［愛情純愛］既然忘記唔到佢，不如試下中意我⋯？: 57. 意外地⋯！？

唉⋯但冇辦法啦⋯我唔想做主動開口約佢嗰個，所以唯有咁樣做，希望佢會get到我想點啦⋯！

我將手機螢幕鎖上，將手機放喺低手邊，先放低咗兩秒，手機震咗兩下嘅同時螢幕一亮

「唔通岑諾新睇到啦已經⋯！」我訝異地拎起手機，「咁快！？」

手機用我嘅face ID解咗鎖，隨即睇到嚟自IG嘅內容

「呀⋯」我瞬間有啲失望，「原來係通知我有人po咗新嘢呀⋯」



唔知道岑諾新睇完之後會唔會問我呢～

我一直抱住呢個心態等，但去到夜晚都係冇收到岑諾新嘅message

「算啦，番學嗰陣問下佢啦⋯」我心裏無奈地講道

⋯

我同岑諾新就好似平時咁一齊番學，我地企喺一樣嘅位置，我耷低頭拎住手機，搵到嗰個電影嘅預告片



「你嚟緊得唔得閒？」我先小心翼翼地問道

「得閒呀，做咩？」岑諾新嘅視線從手機螢幕上移開

「你有冇興趣睇呢套戲呀？」我將手機遞到佢面前，「我想睇，但詠妍又唔得閒⋯」

我隨便搵咗個借口，又借咗詠妍嚟做藉口

「哦，睇囉。」岑諾新好快就答應咗我



「星期六日都好爆呀個場⋯」我上網睇下戲院嘅場次，但星期六日得兩場，兩場都爆晒啦差唔多

「今日囉。」岑諾新淡淡地講道

「今日？今日係有場，但我地買唔買得切飛㗎？」我有啲擔心地講道，「佢4點50分就開場，我地落咗堂仲要搭車去戲院喎⋯開場前15分鐘就冇得買飛㗎啦好似⋯」

「嗯，唔會買唔切。」岑諾新喺褲袋拎出銀包，喺銀包中抽咗兩張戲飛出嚟遞比我，「嗱。」

我不禁瞪大眼，抬頭望向佢

「你⋯！」我頓時嚇到呆咗咁望住佢手上嘅戲飛又抬頭望一望佢，一時語塞，「你⋯！點解⋯！」

「買咪有。」岑諾新將戲飛放到我手中，「你嗰日唔係po咗story話想睇咩？」

「你幾時買㗎⋯！」我心裏有啲激動，又有啲興奮



「琴日。」岑諾新淡然地講道，佢望住我嘅時候，臉上掛上淡淡嘅笑容

「你知我一定冇約人㗎啦？」我不禁問道，雖然個心都係好開心

「唔知，只係博下。」岑諾新微微聳肩

好開心⋯！原來佢有睇到我嘅story，喺佢開口問我之前，佢就直接買咗戲飛

「吓！？」我不禁笑起嚟，「你唔問我？」

我抬起頭望向岑諾新嘅時候，見到佢朝我笑咗一笑，我嘅心，有啲激動

「咁今日放咗學之後去睇戲？」岑諾新將銀包放番入褲袋同時問我



「嗯嗯！睇呀！」我用力地點頭，我仲以為佢冇睇到我嘅story，「之前佢出嘅時候就已經想睇！你笑咩呀？」

我見到佢望住我時不禁一笑便好奇問佢

「我覺得我咁樣搏下嘅結果都唔錯。」岑諾新默默地收起咗少許笑容，臉上只剩下淡淡嘅笑容

「你真係好識刷好感⋯！」我笑住講道，我嘅手上仲拎住兩張戲飛，「我袋呀？」

「嗯，放你度。」岑諾新點一點頭，然後企直個人，「Keep張戲飛都咁開心？」

「嘻嘻⋯因為套戲想睇好耐啦～」我笑着將戲飛放入銀包，心裏果然好開心呢～

想睇呢套戲當然係其中一個開心嘅原因，而另一個原因係因為有啲驚喜，原來真係會有人因為我一句想睇而去買飛，心裏，好開心⋯！

⋯



今日嘅Lunch我地出去食，冇留喺學校

「倩盈你今日好似好開心咁嘅？」坐喺我對面嘅希童問我

「我？有咩？」我疑惑地望住希童，「我同平時一樣都係咁咋嘛～」

「你今日睇起嚟特別開心呀～」詠妍都好奇地講道，「有啲咩開心事？快啲share下！」

「我知啦我知啦～一定係因為你想睇嘅嗰套戲上咗啦～」樂恩一下子就估到係同我想睇嘅電影有關嘅事

「係喎～你嗰日咪話想睇嘅～我地陪你睇呀～」詠妍拎起枱上嘅凍檸茶飲咗一啖，「你想幾時呀？」

「唔洗啦～」我笑了笑搖搖頭，「岑諾新佢買咗飛話今日同我去睇～」



「哦～」佢地三個幾乎係用同一個表情望住我

「佢買？個po原來係比佢睇，用嚟約佢㗎～」詠妍望向希童佢地

「哦～」希童同樂恩頓時好似明白咗啲大道理一樣點點頭

「唔、唔係呀！」我頓時講道，「我冇約佢，而且我都係今日先知佢買咗飛⋯！」




IG Link: https://www.instagram.com/nd_cotttoncandy/?hl=zh-tw