我連忙跟喺岑諾新嘅身後,跟上佢嘅步伐,喺上番去我地嗰層嘅時候,岑諾新停下腳步,跟上佢嘅步伐行到佢身旁嘅我見佢停落嚟都一同停落嚟

「呀⋯做咩呀?」岑諾新提手,將手托喺我下巴掐住我兩邊臉頰,「我真係唔知佢拎住嗰杯係熱水嚟,個蓋又冇蓋實⋯佢燙到我都唔想㗎⋯!」

「你中意佢咩?開口埋口都提住佢。」岑諾新望住我,緩緩開口講道,「而且,我好似冇問過佢有冇整親。」

「我講定先咋嘛⋯」我講道,岑諾新鬆開手,我輕輕抿唇後抬眼望佢,「怕你心思思會擔心嘛~」

「我冇擔心佢。」岑諾新繼續向前行,「我又唔係你。」



「關、關我咩事呀?」我不禁笑起嚟,連忙跟上佢嘅步伐行到佢嘅身旁,「我提都冇提佢⋯!」

我番到課室後即刻行番去詠妍佢地嗰邊,畢竟我真係好肚餓嘛~

「食飯食飯~好肚餓呀!」我打開飯盒,佢地都一同打開飯盒,「終於可以食嘢啦~」

「你隻手番去要搽嘢呀,如果唔係好耐都唔好。」樂恩一臉擔心咁望住我講道

「嗯,我會呀~但都係有啲痛。」我望一望自己隻手,然後拎起叉,「不過我諗應該Okay嘅~」



我回頭望向岑諾新嘅方向,佢同楊朗然一齊食飯,楊朗然忽然間回頭望向我呢邊,佢嘅視線落喺我度,剛好同我對上視線

「佢兩個講緊啲咩呢?唔會係講緊我掛⋯」我默默地坐番好繼續食飯,「算啦算啦,唔理。」

X⋯X⋯X

「啱啱到底發生咩事?」楊朗然一臉好奇咁問道,「嘖,最衰我啱啱去咗買飯啦~」

「咪咁八卦啦⋯」我無奈地講道,「同埋你望夠未?」



「我先望咗蔣倩盈一眼咋喎⋯你幾時咁護妻㗎?」楊朗然無奈地收回視線望住我

「你咁樣望過去,驚佢唔知你講緊佢?」我隨便地講咗個原因

「咁所以啱啱發生咩事呀?」楊朗然又問同一個問題,「聽其他人講,好似話佢兩個都受咗傷~邊個出手先㗎?你個Ex定現任呀?」

「我點知。」我淡然地講道,「我又冇睇到。」

「你唔洗去關心下佢咩?」楊朗然一副立心不良嘅表情,「你女朋友喎~」

「你又知我冇去關心佢?」我反問道

「嘖嘖⋯你呢個冷淡嘅人,對世事都唔在乎咁,又點會主動關心佢呀~」楊朗然拍咗我膊頭兩下,「做兄弟嘅了解你嘅,你怕醜唔緊要,我幫你去關心佢。」

「吓?」我望住楊朗然好快咁企起身,急步行去余詠妍嘅座位,「喂!楊朗然!」



想八卦一下啱啱發生咩事先係楊朗然嘅目的,我連忙起身朝楊朗然行去

「蔣倩盈你隻手點呀?」我都未行副過去,楊朗然就開口問咗,「岑諾新怕醜,叫我代佢過嚟關心一下~」

「你又喺度亂講啲咩呀?」我行到楊朗然嘅身旁,一下子拍佢嘅膊頭,「係你自己八卦想知啱啱發生咩事,唔好擺我出嚟。」

「咁、咁大家一場同學,關心下都得掛?」楊朗然望住我笑一笑講道,然後又望向蔣倩盈,我同蔣倩盈對望咗一眼,「你隻手點呀?」

「冇咩事呀~沖咗水好好多啦~」蔣倩盈對楊朗然微微一笑講道

「哦~咁就好啦~」楊朗然笑一笑講道,「你受傷嘅話,我大佬會心痛㗎~」

蔣倩盈聽到楊朗然嘅說話後不禁一笑,余詠妍佢地幾個都笑起嚟;見到蔣倩盈對楊朗然微笑嘅時候,我心入面卻有種難以言喻嘅感覺



「啱啱到底發生咩事?」楊朗然終於問出重點,前面嘅關心都係鋪墊嚟

「佢迎面行過嚟,我又避唔切,撞到嗰陣佢拎住嗰杯熱水溢出嚟,咪燙到囉~」蔣倩盈講道,佢望咗我一眼之後又對楊朗然微微一笑,「都係我避唔切,又唔知佢拎住熱水,累到佢都整親啦⋯」

蔣倩盈做咩望一望我之後要咁樣講?啱啱喺後梯嘅時候又係,好似要解釋比我知佢真係冇心一樣,下意識就回頭望

佢係覺得我其實比較在意孫慧伶有冇事?

「你冇事都好重要㗎嘛~」楊朗然微笑道,「放心啦~岑諾新佢一定係在意你多啲~」

「喂⋯!」

楊朗然衝口而出講嘅說話,余詠妍、張希童同李樂恩即刻制止佢,張希童直接踢咗楊朗然一腳;但比起佢地嘅行為,我更在意嘅係蔣倩盈呢一刻嘅反應,佢聽到楊朗然嘅說話後直接怔了一怔,本來掛喺臉上嘅微笑都凝固咗一下

「唔緊要,我知㗎啦~」蔣倩盈微笑着講道



「你明我嘅意思就最好啦~」楊朗然頓時講道

「關心完啦?」我望一望楊朗然,佢望住我點一點頭,我箍住楊朗然將佢拉走

我地兩個番到埋位,我真係多謝你呀楊朗然,多謝你嘅衝口而出⋯




IG Link: https://www.instagram.com/nd_cotttoncandy/?hl=zh-tw