［愛情純愛］既然忘記唔到佢，不如試下中意我⋯？: 59. 溫暖

「好呀。」我點點頭，岑諾新好似知道我有機會覺得凍一樣，開場前就同我講定先

影院內嘅燈慢慢變暗，最後只剩下大螢幕亮着，電影嘅片頭開始播起

一幕又一幕嘅愛情故事，一對又一對嘅情侶；轟轟烈烈嘅愛情，甜甜蜜蜜嘅愛情，虐心嘅愛情⋯每一對情侶嘅背後又埋藏咗啲咩戀愛故事？

望住電影中嘅男女主角擦肩而過，明明相愛，卻因為種種原因冇辦法喺埋一齊⋯心裏有啲心酸，有啲難過⋯錯過咗對方之後又可以再回頭嘅，現實又有幾多？

我未至於因為一段感情而對愛情失去信心，我嘅心底裏亦仍抱有對愛情嘅期望



男女主角因為誤會而決定分開，大家都冇多問一句，冇人解釋

「我地都為對方等待過、付出過，你話嚟到呢一刻要分開難唔難受，難受⋯我又點會唔難受？但係我控制唔到，我同佢嘅緣份，大概⋯到此，為止⋯」

女主角講出一句豁達嘅說話，但佢臉上嘅表情卻係悲痛難耐，眼神卻係空洞無比

雖然未到催淚嘅地步，但都係有啲心酸

「呼⋯」我將手放到嘴前，輕呼一口氣



戲院內嘅冷氣有啲大，一開始都唔覺得凍，但坐耐咗之後就覺得涼，然後就開始凍，我嘅手已經變得冰冰的

「係唔係凍？」岑諾新湊近我，細細聲地問道

「有啲，冷氣好大⋯」我微微點頭

岑諾新忽然將上身前傾，然後將佢身上本來著住嘅外套除咗落嚟披到我身上，佢嘅指尖掂到我嘅手心，輕輕地握咗我嘅手一下，然後又將手抽回

「好暖⋯」我喺心中講道，「手同外套都⋯」



我偷瞄咗佢一眼，佢嘅手放喺右邊嘅扶手上托住腮專心地望住大螢幕，突然間佢離我好遠一樣；我將放喺我右手邊嘅嘢飲拎起放到冇人座嘅左手邊扶手上，然後悄悄地將喺我同佢中間嘅扶手向上推起

我雙眼望住大螢幕同時，手悄悄地朝佢嘅左手伸去，我感覺好快就要掂到佢嘅手，但我又有啲猶疑

「我直接拖佢嘅話，會唔會顯得我太主動⋯？」我喺心中諗道，「⋯！」

岑諾新嘅手輕輕掂咗我隻手一下，我不禁一笑，我將手轉過嚟，手心朝上，岑諾新嘅手蓋喺我嘅手上，佢嘅手果然好溫暖

我輕輕握緊佢嘅手，佢輕輕地回握住我嘅手，好溫暖⋯

喺戲院睇戲嘅時候悄悄地拖住手，感覺好唔真實⋯好似，只有電視劇先會出現嘅情節一樣，感覺虛幻，但溫度真實

影院嘅燈再次亮起，螢幕上播緊演員名單，亦到咗散場嘅時候

「唔～好睇～」我鬆開佢嘅手伸咗個懶腰，「真係好好睇～」



我將岑諾新嘅外套順手對摺咗一下，然後遞番比佢，岑諾新接過件外套然後將佢放咗入書包入面

岑諾新企起身孭好書包望向我，朝我伸手；我笑一笑然後將手搭喺佢嘅手心上，佢牽起我嘅手拉住我行

「番去？」岑諾新問我

「嗯！」我點點頭，「番去啦～」

感覺上，我地嘅關係，好似又邁進咗一步一樣，又有少少心跳加速嘅感覺

岑諾新就好似平時一樣將我送到番去屋企樓下

「我到啦。」我微微一笑講道，「我地下次⋯再一齊去睇戲呀～」



「嗯，好。」岑諾新點一點頭

我望住佢，不禁笑咗一笑，係打從心底裏覺得開心而笑

「笑咩？」岑諾新疑惑地問道

「冇咩，只係覺得好開心。」我微微一笑講道，「同你一齊嘅時候。」

「係咩？」岑諾新聽到我咁講後輕輕一笑，「開心咪好。」

「你呢⋯？同我一齊，開唔開心⋯？」我好奇地問道，但又真係問到出口嘅時候莫名其妙地有啲唔自在，「唔開心嘅話，都可以講⋯」

「開心。」岑諾新嘅回答簡單而且直白

原來佢都覺得同我一齊嘅時候開心，咁樣實在太好啦⋯！



「我地慢慢行番去好唔好？」我問道

「好呀。」岑諾新點點頭

我同岑諾新離開商場沿路行番去，感覺呢一刻有啲美好，我地嘅手輕輕扣着，微風吹起，今日迎面吹嚟嘅風都變得柔和

我悄悄地望向岑諾新，今日係開心嘅一日呢～睇到我想睇嘅戲，同佢嘅關係好似又拉近咗少許

「咕～」我嘅肚發出肚餓嘅聲音，岑諾新望向我，我尷尬地微微耷低頭，臉頰同耳根都尷尬得發熱

「哈⋯你肚餓啦睇嚟。」岑諾新不禁一笑，「我地去食飯啦！」

啱啱佢臉上掛着嘅笑容，係我同佢一齊以嚟，佢笑得，最真摯嘅一次⋯






IG Link: https://www.instagram.com/nd_cotttoncandy/?hl=zh-tw