［愛情純愛］既然忘記唔到佢，不如試下中意我⋯？: 50. 幾乎每天

「我明呀⋯你唔洗解釋比我聽⋯」我無奈地講道

「咁你要做先得㗎⋯」詠妍對我講道，「講開又講，最近點呀？」

「唔⋯最近點⋯其實都冇咩點唔點，都係好似平時咁⋯」我諗咗一陣關於我同佢最近嘅相處，「係唔係要有啲咩突破口⋯？」

「你地成日都好似平時咁點得㗎？」詠妍嘅聲線語氣有啲訝異

「唔係可以點？」我問道



「你都識講要有啲突破啦⋯！」詠妍無奈地回答道，「你要令佢見唔到你嗰陣都記掛住你先係㗎嘛～」

「我點知佢有冇記掛住我啫⋯！」我都有啲無奈，「佢記掛住孫慧伶就有！」

「咁你咪就係要令佢記掛住你唔再掛住孫慧伶囉！」詠妍著急地解釋道

要佢記掛我多啲呀⋯？我要點樣做先係最好⋯？

我望向放喺電腦椅上嘅書包，目光落喺掛住喺書包拉鍊上嘅企鵝公仔



諗起嗰日我地去街嘅時候，佢聽到我話中意，即刻就話買，我唔知道佢心中嘅意思，但嗰一刻，我有啲愕然⋯

「好似單純係因為我中意所以就買咗一樣⋯」我喺心中默默地講道

「嗰種叫咩？欲拒還迎？」詠妍就好似自言自語一樣，「好似係？唔知呀！類似呢啲嘢啦～」

「點解喺你把口講出嚟會咁曖昧不明⋯」我不禁笑了笑，「不過我大概明你咩意思～我會再努力一下～」

撒個嬌呢啲嘢好簡單，但講到要「欲拒還迎」呢招⋯嘻⋯講到好曖昧咁樣



會唔會咁樣做嘅最後，變咗我對佢念念不忘⋯？

到底會係邊個中意邊個先？係我中意佢先，定會係佢中意我先？

「我努力令佢中意我，同時努力咁，中意佢⋯」我拎住掛斷咗嘅電話，平灘喺床上

忽然間好想食麥當勞，好想食薯條⋯宜家去買好唔好？

「5點⋯」我拎起手機睇時間，「宜家去買嘢食會唔會好過分⋯」

算啦算啦，換件衫去買個嘢食番嚟啦～免得一直掛坐個薯條～

我行得好快，因為心入面想快啲買到薯條番屋企食，所以連行起路上嚟都好似好趕時間一樣，其實只係想去買個麥記

行咗一段路之段嚟到最近屋企嘅麥當勞，一入門口就望到新鮮炸起嘅薯條，見到都要流口水啦～



「咦？」我一踏入門口朝落單處行嘅時候，見到岑諾新企咗喺落單處前點緊餐

「一個麥樂雞餐唔該。」

我默默地行到佢嘅身後，偷偷地瞄咗一眼面向客人，用作對單嘅螢幕

「堂食⋯」我見到喺右下角寫住堂食兩個字

佢落完單之後就行開，企到一旁等餐，不過佢好似掛住睇手機冇留意到我

我叫咗一個魚柳包餐，因為覺得淨係食個薯條唔係幾好，而且又想飲嘢，直接叫一個餐最方便，最多今晚唔食飯淨食餸

我攝手攝腳地繞一大個圈行到岑諾新嘅身後，一下子從後將佢嘅雙眼微微掩住



「估下我係邊個～」我笑問道

「蔣倩盈。」岑諾新嘅回答快而準

「咁快就估得中嘅？」我鬆開手行到佢身旁，「真不愧係幾乎日日都對住我嘅你呀～」

「你都識講，我幾乎日日都對住你啦。」岑諾新望一望我，又望一望手上嘅單

「你堂食呀？」我探頭望向岑諾新手上嘅單

「嗯。」岑諾新點一點頭

剛好佢嘅餐就到咗，岑諾新行出去拎餐，然後拎住餐盤往一旁嘅座位行去

下一個就係我嘅餐出嚟，我拎住餐盤行到去剛坐低嘅岑諾新嘅嗰張枱



「唔知我可唔可以同你一齊坐呢？」我邊問邊將餐盤放低喺佢對面嘅位置

「你嚟搞笑？」岑諾新抬眼望我，「而且你都坐低咗。」

「嘻⋯」我笑一笑，然後將薯條倒出嚟，拎起放喺一旁嘅茄汁

我同平日開茄汁嘅方法一樣，沿住虛線撕開一角，但係我撕唔開⋯

「呢邊唔啱咩⋯？」我細聲地講道，耷低頭專注地將包裝角撕開

我換另一隻角試下撕，都係撕唔開

對於撕唔開嘅包裝令我有啲懊惱，因為我習慣咗食薯條一定要點茄汁⋯



我抬眼望咗一眼岑諾新，心裏想叫佢幫我，但我對手仍然努力咁試緊

「岑諾新，我開唔到包茄汁⋯」我有啲無助地望住佢講道，「幫我搣⋯」

「比我。」岑諾新朝我伸手，我將包茄汁遞咗比佢

佢接過茄汁，然後用咗0.01秒嘅時間將包茄汁撕開咗，我抬頭望住佢，佢將包茄汁遞比我嘅同時望一望我，嘴角微微上揚⋯




IG Link: https://www.instagram.com/nd_cotttoncandy/?hl=zh-tw