聲線

我滔滔不絕地將今日發生嘅事都講咗比詠妍知，再加上我嘅苦惱都講埋比佢知

喺詠妍面前，我可以暢所欲言，咩都可以講；心事有佢聽，傷心有佢陪，大概就係咁樣

我唔知岑諾新點諗，但我知佢仲係中意孫慧伶；我唔知佢放低咗將多，但我知道喺佢眼裏仍然有孫慧伶

我冇要求呢一刻開始，佢嘅眼中只可以有我一個人，我都做唔到眼中只剩佢一人，而且冇可能即刻就做到

我地都係啱啱先決定，都係啱啱開始，真正屬於我同佢嘅故事，先啱啱開始咗冇耐



「你多啲嗲下佢會唔會好啲？」詠妍認真咁問我，但我卻只感受到佢想挽我

「唔會⋯」我無奈地回答，「佢中意我就有用啫，佢宜家唔係中意我，咁我嗲佢有咩用⋯」

「咁佢又唔係討厭你，而且叫你多啲啫，唔係叫你同親佢講嘢都要嘛！」詠妍有少許激動咁對我講道，「偶爾撒個嬌都好呀～你多啲依賴佢啦⋯」

「我有呀，依賴佢嘅話。」我講道

我都唔係冇依賴佢呀，喺張景彥嘅事上，我都有依賴佢呀

「叫你依賴佢嘅意思，唔一定係喺啲好大嘅事上，喺啲好細嘅事上都可以，例如你買咗枝嘢飲，叫佢幫你開樽蓋呢類呀⋯」詠妍擔心我唔明，解釋比我聽




IG Link: https://www.instagram.com/nd_cotttoncandy/?hl=zh-tw