［愛情純愛］既然忘記唔到佢，不如試下中意我⋯？: 60. 不一樣的地方

我地行入一間食拉麵嘅餐廳，侍應招呼我地行去二人位坐低，一坐低岑諾新就拎出餐牌，將餐牌遞比我

「你睇下食咩先。」岑諾新將餐牌打開放低喺我面前

「嗯⋯」我仍然有啲尷尬，笑咗一笑之後耷低頭睇餐牌，「我睇完啦～」

我將餐牌倒轉放到岑諾新面前比佢睇餐牌，岑諾新睇完之後便叫咗侍應過嚟落單

喺等食期間，我耷低頭睇手機，順便po多個story：「A little bit hungry」，順手地@咗岑諾新



「你都唔係a little bit hungry啦掛。」岑諾新抬頭望住我，臉上掛着淡淡嘅笑容

「還好啦～」我笑一笑，然後定睛望住佢，「你今日笑得特別多⋯」

「有咩？」岑諾新似乎唔察覺，「開心掛。」

我又耷低頭睇手機，都係睇下有邊個po咗story，睇下邊個講啲咩有趣嘅事咁樣

「你之前咪話，你會儲起同佢出去時收到嘅單⋯」岑諾新忽然間提起同張景彥有關嘅事



「哦⋯係呀。」我點點頭，但嗰啲單我都掉晒啦喎⋯

「嗱。」岑諾新將佢嘅戲飛從銀包中拎出嚟遞比我，「由今日開始，儲我地嘅單同戲飛。」

「好呀～」我愕一愕然後微微一笑，接過佢手上嘅戲飛放入銀包

等多咗一陣之後，侍應拎住兩碗拉麵過嚟，將拉麵放到我地面前

「呀⋯」我望到喺叉燒面上放咗一堆蔥，我先記起我唔記得咗走蔥



「嗯？」岑諾新拎住筷子抬頭望我

「我唔記得咗叫走蔥⋯」我有啲無奈咁講，我都唔係唔食嘅，只係唔太中意陣味啫⋯

「你唔食嘅話夾過嚟。」岑諾新對我講道

我將喺叉燒面上嘅蔥一次過搬晒去岑諾新嘅碗中，我碗拉麵突然間乾淨咗好多

我悄然抬眼望向岑諾新，佢對我嘅一舉一動都好溫柔，明明私下係個總係面無表情、講嘢冷冷淡淡嘅人，但佢嘅舉動卻好溫柔細心，會唔會因為佢有個妹妹？做哥哥嘅係唔係都特別溫柔細心？

但平日同私下都笑着開朗嘅張景彥對我卻有種講唔出口嘅冷淡，唔係態度上，而係一舉一動間散發出嚟嘅感覺

「真係差得好遠⋯」我喺心裏細聲地講道

食完飯之後我同佢AA制埋單，然後又踏上回家嘅路，其實呢度距離屋企唔係真係咁遠，由戲院行番去屋企應該25分鐘左右



沿路上傾下計，講下嚟緊有咩功課交、有咩測驗之類，唔再係一開口就講起前任，好似開始變得似普通嘅情侶一樣

「前面呢，有間蛋糕店呀，聽講好好食⋯」我望到前面蛋糕店嘅招牌後假裝不為意提道，「你有冇興趣呀？」

「唔⋯有。」岑諾新猶疑咗一秒後點頭

我地行到去前面間蛋糕店，可以堂食，我同佢喺店嘅中間位置搵咗個位坐低，然後叫咗兩件蛋糕

「果然喜好狙擊好有用～」我喺心中默默地高興道，「好彩記得上次喺IG睇過人地推薦呢間店啫～」

店內嘅都係用小圓枱，我同佢之間嘅距離好近，我隻腳一郁嘅話就會踢到佢似的

等咗一陣之後女侍應拎住兩件蛋糕過嚟放低喺枱上，我喺食蛋糕前，當然要打一下卡啦～



我食咗一啖我叫嘅特濃芝士蛋糕，好香⋯！芝士嘅香味喺口中滲出嚟，我果然好中意食芝士蛋糕～

「好唔好食呀？」我問岑諾新，佢點點頭，專注地食放喺佢面前嘅朱古力蛋糕

「你試唔試？」岑諾新用叉切咗一細啖，然後將叉遞到我面前

我應該直接湊前開口食，定係接過叉再食⋯？

我輕輕抿唇，然後將上身前傾，直接食⋯感覺臉頰有啲熱⋯

「好食⋯」我腼腆地微微耷低頭，細聲地講道同時，抬眼望咗岑諾新一眼

佢若無其事地繼續食蛋糕，佢完全唔覺得尷尬或者怕羞一樣

「你試唔試我呢個呀？」我用叉切咗一啖出嚟放到叉上遞比岑諾新問道



岑諾新毫不猶疑地湊前一口咬住我嘅叉

「好食。」岑諾新語氣平淡地講道，但佢卻撇開了臉

「耳仔⋯」就喺佢撇開臉嘅一刻，我望到佢嘅耳根紅紅的，「原來都係會怕羞嘛～」

我望住佢罕有嘅害羞不禁笑咗一笑，咁樣嘅佢有啲可愛

我地喺蛋糕店食完飯後甜品之後又起行番屋企，我抬頭望向天空，天空變成深藍一片，仲掛住一個淡淡嘅月亮，睇嚟今晚可以望到月亮呢～

我將啱啱喺蛋糕店拎到嘅單摺好放入銀包，因為由今日開始要儲起同岑諾新出去時嘅單據同戲飛，同佢講好咗

沿路行着，感受住比平日柔和嘅微風迎面吹來，感覺一切比起平日更加唔真實



拖住手並肩而行，今次嘅感覺同以前有啲唔一樣，因為岑諾新嘅手更溫暖？因為微風特別柔和？定係因為其他原因？




IG Link: https://www.instagram.com/nd_cotttoncandy/?hl=zh-tw