喺我拉開門,要邁步行入去大堂前一刻,我回頭望向岑諾新,岑諾新依舊企喺原地等到我入咗去先再走;我朝佢揮一揮手,然後行入大堂

我拎出手機,手機螢幕上有佢啱啱@我而出現嘅message

「我仲以為佢唔記得咗添⋯」我望住手機螢幕喺心中喃喃自語道

我默默地將佢嘅story repost到自己嘅story中,再補上一句caption:「唔好整唔見」

我打開我同佢嘅對話框,然後主動地send咗個message比佢:「好好收起佢,好珍貴㗎最後一個髮圈!」



岑諾新:知啦,唔會整唔見



「你連你日日戴住喺手嘅髮圈都比埋佢呀~知道要宣示主權啦~」詠妍企喺我身旁對我講道

「係佢話想要我嘅髮圈,我先割愛比佢咋~」我沒好氣地笑了笑,「不過,唔知佢有冇戴住喺手呢今日⋯」

「你呀~咁快就比佢迷住咗啦?」詠妍無奈地輕皺起眉頭對我講道,「先講咗決定要試下幾耐呀?」



「我冇比佢迷住⋯」我無奈地笑,但對住詠妍,我可以講心底話,我細聲地對佢講道:「只係同佢一齊嘅時候,感覺好新鮮?可唔可以咁講呢⋯總之就係好唔一樣嘅感覺,但係好開心,有種甜甜嘅戀愛feel。」

「哎喲哎喲~」詠妍擺出一副花生友嘅模樣對我笑了笑,「放心啦!我絕對支持你!」

我同詠妍踏入課室,我好快地就見到岑諾新企咗喺locker前將書先疊好再放入locker

我拉住詠妍陪我一齊去locker嗰邊,我行到岑諾新嘅右手邊站着,岑諾新見到我便望咗我一眼,我同佢之間仲有少少空位

「呀⋯!」詠妍忽然間推咗我一下,我成個人向前跌咗一步,直接撞上岑諾新



岑諾新嘅反應好快,直接伸手捉住我嘅手肘扶住我,我嘅左手比佢扶住,右手卻輕輕地攬住咗佢

「你做咩事?」岑諾新望住我問道

「我冇心㗎⋯!」我連忙解釋道,「詠妍推咗我一下囉⋯」

「吓?我冇呀~」詠妍頓時扮唔知搖頭,「你自己想攬人就唔好屈我啦~」

「我、我邊有呀!」我頓時害羞又慌張地轉身望向詠妍,輕輕地打咗詠妍嘅手一下,「余詠妍你真係呀⋯!」

「岑諾新笑你啦~」詠妍指一指岑諾新

我回頭望向岑諾新時見到佢嘅嘴角微微上揚,佢伸手將locker嘅門閂上,喺locker嘅櫃面上疊好拎咗出嚟嘅嘢

「哼⋯」我伸手捉住岑諾新嘅手腕,岑諾新一臉疑惑地望住我,「髮圈,你今日冇戴呀?」



「喺度。」岑諾新拉起衫袖比我睇,髮圈就套咗喺佢嘅手腕上,「有戴。」

「嘻⋯」我心裏甜甜的,總覺得臉上掛住嘅笑容都特別甜,「又真係有戴住喎~」

「你平時番學都日日戴住。」岑諾新將衫袖拉番好,拎起佢喺locker拎出嚟嘅書同file

「你兩個考慮下我嘅感受好喎⋯」詠妍企到我身旁挽住我嘅手臂,「洗唔洗一直掉晒閃彈,餵我食晒狗糧咁呀⋯」

「我又冇特登要餵你食嘅~」我望住詠妍講道,然後用眼神再對詠妍「講」道:「邊、個、叫、你、啱、啱、推、我?」

「閃死人啦~」詠妍故意再多講一句,「都冇考慮下其他人嘅感受嘅~」

「我有考慮你呀~」我對詠妍講道,「你唔覺咩?」



「邊度考慮我啦?仲放晒閃咁⋯」詠妍翹埋雙手,微微鼓起兩泡腮講道,「有異性冇人性咪講緊你⋯!哼!」

「我邊有呀?我都有同你一齊食飯呀~」我伸手拉住詠妍嘅手

「咁你今日係唔係同我食飯呀?」詠妍頓時當住岑諾新嘅面問道

我下意識回頭望一望岑諾新,岑諾新冇出聲,詠妍望一望岑諾新之後又望一望我

「唉~都知你㗎啦~心淡呀~」詠妍嘆一口氣同時搖搖頭,「宜家要男朋友得啦,唔洗要我啦!」

「我聽日咪同你食飯囉!」我無奈地笑了笑

「我番埋位先。」岑諾新講嘅同時從我嘅身旁經過,我抬頭望向岑諾新,見到佢臉上掛着淡淡嘅笑容,佢順手地伸手摸摸我頭然後先行番埋位

「哦~」詠妍掩着嘴,完全忍唔住笑意,直接邊笑邊望向我,「你兩個嘅感情好似愈嚟愈好啵~」



「進展中,進展中⋯」我細聲地對詠妍講道

「你睇你呀,視線都冇離開過佢。」詠妍湊近我講道,同我一齊望向岑諾新嘅方向,「喺我面前終於承認佢係男朋友啦?」

「吓⋯?我幾時⋯」我愕然地望向詠妍,我諗起啱啱詠妍話我要男朋友就得,「咁我都冇否認嘅必要⋯」




IG Link: https://www.instagram.com/nd_cotttoncandy/?hl=zh-tw