［愛情純愛］既然忘記唔到佢，不如試下中意我⋯？: 51. 特別的人

有時候，我會覺得自己好似下一秒就要比佢攻略一樣

望住喺我面前先會有嘅表情，即使係佢冰冷嘅一面，我都可以察覺到自己係特別嘅存在

冰冷嘅佢，臉上卻掛上淡淡嘅微笑，佢嘅微笑裏總係夾雜咗一份溫柔

冷淡又開朗嘅佢，喺我面前展現出佢本來一面嘅佢，令我覺得自己對佢嚟講係特別嘅佢，如果⋯

如果可以成為一個對佢嚟講最特別嘅存在嘅人嘅話⋯



「發咩呆？」岑諾新輕輕踢咗我一腳，我頓時回過神

我自然地笑咗一笑，左手一提起托住下巴，微微側着頭，右手拎起薯條放入口

岑諾新望住我，呢一刻嘅我地相處起嚟好自然

「笑咩？」岑諾新不禁輕輕一笑然後問道

「岑諾新⋯」我輕喚佢嘅名，佢定睛望住我，「點樣先係一個特別存在嘅人⋯？」



實際上呢個問題冇咩意思，只係想隨口一問

「每個人嘅定義都唔一樣。」岑諾新拎起汽水飲咗一啖，「睇你點定義。」

「嗯⋯」我點點頭，拎起一條薯條又放入口

我抬眼望向岑諾新，佢望住手上嘅手機螢幕，一臉專心咁睇手機；我拎出手機睇，一打開IG就見到孫慧伶出咗post

「你有冇睇到？」我將手機螢幕面向佢，遞起手機比佢睇



「有。」岑諾新瞄咗我嘅手機螢幕一眼，然後又迅速地將視線移開

「哦⋯」我點點頭，然後默默地將手機收回

「好失望？我話睇咗。」岑諾新問我

「嗯？冇呀～」聽到佢咁樣問，我不禁有啲愕然，我下意識笑咗一笑，「我做咩要失望？」

岑諾新定睛望住我，但咩都冇講，佢只係默默地望住我，過咗一陣之後佢先開口：「冇嘢。」

我微微耷低頭，然後又悄悄地抬眼望向佢

「我去個洗手間⋯」我企起身朝住喺盡頭嘅廁所行去

X⋯X⋯X



「⋯！」一股重力忽然間落喺我嘅背上

喺我回神過嚟嘅時候，蔣倩盈已經從後攬住我

「你唔係去廁所咩？」我問道

「唔係⋯」蔣倩盈講嘢嘅聲音離我好近，我什至可以感覺到佢呼吸時嘅起伏

我默默地將放喺旁邊座位嘅書包拎起放到大腿上，拉過佢嘅手；蔣倩盈鬆開咗我，坐低喺我身旁，我將佢嘅餐盤搬到去我隔離，放番喺佢面前

「你一直捉住我嘅話，我食唔到嘢。」我無奈地望向佢

蔣倩盈嘅雙手捉住我嘅手腕，但又一直唔講嘢，只係默默地坐喺我隔離



我放低手機，拎起佢杯汽水遞到佢面前，佢嘅上身前傾，然後一下子咬住飲管飲咗一啖，飲完之後仲要抬頭望一望我

做咩突然間擺出一副無辜嘅表情⋯？有淡淡嘅撒嬌嘅味道⋯

蔣倩盈係一個⋯除咗同張景彥有關嘅事之外，從來都唔會依賴我嘅人嚟⋯

佢喺我面前喊又好、覺得無助而搵我都好，每一次都係因為張景彥，但除此以外，佢就唔會依賴我

女仔，有時有啲麻煩，有時會令人手足無措，但我覺得偶爾依賴一下人都唔係一件壞事

「就算蔣倩盈佢多啲依賴我都唔緊要。」有時我係咁諗，畢竟我係佢嘅⋯好戰友

蔣倩盈緩緩地將手鬆開，靜靜地坐喺我隔離睇一邊手機一邊食嘢

我望咗佢一眼，因為佢唔講嘢一直都，一望過去先發現，佢正扁着嘴望住手機螢幕，過咗兩秒之後佢又喺臉上掛上笑容



我地食完嘢之後就離開麥當勞，今次，我主動地牽起佢嘅手；我同蔣倩盈嘅視線對上，佢朝我微微一笑

同我相比之下佢隻手好細，手指好纖幼，手亦比我白、比我滑好多⋯喺拖起蔣倩盈嘅手之前，我淨係拖過⋯

「嘖⋯講咗唔諗。」我喺心中默默地講道，然後望向蔣倩盈

蔣倩盈佢，係個好女仔嚟⋯唔知點解喺我心入面係咁樣諗，我都⋯想留意蔣倩盈多啲，亦想佢留意我多啲⋯

我同佢行喺行人路上，今日蔣倩盈行咗喺我右邊，平時佢都係行喺我左邊⋯我鬆開佢嘅手，行番去佢嘅右邊

「你突然間做咩？」蔣倩盈嘅視線終於離開手機嘅螢幕望向我

「你行番入面。」我下意識就迴避佢嘅視線，「而且，你平時都行開我左邊。」



「嘻嘻⋯」蔣倩盈呆咗兩秒，然後笑起嚟，「好呀～」

今日嘅蔣倩盈，意外地可愛、意外地會撒嬌⋯




IG Link: https://www.instagram.com/nd_cotttoncandy/?hl=zh-tw