［愛情純愛］既然忘記唔到佢，不如試下中意我⋯？: 81. 小甜蜜

聽到接波嘅人大嗌一聲同時，我認到係楊朗然把聲，我望一望四周，原來我係最近佢嗰個⋯！弊啦⋯！

楊朗然回頭望一望我呢邊，佢毫不猶疑就大步跳三步行到我面前，佢打算將排球掉向我時，忽然望一望周圍

「岑諾新人呢⋯？」楊朗然喃喃自語地講道

「楊朗然你死啦！」食花生嘅男仔指住楊朗然講道，「揀錯人掉啦你！」

「岑諾新！」有個同我打對面企嘅男仔朝佢嘅左邊嗌道



楊朗然望向嗰個男仔望嘅方向，岑諾新同我企咗一個大斜線，楊朗然望住岑諾新笑咗一笑，岑諾新無言地笑咗一笑，然後耷低頭撥一撥頭髮

楊朗然朝我掉出排球，我一下子將排球接住，楊朗然無奈地拎番個波，然後行番出去做拋波嘅人，大家又行番出去，圍番一個似係圈嘅圈

「17！」楊朗然好快地拋起排球並喊道，大家聽到佢嗌數已經走定先

但17號好快就跑出嚟接住個波，見佢接咗個波，大家都停喺原地，但個波先啱啱掂到佢嘅手，佢就即刻又拋起個排球

「12！」我聽到佢嗌我，我即刻就飛快地跑起嚟，當我差兩步就跑到嘅時候，已經趕唔切啦⋯！



「啪！」「停！」

我執起個波同時即刻嗌道，睇下邊個距離我最近先～我一回頭，不禁笑咗出嚟，離我最近嘅人，係岑諾新，佢先離我四大步左右嘅距離

「你咁近嘅！？」我不禁笑問道，岑諾新只係輕輕一笑，但咩都冇講

「岑諾新你好過分呀！」男仔即刻就起哄，「護妻狂魔喔～」

聽到佢地咁講嘅我有啲害羞，下意識回頭望向岑諾新，朝佢扔出排球，佢冇避開，排球打中咗佢



「佢特登唔避嘅⋯？」我喺心中有答案

「哦～護妻狂魔喔～」班男仔捉住岑諾新講道，「想嫁比你呀岑諾新～」

「我唔係gay㗎！」岑諾新笑着將佢地推開，「唔好攬住我啦！」

我喺一旁睇到都忍唔住笑出嚟，男仔就係挽得放所以先搞到好搞笑

岑諾新望向我嘅同時，我剛好將視線落喺佢身上，喺視線對上嘅一瞬間，身體裏有股電流流過一樣⋯

⋯

「叮噹叮噹⋯叮噹叮噹～」

落堂嘅鐘聲響起，我地嘅PE堂之後就已經係放學嘅時間



我行到出去嘅時候見到岑諾新都喺男更衣室行出嚟

「一唔一齊食嘢？有啲餓。」岑諾新問我

「好呀～」我點點頭，上完體育堂之後果然好肚餓，要食嘢補充一下能量，「我都有啲餓⋯要補充一下能量⋯」

岑諾新忽然提手，手輕輕地放喺我嘅頭上

「我都要補充一下能量。」岑諾新自然地笑咗一笑

「講咩啦突然間？」我不禁一笑，臉頰都熱熱的

「我話要去食嘢補充能量。」岑諾新微微耷低頭笑咗一笑，「你諗多咗。」



「你勁啦～達標～」我轉移話題道，「我又要補跑圈。」

「男仔體能好啲，唔係得我一個男仔達標。」岑諾新講道，拎起枝水就飲咗啖，「楊朗然佢地都達標。」

「我講緊你啦～」我抬頭望住岑諾新，「讚你呢～」

「哦！」岑諾新聽到我咁講後先靜咗一秒，然後笑咗一笑，「多謝。」

喺我地行到去接待處附近時，孫慧伶從樓梯上行落嚟，張景彥小跑起嚟追上孫慧伶嘅腳步

孫慧伶見到行緊去學校門口嘅我地，離遠都可以見到佢嘅視線落喺我身上一秒後便落到岑諾新嘅身上，但佢好快撇開臉徑自地走，完全冇理過跟喺佢身後嘅張景彥

「嗌交啦⋯？」我喺心裏好奇道，「你都有今日啦張景彥⋯」

不過佢地可以因為啲咩嗌交？張景彥應該咩都遷就晒孫慧伶先啱，對於佢地嗌交嘅原因，有啲好奇



「我地食咩好？」我抬頭望向岑諾新問道，「我有啲想食麥當勞。」

「咁食麥當勞。」岑諾新微微點頭

搭車嘅時候岑諾新拎住手機睇，耷低頭一直睇住手機裏嘅內容

「做咩唔同我講嘢⋯」我望咗岑諾新一眼，喺心中略帶不滿地講道，「睇手機得啦⋯」

我偷偷地扁一扁嘴，然後撇開臉望向窗外

忽然間有嘢掃過我嘅手心，岑諾新提手，指尖輕掃過我嘅手然後將我隻手握住

岑諾新拖住我嘅手向佢自己嘅方向輕拉一下，我頓時向前行咗兩步到佢面前；佢嘅手反手打橫放到背後，感覺就好似我攬住佢一樣⋯



岑諾新仍然耷低頭睇手機冇望我，咦⋯？




IG Link: https://www.instagram.com/nd_cotttoncandy/?hl=zh-tw