［愛情純愛］既然忘記唔到佢，不如試下中意我⋯？: 64. 討厭雨天⋯

岑諾新手上拎住滴緊水嘅縮骨遮行到過嚟，佢濕咗半個人，髮尾有一顆顆水珠

「番到去要沖涼⋯」岑諾新講道，佢用手撥撥頭髮

「我條裙濕晒啦都⋯」我無奈地講道

我望住濕咗半個人嘅岑諾新，啱啱佢一直將把遮向我呢邊傾，雖然我都濕咗大半條裙⋯

雨勢冇收細嘅打算，雨愈落愈密⋯



岑諾新送到我番屋企樓下，今日唔攬啦，成個人都濕晒啦⋯再攬嘅話校服會痴住個身

「拎定鎖匙先⋯」我等緊升降機落嚟嘅時候講道

我伸手入裙袋摸咗兩摸，裙袋中淨係得手機；我打開書包拉鏈，伸手入平時有機會放鎖匙嘅暗格中摸咗兩摸

「鎖匙呢？」我邊喃喃自語邊用手喺書包中摸索，「我今日出門口嘅時候明明⋯」

我今日出門口嘅時候冇拎到鎖匙就出咗門口！鎖匙仲放咗喺鞋櫃面呀⋯？



「我冇鎖匙點番屋企呀⋯！」我企喺大堂自言自語，「打比媽媽⋯！」

等陣⋯打比媽媽有咩用？我都冇帶遮，去唔到佢公司搵佢⋯！

「呀～點算呀⋯！」我心裏感覺到絕望，重點係我手上冇遮，邊度都去唔到，「有邊個可以救我呀⋯！」

岑諾新⋯！岑諾新去到邊⋯！

「佢未行遠掛！」我即刻跑出去，但已經見唔到岑諾新跑身影，「佢有冇行得咁快呀⋯！？」



我沿住大堂外面嘅簷蓬小跑起嚟，但我跑到去簷蓬跑盡頭時都見唔到岑諾新

我拎出電話抱住博一鋪嘅心態打比岑諾新

「嘟嘟⋯嘟嘟⋯嘟嘟⋯」電話裏一直傳出嘅嘟嘟聲令我嘅內心好不安

佢會唔會唔聽電話？畢竟落住咁大嘅雨，佢聽嘅話應該係奇蹟嚟

「嘟嘟⋯嘟嘟⋯嘟，咔！」「喂？」

「岑諾新你去到邊呀？」我一聽到電話通咗之後，心裏有啲激動，佢真係聽咗電話！

「啱啱到屋苑範圍外。」岑諾新講道

「我冇帶鎖匙呀⋯！」我尷尬地對佢講道



電話裏頭嘅人頓時靜咗，只剩下沙沙作響嘅雨聲；過咗三秒之後，岑諾新開口道：「我番嚟搵你。」

電話咔一聲收咗線，我企喺簷蓬下抬頭望住雨水灑落，今日我真係⋯發生咗咩事？一大清早睇錯時間，然後冇睇最重要嘅天氣預報，最後連最最最最重要嘅鎖匙都冇拎就出門口

「我今日好大頭蝦呀⋯」我埋怨自己道，將書包孭番去背後，「如果有帶縮骨遮都好呀⋯」

雨水一絲一絲落下，企喺簷蓬下冇被雨水淋到，但會比喺地上反彈嘅水彈到

我，唔中意落雨⋯會令人心情好煩躁，所有唔好嘅事都會喺雨天來臨，我討厭雨天⋯

所以唔好嘅事都會降臨，分手、離別、不幸⋯一切一切都會喺雨天嚟到⋯我討厭冇陽光嘅日子，討厭冰冷嘅日子⋯我，討厭雨天⋯

「倩盈，對唔住⋯」



嘖⋯點解又諗起佢？好討厭⋯

「蔣倩盈。」

有人叫咗我一聲，我朝住聲音嘅方向望去，岑諾新已經番到嚟我地分別嘅地方

我走向佢，一下子就將額頭靠喺佢嘅膊頭上

岑諾新嘅手放喺我嘅後腦勺上輕輕地拍咗兩下，然後垂低手將我嘅手拉起

「行啦。」岑諾新拉咗我一下，我將書包孭番喺前面，然後行喺佢嘅身旁

「我地去邊？」我問道

「去我度。」岑諾新望一望我然後講道



就係咁樣，我跟咗佢番屋企，第一次⋯去佢屋企

「哈啾⋯！」我企喺門口時打咗兩個噴嚏

岑諾新喺鐵閘前除鞋然後行入屋，我跟喺佢嘅身後，先除鞋再拎鞋入屋

「哈啾⋯！」我又再打多噴嚏，岑諾新回頭望我，我有啲唔好意思咁微微耷低頭

「你對鞋比我。」岑諾新對我講道，將我對鞋從我手上拎走，「你隨便坐啦⋯」

岑諾新行咗去廚房嗰邊，我行前咗兩步，咁樣一望先發現，佢屋企都算大，可能因為係四個人嘅關係

「你仲企喺度做咩？」岑諾新喺廚房行出嚟，見到我仲企咗喺門前，輕皺起眉頭



「我條裙濕⋯」我有啲尷尬地講道，同時輕輕拎起裙揚一揚，避免條裙貼住我，「我可唔可以去一去廁所？」

「嗯。」岑諾新點頭

我行去廁所嘅方向，因為公屋嘅格局一睇就可以知邊度係廁所廚房，所以都唔洗點估

「條裙濕晒果然好麻煩⋯」我企喺洗手盆前，「好唔舒服⋯連裇衫都濕咗⋯」

我輕輕揚起條裙，好唔舒服⋯裇衫貼住我個身⋯

「唉，算啦⋯」我將髮繩拆開，一直綁住嘅話頭髮會好難乾

我打開廁所門打算出番去，豈料一打開門，就見到岑諾新企咗喺門前，手上拎住件T-shirt




IG Link: https://www.instagram.com/nd_cotttoncandy/?hl=zh-tw