「嘖嘖⋯佢有冇整過朱古力比佢食關我咩事⋯?」我不禁自問道,「同我一啲關係都冇。」

我將盒朱古力放咗喺枱頭,心型嘅朱古力⋯好似動漫先有嘅劇情一樣,情人節收到朱古力⋯

講開又講,我最近好似少諗起嗰個人,會唔會係因為最近成日都見住蔣倩盈?

或者因為最近嘅心思都放喺同蔣倩盈相處上,突然間覺得,要中意蔣倩盈,好似都唔係一件難事⋯

畢竟⋯



X⋯X⋯X

岑諾新:咁就食咗一半

我因為收到IG嘅通知而㩒開嚟睇,原來係岑諾新搵我,send咗張朱古力嘅相過嚟比我

「你中意食就好(臉紅)」我回覆道

見到已經食咗一半嘅朱古力,我嘅心底裏都係有啲開心



岑諾新:會唔會今晚已經食晒

「咁快!?」我見到岑諾新send過嚟嘅message時嘴角不禁上揚,「你講嚟氹我?」

岑諾新:唔係,真係好食

我望住手機嘅螢幕,都唔知佢係咪想氹我先咁講,不過我都係覺得好開心,畢竟我第一次整朱古力,而且整得咁成功嘛~

手機彈出一個通知,係詠妍嘅回覆



詠妍:開心啦你~

「冇特別開心~」我笑着回覆道,「不過佢中意食實在太好」

詠妍:睇嚟你地之間嘅關係又會變好啦~

「本來就好⋯」我無奈地回覆道,但點解我咁樣答佢好似有啲奇怪咁,「關係唔好又點一齊?」

詠妍:你兩個本來都唔係朋友,明明就係一齊咗先熟起嚟

詠妍:唔好當我唔知

比詠妍咁樣一講,我即刻唔知可以回覆啲咩比佢,因為詠妍講嘅又係一個事實嚟

我同岑諾新本來就唔係啲咩朋友,係同班同學而已,真係話變熟嘅話就真係一齊咗之後先熟



至於關係好唔好呢個問題⋯我個人覺得,我同岑諾新嘅關係唔錯,唔係話超好,但都叫唔錯,呃⋯至少我地都有講有笑,知道大家嘅秘密嘛

詠妍:唔知你有冇發現⋯

「???」詠妍打咗一半又唔打一半,搞到我好好奇我有冇發現啲咩

詠妍:最近你冇同我提過張景彥

「咦⋯」我見到詠妍咁講,我自己都不禁有啲愕然,「我最近⋯」

詠妍咁樣一講,我先察覺到自己最近喺同詠妍傾計嘅時候真係少咗提起張景彥

詠妍:你最近同我講親都係岑諾新點點點,你同佢點點點



「咁我努力緊嘛」拎住手機回覆嘅我,心裏莫名其妙地有啲害羞之類嘅感覺,「而且我最近都成日同佢一齊」

我望住手機嘅螢幕,最近我的確成日都同岑諾新一齊,一齊番學放學,去咗第一次嘅約會,仲有情人節嘅朱古力⋯

呢啲事比我嘅感覺都好新鮮,以前同張景彥一齊嘅時候都冇試過

因為住嘅地方唔同,所以唔會一齊番學,放學嘅話會都只會陪我喺巴士站等車,目送我上車,喺外面同我講拜拜

出街嘅時候都只有我一個人覺得開心一樣,應該話,我感覺唔到佢係打從心底覺得同我一齊好開心

同張景彥一齊嘅時候,佢都會對我溫柔、細心,亦會包容我;但同時因為我係追求佢嘅嗰一方,所以喺佢面前我亦唔會任性⋯

雖然宜家對岑諾新嘅感覺並未真係到中意嘅地步,但佢同張景彥比我嘅感覺卻好唔一樣

「明明都係對我一樣嘅感覺,但點解比較起嚟會差咁遠⋯?」我不禁喃喃自語道





今日係假期,我做完功課之後坐喺梳化上睇手機,我睇緊新上嘅電影預告片

「好想睇呢套呀~」睇完預告片嘅我不禁講道,「問下詠妍睇唔睇先~」

我打開IG打算dm詠妍問佢一唔一齊睇戲,我打開咗同詠妍嘅對話框

「睇唔睇呢⋯」我先打咗頭四個字,然後就停咗落嚟冇打落去,心裏不禁產生咗一個想法,「問下岑諾新睇唔睇⋯?」

我將輸入咗嘅字刪番,然後㩒開同岑諾新嘅對話框

「睇唔睇戲?」我打字打道,喺我想㩒send嘅前一刻,我又將成句嘢del咗,「我咁樣會唔會太主動⋯?」



於是我將嗰度戲嘅預告片cap咗出嚟,喺IG po story:「想睇⋯」

「岑諾新會唔會get唔到㗎⋯」我心裏又不禁有啲擔心,擔心岑諾新睇完我嘅story之後會唔會唔明我嘅暗示




IG Link: https://www.instagram.com/nd_cotttoncandy/?hl=zh-tw