［愛情純愛］既然忘記唔到佢，不如試下中意我⋯？: 61. 雙向付出

我都唔知道實際原因係咩⋯但感覺真係好唔一樣⋯

我地喺紅綠燈位前停低等待，喺我地嘅斜後方企咗一對情侶，但似乎個女仔悶悶不樂，個男仔有啲氣憤

「你次次都係咁有意思咩⋯」個男仔抱怨道，但個女仔一直都默不作聲，「得我一個人付出好挽？」

我回頭偷望咗一眼，眼見個女仔默默耷低頭，好似做咗虧心事一樣唔敢出聲，個男仔就好似已經忍耐到極點一樣，忍無可忍先開口抱怨

個男仔瞄咗企喺佢身旁嘅女仔一眼，見個女仔依舊唔出聲，眼神忽然間黯淡咗落嚟





「唔係雙向付出嘅感情，有咩意思？」個男仔淡淡地講道

呢個時候，綠燈亮起，男仔直接就向前走，就好似心灰意冷一樣，女仔呢一刻先抬起頭追上前

「雙向付出⋯」我喺心中細細聲地重複咗一次，悄悄地望向岑諾新，「呀⋯原來⋯」

原來唔同嘅地方，係「雙向付出」

的確，我同岑諾新之間係有名無實大於有名有實，但我地正係為咗中意對方而一同努力緊；但以前，只有我一個人在意我同張景彥之間嘅感情，只有我一個人興奮





就算未有感情，但我都可以察覺到我同岑諾新係為同一件事而努力緊；但就算張景彥對我點溫柔都好，我都感覺到佢心底裏對我嘅冰冷同疏離⋯

再多嘅甜言蜜語，都冇辦法掩蓋佢心中嘅冷淡

「感情事，要雙向先有意義⋯」我喺心中默默地講道，原來一直感覺到嘅「唔一樣」就係唔一樣喺呢度，「嗯？」

岑諾新忽然間用力地握咗我隻手一下，我抬頭望向佢嘅時候，佢正望住我

「做咩呀？」我問道





「冇⋯」岑諾新搖頭，「冇咩。」

我下意識望一望周圍，唔通佢啱啱見到孫慧伶？但我又見唔到佢喎⋯

我望住岑諾新，佢冷淡，但至少我感覺到佢都有努力付出緊⋯所以佢同張景彥先會唔一樣

「蔣倩盈。」岑諾新忽然叫咗我一聲，「你會唔會覺得我好冷淡？」

岑諾新忽然間再人認真咁問我，我一時之間唔知道要比咩反應先好

「還好啦，初時都會唔習慣，但宜家都冇特別覺得點。」我講出我到宜家為止對佢嘅想法，「突然間咁問嘅？」

「冇，只係想知道⋯」岑諾新講咗頭半句就冇再講落去，到底呢一句嘅後面係啲咩

「都幾好呀～見到真實嘅你～」我微笑道，岑諾新聽到我咁講嘅同時有啲愕然





「咁樣好咩？你唔會覺得我好假咩？」岑諾新收起愕然嘅表情問道

「唔會呀～你就係你嘛～」我微笑着表達我真實嘅想法，「而且你比我睇你最真實嘅一面，唔係代表我係一個值得你信任嘅人咩？」

岑諾新冇表露出任何感情同反應，有時我的確睇唔透佢嘅想法，因為佢會刻意隱藏自己嘅真實感受

「嗯⋯」岑諾新微微耷低頭，臉上掛上淡淡嘅笑容，佢總係咁樣，所以我先睇唔透佢，「你當然值得信任。」

「除咗屋企人同我之外，邊個知你私下係咁冷淡？」我對呢個問題已經好奇咗好耐

「楊朗然。」岑諾新回答

「孫慧伶呢？」我追問道，「佢冇理由唔知呀～」





「佢唔知，應該話我唔會對佢咁冷淡。」岑諾新嘅回答令我覺得有啲意外，「唔想比佢睇到我唔好嘅一面。」

「但係佢同你一齊，唔係應該要接受真實嘅你咩？你係你呀～唔係唔好嘅一面，而係呢個先係真正嘅你呀⋯」我反駁道

「因為中意，所以先想比最好嗰一面佢睇。」岑諾新講道

「好同壞嘅一面都睇到先係好事呀～」我又反駁道，「而且我覺得無論係邊一面嘅你都好，你就係你，睇到真實嘅你先係一件好事，雖然一開始我以為我係唔係做咗啲咩被討厭嘅事⋯」

「冇討厭，只係直覺覺得你係信得過。」岑諾新講道，「你接受唔到嘅話我都唔會抱怨。」

「我冇所謂啦⋯反正我地都唔係因為中意而一齊啦⋯」我望住岑諾新無奈地笑了笑，岑諾新定睛地望住我，我莫名其妙地有啲心虛，「我講緊之前啦，我宜家努力緊啦⋯」

「我都冇講啲咩，你做咩心虛？」岑諾新問道

「我邊有！」我撇開臉





「你接唔到嘅話都可以走，喺我未真係中意你之前。」岑諾新一臉淡定咁講道

「我又冇話我接受唔到，都慣咗啦⋯」我無奈地講道

佢停低咗喺原地，我行到佢嘅面前，因為我已經番到屋企樓下

「你真係唔走？」岑諾新又問我一次，然後一臉認真地對我講道，「到我真係中意咗你嘅時候，你就好難走。」

「唔走呀，我唔會半途而廢，講好咗要試下中意你，我就真係會試下。」我笑了笑講道，都唔知佢係講笑定講真，「定係你想我宜家走？」




IG Link: https://www.instagram.com/nd_cotttoncandy/?hl=zh-tw