［愛情純愛］既然忘記唔到佢，不如試下中意我⋯？: 82. 牽個手

佢忽然間鬆開咗我隻手，我以為佢要放開我唔拖，但佢鬆開我隻手之後，我感覺到佢嘅指縫位置掂到我嘅指尖，佢嘅手指沿住我嘅指縫向下扣，將我隻手緊緊地扣住

「做咩咁突然⋯！」我嘅心裏又緊張又害羞，感覺到自己嘅臉頰瞬間就滾燙起嚟

我抬眼望向岑諾新，佢就好似當冇事發生過一樣，同平時一樣面無表情、淡定地睇手機；但我嘅臉頰又紅又熱，因為我感覺到呢一刻嘅覺嘅臉頰一定好似蘋果咁紅

我輕輕地握住佢隻手，指腹貼喺佢嘅手背上

但過咗兩秒之後，岑諾新鬆開手，變番好似本來一樣咁拖我



「咩事呀⋯？」我滿腦都係問號，「突然間又鬆手⋯」

我將額頭靠喺佢嘅膊頭上，空着嘅左手搭喺佢嘅腰上捉住佢嘅裇衫，我完全唔想抬頭望佢

「過份⋯！」我喺心中害羞地大叫道，「佢仲一臉平靜係咩事呀⋯！」

我之前都⋯冇試過同張景彥好似啱啱咁拖手，心裏唔多唔少會有啲⋯緊張？呀！唔知呀！我淨係覺得好害羞咋

「岑諾新你出茅招嘅⋯！」我不禁細聲地着岑諾新抱怨道



「我有咩？」岑諾新平靜咁望住我問道

「有呀⋯！」我搭喺佢腰上嘅手移到佢嘅背上，然後輕輕地將佢攬住，「你出茅招⋯！」

「我冇出茅招。」岑諾新嘅嘴角微微上揚，「只係拖住你。」

岑諾新嘅手喺佢講嘅同時又一次好似啱啱一樣，用十指緊扣嘅方式將我隻手扣緊喺佢手中；今次我回握佢嘅手，同時將頭埋喺佢嘅頸窩中

我只係單純地唔想比佢見到我滿臉通紅嘅樣，所以先要耷低頭



岑諾新成日都有唔同嘅方法嚟撩我，有時我都會諗，佢係因為想我中意佢而撩我，定因為已經對我有好感而撩我？

我抬起頭，直勾勾地望住佢；岑諾新察覺到我嘅視線，佢嘅視線從手機嘅螢幕上移開落到我身上，同我對望着

佢表現得好輕鬆，一絲緊張嘅感覺都冇，對住我，佢根本唔會緊張掛⋯

「哼⋯」我細聲地哼一聲然後微微耷低頭，額頭靠喺佢嘅膊頭

「做咩？」佢問我

「冇嘢。」我搖頭，我先唔會話你知點解

我望向窗外，但喺車窗上我同佢嘅倒影吸引咗我嘅注意

「其實我同岑諾新，都幾襯呀⋯」我嘅心裏忽然間萌生呢種想法，「我亂諗啲咩呀⋯！」



我輕輕搖頭，令呢個想法喺自己嘅腦海中消失

⋯

「我今日要補課。」我企喺開緊locker嘅岑諾新嘅身旁，「如果你想番屋企先都可以。」

「嗯。」岑諾新簡單地嗯咗一聲，然後企起身將locker門閂上，「好呀。」

岑諾新拎起佢啱啱放低嘅水樽，然後呷咗一啖水，喺我身旁行過番埋位

放學之後我去咗補課，其他人都直接帶埋書包去補課，不過我就懶懶的，反正都要番課去開locker擺嘢，咁一次過啦，唔咩住書包行嚟行去咁麻煩

喺我放咗補課行到番去課室，喺經過我嘅班房望入去時，見到岑諾新托住腮側着頭



我邁步行入課室，經過黑板前行番自己位嘅時候，朝岑諾新望咗一眼

「咦⋯？」我見岑諾新合埋咗眼，不禁一笑，「睇嚟等到瞓着咗～」

我行番埋自己嘅座位之前，先輕手輕腳地行到去岑諾新嘅座位前，蹲低喺岑諾新嘅枱前偷偷地望住佢嘅睡顏

咁樣認真一睇，其實佢真係生得幾好睇⋯點解可以生得咁好睇？

「岑諾新⋯！」我幾乎係用氣音一樣朝講道

唔知點解我嘅目光自然地落喺佢嘅喉核上，記得今日佢抬頭飲水嘅時候，我見到佢嘅喉核一動一動的，有啲感興趣

我覺得男仔嘅喉核係好有魅力，唔好問我點解，我都唔知點解

我定睛地望住佢嘅喉核，又不忘望一眼岑諾新



我不禁悄悄伸手，輕輕地掂咗佢嘅喉核一下，豈料佢頓時就醒過嚟，抬眼望住我，佢伸手捉住我嘅手腕同時不禁吞口水

「⋯！」我見到佢嘅喉核郁咗一下

岑諾新仍然捉住我隻手，我望住佢，手輕輕一縮，冇再掂住佢嘅喉核

「岑諾新，你放手未⋯？」我為打破沉默先開口講道

岑諾新企起身，但仍然冇鬆手，卻用力地將我向佢嗰邊拉咗一下，我向前跌咗一步，微微踮起了腳尖，左手輕輕地㩒住枱面

「你、你做咩⋯？」我比岑諾新拉到去一個好近嘅距離同佢對視着

「你知唔知，亂摸男仔嘅喉核，好危險㗎⋯？」佢湊近我嘅耳邊，壓低聲線喺我嘅耳邊講道






IG Link: https://www.instagram.com/nd_cotttoncandy/?hl=zh-tw