「算啦~」我心情愉快地講道,然後將戲飛放番入盒中,「由佢~」

我將個盒放番喺原位,一下子灘到床上

「好想快啲到聽日⋯」我攬住放喺一旁嘅攬枕,細細聲地喃喃自語道,「點解時間突然間過得咁慢⋯?」

以前嘅我都試過有呢個想法,但我知道佢地唔一樣

有種感覺喺心底裏慢慢咁滲出嚟,係似層相識嘅感覺⋯



呢個感覺,係唔係屬於戀愛嘅甜度⋯?



「我出門口啦!」我匆忙地著上皮鞋然後出門口,「遲到啦遲到啦!」

我望一望時間,我比平時仲要遲咗10分鐘出門口,點算呀點算呀⋯!

我會唔會遲到,會唔會累埋岑諾新遲到?點算點算?



我跑出大堂向巴士站快步跑去,跑到去巴士站前嘅紅綠燈位時,突然間轉咗紅燈,我頓時剎掣急停落嚟,唔急停嘅話真係衝出去馬路

今日比平時都特別大風,行嘅時候條裙都好似就吹起一樣,搞到我要一邊㩒住條裙一邊小跑起嚟

「快啲轉燈啦⋯」我喺心中焦急地講道,「轉燈轉燈⋯」

「喂。」忽然有人企喺我隔離同時拍咗我一下,「早晨。」

我抬頭望過去,見到岑諾新企喺我隔離打緊喊露



「早晨⋯點解你仲喺度嘅?」我第一時間就係問呢樣嘢,焦急地問道,「你遲咗出門口呀?要遲到啦!」

「冇,我同平時同一個時間出門口。」岑諾新淡定地講道,同慌張嘅我形成咗一個強烈嘅對比

「要遲到啦!快啲跑去巴士站⋯!」我一下子提手捉住佢嘅手臂

「吓?遲到?」岑諾新一臉疑惑咁望住我,我比佢更加疑惑咁望番住佢,「遲咩到?宜家先20分。」

「2、20分!?」我錯愕地望住佢,然後拎手機出嚟確認時間,手機嘅螢幕上顯示宜家嘅時間係07:20

「你係唔係未瞓醒?」岑諾新平淡嘅語氣中夾雜咗一份無奈

「呀⋯我仲以為我出門口嘅時候係7點25分⋯」我無奈地將手機收番入裙袋中,「我明明仲望一望鐘先出門口,唔通我將7點15分睇咗做7點30分⋯?」

「你係唔係發燒⋯?」岑諾新問我,佢將手放到我嘅額頭上



我比佢突如其來嘅舉動嚇咗一下,我冇迴避,只係⋯心臟緊縮咗一下⋯

「綠燈,行啦。」岑諾新就好似冇特別覺得點一樣,自然地拉起我嘅手就行

我嘅臉頰,有啲熱⋯

我地同平時一樣,喺差唔多嘅時間番到去學校

我企喺自己位,將書包放喺枱面拎出功課file同筆袋放入櫃桶

「今日天陰陰呀⋯」我望住出面灰灰嘅天空,細聲地講道,「唔知會唔會落雨呢⋯」

我打開書包望去入面,我今日,冇帶遮⋯



今朝早因為以為自己要遲到,又怕會累埋岑諾新一齊遲,所以我連天氣報告都冇時間睇就匆匆忙忙咁出咗門口⋯

「希望今日放學嗰陣唔好落雨⋯」我喺心裏祈求,「唔知岑諾新有冇帶遮⋯」

我將書包勾番喺枱邊,然後行去開緊locker嘅岑諾新旁邊

「你有冇帶遮?」我直接問道,連開場白都唔講,「今日天陰陰,可能會落雨⋯但我冇帶⋯」

「我有。」岑諾新望向我講道,然後閂上locker門望向外面嘅天空,「應該唔會落雨,晏就落咗就冇。」



放學

外面嘅雨由最尾兩堂開始一直都冇停過,仲愈嚟愈大⋯



「點算⋯我冇帶遮⋯」我一臉無助咁望住岑諾新

「都要番屋企⋯」岑諾新拎出縮骨遮,孭起書包,「唔通等佢停雨?」

我同岑諾新最後都係揀咗踏出校門番屋企,一踏出校門我已經預感我番到屋企時已經變咗落湯雞⋯

今日又大風又大雨,密密麻麻嘅雨水落到地面後仲要反彈番上嚟,先行咗一半,我隻腳都濕咗一半

我地快步行去巴士站,一行到去巴士就嚟到

「企樓下。」岑諾新對我講道

我先上車,拍卡後行到平時番學嗰陣我地企開嘅位,我條裙已經濕咗一大半,襪同鞋都已經濕晒,鞋面已經濕到睇唔到水珠



「好彩我將書包孭咗喺前面⋯」我望住只係濕咗4成嘅書包,書包同我簡直係一個對比嚟




IG Link: https://www.instagram.com/nd_cotttoncandy/?hl=zh-tw