［愛情純愛］既然忘記唔到佢，不如試下中意我⋯？: 84. 髮圈

「再買。」岑諾新毫不猶疑地講道，「冇咗嘅話。」

「咁又唔洗～」我笑咗一笑，然後將戴喺手上嘅髮圈除咗落嚟，「唔好整唔見⋯」

「好呀。」岑諾新接過髮圈後自然地將髮圈套到手上，望住佢將我嘅髮圈戴到手上嘅一刻，我嘅心臟緊緊地收縮咗一下，「宜家著住長袖冷衫，唔怕比人捉。」

「唔驚比人睇到呀？比你啲兄弟呀～Ex呀～咁樣～」我下意識追問道，明明佢揀咗要我嘅髮圈

「點解要驚？」岑諾新輕輕一笑，「我地光明正大咁一齊，又唔係出軌，又唔係唔見得光。」



「好似好有道理～」我微微點頭，「不過咁樣戴住喺手唔會唔習慣咩？仲要戴喺右手，唔怕寫字嗰陣唔舒服？」

「唔會。」岑諾新搖頭，「唔會阻到我。」

「咦咦～你宜家手上面戴咗我嘅髮圈，如果見唔到我嘅話，咪可以睹物思人囉～」我開玩笑地講道

「你咁樣講唔會尷尬？」岑諾新拉一拉衫袖，然後望向我，「預計我會掛住你？」

「我、我話你會記起我之類，冇話掛住⋯」我不自在地摸一下自己嘅手腕，耷低頭偷偷揚起嘴角，「不過，如果你掛住我嘅話，我都唔介意嘅～」



我偷瞄岑諾新一眼，見到佢嘴角上揚偷笑

我同岑諾新落咗車，然後沿路行番屋企，我眼尾留意到佢總係下意識將右邊衫袖向上推一下，每行兩步就整一整衫袖

「你唔慣戴嘢喺手呢～」我微微一笑，抬頭望向佢問道，「戴左手會唔會好啲？唔係成日都用到左手。」

「戴右手就得。」岑諾新調整一下髮圈嘅位置後將衫袖拉番好，「而且右手係慣用手。」

岑諾新講嘅時候望住我，臉上掛上淡淡嘅笑容



「但右手係慣用手同我嘅髮圈有咩關係？」我疑惑地問道，「會習慣啲㗎咩？」

「你估下。」岑諾新講道

「咁我係唔係應該要行喺你嘅右邊好啲？」我將疑惑收起，然後繞過佢嘅背後行到佢嘅右手邊

「你行番喺我嘅左邊就得。」岑諾新用左手捉住我左手嘅手肘，將我拉番去佢嘅左手邊，「我慣咗你行喺我左邊。」

「我行邊一邊有分別㗎咩～」我笑咗一笑，伸手拖住佢嘅手，「左邊同右邊咪一樣～」

「你想知有咩分別？」岑諾新輕輕一笑講道，一聽到佢咁講，我就知佢又想講啲咩嘢嚟撩我，「你到啦。」

我抬頭一望，原來番到嚟屋企啦已經，好彩佢冇講比我知有咩分別，我嘅心會受不了

「我番去啦～我地聽日見啦～」我探頭望向岑諾新對佢講道



我對佢揮揮手，然後打算同平日一樣走向大堂，但喺我行咗一步後，岑諾新忽然間一下子捉住我將我拉番去

我望向岑諾新，佢咩都冇講，只係捉住我隻手，默默地望住我；我定睛望住岑諾新，心裏有啲疑惑

「拉住我做咩呀？唔捨得我番去？」我調皮地問道，心中嘅小惡魔叫我瓔捉弄佢一下

岑諾新笑咗一笑，推起右手嘅衫袖，套喺佢手腕上嘅髮圈露咗出嚟；我望住佢嘅舉動，心裏都係唔太明白佢想點樣，直至佢拎咗手機出嚟，我望住佢打開IG

「你咁樣算唔算係話比人聽你名草有主？」我耷低頭望咗佢嘅手機螢幕一眼後抬頭望住佢問道，「冇人追㗎啦喎～」

「冇咪冇。」岑諾新無奈地講道，我望住佢打我名@我，「我冇期待過要有人追。」

「哦～」我抬眼望住佢點點頭，輕輕咬住牙肉忍一忍笑



「你又想講咩？」岑諾新將手機收番入褲袋後問我

「我冇想講啲咩呀～」我搖搖頭，「嘻嘻～」

「你可唔可以有一日唔提佢？」岑諾新嘅無奈喺佢眼神中滲出嚟，毫不猶疑地伸手捏住我嘅臉頰，「日日都提住佢，好想我掛住佢？」

「我冇呀～」我朝佢行近一步，手搭喺佢嘅腰上輕放着，微微抬起頭望住佢，「我點會想你掛住佢呢～」

「係？」岑諾新輕輕一笑，「你要番去啦，已經6點幾，晏。」

「都⋯唔係好晏啫～」我微微一笑講道

「你仲要攬住我？」岑諾新忽然間講道，雙手捉住我嘅手，「你唔驚比人見到？」

我聽到岑諾新咁樣一講後便緩緩地鬆開手，我抬眼望向岑諾新，佢默默地望住我冇出聲



佢原來仲記住嗰日嘅事⋯佢咁樣問我，大概係因為上次撞到我媽，我否認咗佢係我男朋友嘅事，佢怕呢個鐘數又會撞到我媽，所以先咁樣講

佢係為我著想先咁問，但見佢咁問，我嘅心裏又有啲過意唔去⋯但宣家呢一刻，我覺得仲未係時候話比我媽媽聽我拍緊拖嘅事

「咁⋯我⋯」我回頭望一望，指向大堂門口，「我番去啦，我地聽日見啦⋯」

「嗯，拜拜。」岑諾新微微點頭，我轉身朝大堂門口走去




IG Link: https://www.instagram.com/nd_cotttoncandy/?hl=zh-tw