［愛情純愛］既然忘記唔到佢，不如試下中意我⋯？: 71. 真的生氣了？

「你嬲呀？嬲我晏就睇靚仔呀？」我雙手捉住岑諾新嘅手，一臉無辜地講道，「我冇心㗎～雖然真係好好睇⋯但我都冇話佢靚仔過你，唔好聽佢地亂講嘛～」

岑諾新望咗我一眼，然後搖搖頭

「喂！」我鬆開佢嘅手行到佢面前停低，面向住佢企

「做咩？」岑諾新開口，淡淡地問咗我一句

我企喺佢面前定睛望住佢，岑諾新一臉疑惑咁望住我，我朝佢行近咗一步，湊前咗少少定睛望住佢



「到底做咩？」岑諾新一臉疑惑地問道

「望你多啲嘛～所以唔好嬲我啦～」我朝岑諾新撒嬌着講道，雙手捉住佢嘅手，我微笑着然後側着頭望住佢

「冇嬲呀⋯」岑諾新伸手捏住我嘅臉頰，但兩秒後又鬆咗手，「只係有啲攰⋯」

「真係？」我半信半疑地望住佢，「冇因為我睇靚仔而嬲？」

「嗯，冇嬲。」岑諾新微微點頭



「點解呀？」我不解地追問嘅同時，岑諾新行到我身旁自然地拉起我嘅手就行，「點解唔嬲呀？」

「因為真係冇嬲嘅必要，之前你都當住我面望咗張景彥三個月。」岑諾新淡然地講道同時微微聳肩

「咁點同呀！之前我地都未、未話要中意對方⋯」我即刻反駁佢，「所以唔一樣㗎⋯」

岑諾新望咗我一眼，然後嘴角微微上揚笑咗一笑；我側着頭望佢，佢話唔嬲，但我心裏有啲希望佢會嬲我⋯

「冇嬲。」岑諾新降低咗聲量，但係我可以聽得清楚嘅程度對我講道



「以後⋯要嬲呀⋯」我微微耷低頭，手輕輕地握緊咗佢嘅手一下

「嗯。」岑諾新柔聲地嗯咗一聲回答我

又番到屋企樓下啦，如果可以見佢耐啲嘅話⋯

「攬一下⋯」我開口講嘅同時，岑諾新已經拉咗我一下，將我拉到佢嘅懷中

佢身上嘅氣味，令人好安心⋯如果冇孫慧伶同張景彥，我係唔係就唔會發現同岑諾新之間嘅可能性？

冇張景彥同我分手，冇張景彥同孫慧伶一齊嘅話，我同岑諾新或者會去到畢業嘅時候都只係同班同學

有時會覺得，孫慧伶放棄咗岑諾新真係走寶⋯多得佢同張景彥一齊，我先可以喺愛情路上遇到岑諾新

發現原來拍拖都係一件會令人怦然心動嘅事嚟⋯



「你唔打算放手？」岑諾新問我

「哦⋯」我微微一笑然後鬆開手

「仲以為你唔打算放手。」岑諾新微微一笑道

「我地又唔係唔會再見～」我笑笑口講道，然後指一指身後嘅大堂，「我番去啦～我地下星期番學再見啦～」

「好，拜拜。」岑諾新伸手摸摸我頭

我向後行咗兩步，然後先轉身走向大堂

⋯



夜晚

我坐喺書枱前做緊數學功課，係數簿嘅改正，因為新嘅數學題都已經做完

「做完⋯」我將原子筆嘅筆頭收番起然後放番入筆袋，將做好嘅數簿放番入去書包

我望咗一眼放喺枱頭嘅數字鐘，10點幾啦已經，今日係星期五，要等兩日先再番學⋯

自從決定咗要中意岑諾新之後，我地嘅關係慢慢變得愈嚟愈好，我愈嚟愈想見佢⋯一嚟到星期五就會覺得好矛盾⋯

雖然星期五放假好開心，但係連續兩日都見唔到岑諾新，心裏就會覺得有啲空盪盪⋯

我覺得我未到好中意佢嘅地步，但好感度確實幾高，100分係滿分嘅話，可能都已經有75分

「兩日⋯」我坐喺床邊然後向旁邊灘，「好漫長呀⋯唔知佢會唔會都想見我，同我一樣覺得兩日好漫長⋯」



如果岑諾新都係咁諗嘅話就好啦⋯兩個人之間，要雙向付出先有意思⋯

放喺手邊嘅手機震咗兩下，我拎起嚟望咗一眼，頓時坐咗起身

岑諾新：你星期日得唔得閒？

「得呀～」我頓時打道，但準備send出去嘅時候我猶疑咗一下，然後將message刪咗，又重新輸入：「？」

淨係覆佢一個問號，睇起嚟唔會搞到好似我好期待咁

岑諾新：出去行下？

岑諾新：如果唔得閒嘅話唔緊要



我又點會唔得閒？而且咁啱，我都覺得兩日太長，想見你⋯

「得閒呀～你想去邊？」我回覆問道

岑諾新：未諗好，再決定

岑諾新：又或者睇你想去邊




IG Link: https://www.instagram.com/nd_cotttoncandy/?hl=zh-tw