［愛情純愛］既然忘記唔到佢，不如試下中意我⋯？: 70. 你最好看

「Oh my⋯」我不禁驚嘆咗出嚟

「完全係犬系～」希童捉住詠妍嘅手講道

「連個樣都係小狼狗嘅樣⋯！」詠妍掩住嘴笑道，「唔係你中意嗰種呀李樂恩！」

「你地都恰我嘅！」樂恩扁起嘴講道，「你地個個都中意小狼狗type⋯！」

「因為真係好charm⋯！」我不禁講道，「魅力好強，攻擊力滿分！」



「呢度得你中意嗰種可可愛愛嘅男仔。」希童拍一拍樂恩嘅膊頭，「我地三個都係霸總黨。」

「嗯嗯！」我、詠妍同希童都用力地點頭表示極度讚同

「蔣倩盈⋯！」詠妍忽然間叫咗我一聲，然後朝我勾勾手指，我上身前傾湊過去，「你男友岑諾新係邊類型呀？」

我懷疑，詠妍佢係特登⋯佢咁樣一問，我即刻就靜咗落嚟

「做咩靜咗呀？」樂恩臉上帶着意味深長嘅笑容



「岑諾新一睇就知係霸總type啦～佢一啲都唔似小奶狗嗰種男仔。」希童細聲地講道

「你話呢？」詠妍輕輕地踢咗我一腳

「唔⋯我冇諗過喎⋯」我搖搖頭

我覺得，岑諾新其實，應該，算係小狼狗⋯直覺再加上佢同我講過嘅嘢⋯

「你面紅啦～」詠妍望住我笑道，然後將手機遞到我面前，「睇下呢個，係唔係好～有型？」



「係超型囉好唔好？超靚仔！完全係我中意嘅嗰一類。」我點頭講道，連嘴角都忍唔住上揚

「哦～咁你即係話佢靚仔過岑諾新啦～」樂恩同希童指住我

「我邊有—」「叫我？」

我嘅身後忽然傳嚟一把聲音，我即刻窒咗，佢地三個即刻進入咗食花生兼無中生有嘅狀態

「我地睇緊仔仔呀～」詠妍先開口，拎起手機遞到岑諾新嘅面前

「然後然後，倩盈話佢超型超靚仔～」樂恩接住講道，岑諾新望住手機嘅螢幕輕輕挑眉

「我—」「倩盈仲話佢靚仔過你～」

我想開口嘅時候希童即刻就開口打斷我，我回頭抬起頭望岑諾新，本來佢落喺手機螢幕上嘅視線轉移到我身上



「睇得好開心，面都紅晒。」岑諾新望住我講道

「冇⋯」我抿着唇忍住笑，緩緩地搖頭，「雖然真係幾好睇⋯」

我望向佢地三個，佢都三個同我一樣嘅反應忍住笑，詠妍仲要特登show多次張相比我睇

「你講咩？」岑諾新直盯着我問道

「冇講咩，我只係話雖然真係幾好睇，但都冇你咁好睇咋嘛～」我望住佢微笑着講道

「嘩～派晒狗糧咁想點呀～」坐喺我隔離嘅希童即刻抱怨道，「我唔要坐呢度呀～」

「聽住先⋯」岑諾新嘅嘴角微微上揚，「陣間又唔知睇邊個。」



「想講咩呀？」我聽出咗岑諾新嘅說話中嘅另一層意思，我笑咗一笑後講道，「除咗你仲可以睇邊個？」

「嘶⋯好肉麻呀你地⋯！」詠妍不禁講道，「救命呀⋯」

「新，去唔去小食部？仲有10分鐘。」楊朗然叫咗岑諾新一聲，指一指掛喺黑板旁邊嘅鐘

「哦，好呀。」岑諾新點一點頭，然後望一望我之後就朝住課室門口行去

我望住岑諾新嘅背影，佢嘅耳仔又變得紅紅的，佢咁樣有種反差萌，好可愛～

「咳咳⋯！」詠妍忽然咳咗兩聲，我回頭望向佢地，佢地一臉嫌棄咁望住我

「做咩？」我扮咩都唔知道咁問道

「放晒閃派晒狗糧咁想點？」樂恩扁起嘴，「笑我地呢啲單身狗啦係咪呀？」



「你地都係想睇我同佢放閃咋嘛～唔係咩？」我笑咗一笑，我早就睇穿佢地嘅意圖啦

「樂恩，陪我去廁所～」希童望一望時間後對樂恩講道

佢兩個去咗廁所之後，就只係得番我同詠妍兩個人，詠妍望住我喺度偷笑

「點呀⋯」我無奈地笑咗一笑，「又想點呀⋯」

詠妍搖搖頭，但我知佢一定又係想講關於岑諾新嘅事

不過我自己都覺得最近同岑諾新嘅關係進展唔錯呀～的確係一件好事嚟嘅～

⋯



「你做咩一直都唔出聲呀？」我望住岑諾新問道

放學之後我同佢好似平時一樣一齊走，但係岑諾新卻一直都冇同我講嘢

「喂喂～理下我嘛～」我嘅手放喺佢臉前晃兩晃，佢只係默默咁望咗我一眼，「岑諾新？嗨～理下我啦～」

岑諾新淡淡地望咗我一眼，但又唔出聲，佢由踏出學校門口嘅一刻開始就已經冇同我講過嘢，我地都落咗車行緊番屋企啦！




IG Link: https://www.instagram.com/nd_cotttoncandy/?hl=zh-tw