［愛情純愛］既然忘記唔到佢，不如試下中意我⋯？: 55. 情人節禮物

「喂！」我行到佢身旁時先叫咗佢一聲，「嗱。」

「咩嚟？」岑諾新定睛地望咗盒朱古力一秒然後先伸手接過盒朱古力

「朱！古！力！」我怕佢唔知，特地加重語氣，一個一個字咁講，「今日係情人節嘛⋯」

「嗯，多謝。」岑諾新微微點頭，然後將書包孭到前面，睇嚟係打算收埋盒朱古力

「你唔試一粒呀？」我問道，佢嘅動作停咗落嚟，「我整得好～辛苦㗎！」



岑諾新猶疑地望一望個盒，然後又望一望我，我一臉期待地望住佢；岑諾新打開咗個盒，喺我面前食咗一粒

「點呀點呀？」我期待咁問佢嘅意見，「好唔好食呀？」

「好食。」佢點一點頭，然後將個盒遞到我面前，示意我食一粒

「唔啦～比你㗎嘛～」我搖搖頭，「你要食晒㗎，我整得好辛苦，所以你一定要清晒佢。」

「好。」岑諾新將盒朱古力放入書包，我直盯着佢，「望住我做咩？」



「冇咩，只係見你一啲都唔surprise咁⋯唔通係唔想收我嘅朱古力？」我心裏有啲不滿，難得我咁好人整朱古力，但佢嘅反應竟然咁平淡

「我surprise呀，我都冇預你會整朱古力比我。」岑諾新嘅語氣特別平淡，完全唔似好surprise

「你咁嘅反應都叫surprise⋯？」我有啲不悅地望咗佢一眼，「收朱古力都唔開心⋯我親手整㗎，咁都唔開心⋯」

「我冇唔開心。」岑諾新笑咗一笑，「我開心啦開心！你係第一個送朱古力嘅人。」

第一個⋯？原來佢，冇收過佢送嘅朱古力⋯我心裏好似鬆咗一口氣一樣



點解我會，鬆一口氣？

「哦～好囉～」我微笑道，「要食晒，唔準剩，一粒都唔可以剩！」

「我會放喺房，一個人獨食。」岑諾新講道

「放喺房會融。」我不禁一笑，「但短時間內食晒應該唔會融嘅～」

「放雪櫃嘅話我個妹會食。」岑諾新講道，「你唔係想我一個人食晒咩？」

「當然！」我點頭，「食晒嘅話要同我講喔～」

「我番去啦。」岑諾新對我講道，「多謝你盒朱古力。」

「嗯嗯！」我點點頭，「情人節快樂。」



我企喺原地望住佢轉身走，意外地佢好平靜，完全唔覺得佢收到得嘅朱古力有幾開心

不過佢話佢一個人獨食，應該都算係中意食個朱古力嘅～

「佢中意實在太好啦⋯！」我喺心中愉悅地講道

我望向佢嘅背影，頓時愕一愕然

「原來係扮冷靜⋯」我不禁失笑，因為望到佢嘅耳根紅紅的，「因為怕羞所以扮冷靜呀原來～有啲可愛～」

等我仲以為佢真係咁冷靜，原來只係用冷靜外表同語氣去掩蓋自己嘅害羞

我番到屋企之後第一時間就將呢個好消息同詠妍分享：「佢中意食呀！！！（臉紅）」



我將手機放埋一邊等詠妍回覆同時，諗起岑諾新話我係第一個送朱古力嘅人，心裏又有種難以言喻嘅開心

「佢第一次食嘅情人節朱古力就係我送嘅朱古力⋯」我喺心中默默地講道，嘴角不禁微微上揚

X⋯X⋯X

「呼⋯」我將放咗喺書包入面嘅朱古力拎番出嚟放喺枱面，「朱古力⋯」

計埋今次，我拍咗兩次拖，而今次係我第一次喺情人節嘅時收到女朋友送嘅朱古力

我將盒蓋掀起，望住盒中剩下嘅5粒朱古力，心裏有種難以形容嘅心情

我拎起一粒放入口，入面嘅牛奶朱古力好甜，但外面嘅黑朱古力將甜度中和，食起嚟唔係真係膩得過分，可能又加上我本來就中意食甜嘢嘅關係，所以對甜度嘅承受能力高啲

「你要食晒㗎，我整得好辛苦，所以你一定要清晒佢。」



我忽然間諗起蔣倩盈喺送盒朱古力比我嘅時候同我講嘅嘢

對於中意食甜品嘅我嚟講，朱古力當然都係我會中意食嘅嘢；至於係女朋友整嘅朱古力，我又點會食剩⋯？

本來我就冇諗過佢會送朱古力比我，所以當佢叫我等佢一陣嘅時候，我都冇察覺到啲咩

直至佢落到嚟，將盒朱古力遞比我對我講：「朱！古！力！今日係情人節嘛⋯」

「朱古力⋯？」當下嘅我喺心中帶着疑惑嘅語氣默默地講咗三個字

喺我伸手接過佢送嘅朱古力時，心入面竟然有啲緊張

或者因為係第一次收到女仔送嘅情人節朱古力



又或者，係因為我由一開始就冇期待過我呢個「女朋友」會整朱古力比我

「呼⋯」我輕呼一口氣，將手放到胸口前

嗰種悸動嘅感覺有啲陌生，但又令人感覺有啲激動⋯

「唔知佢，有冇整過朱古力比佢⋯」我嘅腦海中忽然間閃出一個問題

嘖⋯胸口突然間變得悶悶的⋯




IG Link: https://www.instagram.com/nd_cotttoncandy/?hl=zh-tw