［愛情純愛］既然忘記唔到佢，不如試下中意我⋯？: 91. 「禍」從口出

「大佬，你知我唔係特登㗎可⋯？」楊朗然望住我小心翼翼地開口講道，「我真係唔小心衝口而出！」

「我知。」我不禁抬眼瞪咗佢一眼，「聽得出。」

「咁你嗰陣咁中意孫⋯」楊朗然細聲地講道，我頓時再瞪佢一眼，佢將聲量再降低，「慧伶⋯」

「我同孫慧伶分咗手啦。」我淡然地講道，「你喺蔣倩盈面前唔好亂講嘢。」

「冇下次！」楊朗然果斷地講道，「不過，你真係唔介意呀？蔣倩盈之前同過張景彥一齊，然後宜家張景彥又同咗孫慧伶一齊⋯」



「我又唔係中意張景彥，有咩介意唔介意？」我講道

「但你個Ex又同咗張景彥一齊，你宜家呢個又同過張景彥一齊⋯」楊朗然追問道，「你真係唔介意？」

「我都話，我又唔係中意張景彥，我同蔣倩盈拍拖，又唔係同張景彥拍拖。」我平靜地回答

「咁蔣倩盈呢？你肯定佢真係中意你？」楊朗然一臉認真地問我，細聲對我講道，「你地太快就一齊咗，你同孫慧伶分咗手一個月就同咗蔣倩盈一齊。」

聽到楊朗然咁問，我心裏不禁一顫，佢講咗我同蔣倩盈之間嘅重點，亦係培養緊嘅嘢——「中意」



「我知佢係中意我咪得，佢冇對我講大話嘅必要。」我冷靜地講道

我都只係講緊一個事實，蔣倩盈的確冇對我講大話嘅必要，因為佢嘅想法我都知道

「你感覺良好就得啦～」楊朗然笑咗一笑講道，「不過，我都覺得蔣倩盈唔似啲未放低但又同其他人喺埋一齊嘅人～」

「嗯⋯」我冇再多講啲咩，免得陣間講錯嘢

⋯



放學之後，今日同平時一樣，都係同蔣倩盈一齊番屋企嘅日子

「陣間陪我去一去藥房呀～想買個醫生膠布同紗布。」蔣倩盈對我講道，「因為掂到嗰陣都係有啲痛⋯」

「好呀。」我微微點頭，瞄咗佢隻手一眼

我同蔣倩盈番到去我地住嘅嗰邊之後先去藥房買嘢，買完嘢之後，我就好似平時一樣送佢番去

蔣倩盈就好似平時一樣同我講嘢，但我覺得佢好似有啲咩心事收起咗一樣

「我番到啦～走啦～」蔣倩盈好似好匆忙想番去一樣，向我揮揮手就即刻邁步走

「等陣。」我情急之下一下子伸手拉住佢嘅書包

「嗯？做咩呀？」蔣倩盈回頭望向我，但視線卻好似唔想同我對上一樣



「你自己貼唔貼到紗布？」我惋轉地問道

「呃⋯應該都可以？」蔣倩盈諗咗一諗，然後望向我，「做咩？」

「我幫你貼咗先不如。」我見佢一心拒絕我一樣，便直接講道

「哦⋯可以呀⋯」蔣倩盈點點頭

我拉住佢行到附近嘅一張長櫈坐低，佢㩒住紗布，我幫佢用醫生膠布將紗布固定好

「Okay～」蔣倩盈見貼好之後便笑咗一笑，「唔該～」

「今日晏就楊朗然講嘅嘢，你唔洗放喺心上。」呢樣嘢先係我想同蔣倩盈講嘅嘢



「唔緊要呀，我冇介意。」蔣倩盈對我微微一笑講道，「就算喺你個心入面真係在意佢多啲，我都冇嘢可以講呀～畢竟我都知道⋯」

蔣倩盈微微耷低頭，手捉緊裝住醫生膠布嘅盒

佢又係咁樣⋯又係微笑再加一句唔緊要⋯

我咩都冇講，直接將佢拉到我懷中輕輕攬着，佢一臉愕然咁望住我

「做、做咩⋯？」蔣倩盈愕然地問道

「每一次都唔緊要唔介意，你要到幾時先介意先緊要？」我忍唔住直接問道，「你係唔係真心想試下同我喺埋一齊？」

蔣倩盈可能冇預計到我會咁樣問佢，佢對於我講嘅嘢有啲意外，佢悄悄地將手提起，我見佢一副想逃跑嘅模樣，連忙捉住佢隻手

「嘶⋯」蔣倩盈嘅手縮咗一下，輕皺起眉頭，「痛⋯」



「Sorry⋯」我鬆開手

蔣倩盈抬眼望咗我一眼後又將視線移開，微微鼓起兩泡腮

「咁楊朗然成日都係咁㗎啦～」蔣倩盈微微耷低頭望住自己嘅手，「佢不嬲都係咁樣講嘢㗎啦，我都知嘅⋯」

所以話，佢係真係唔在意？楊朗然講到咁樣，都唔在意？

蔣倩盈，你到底，係唔係真心想試下同我一齊？定只係講下就算咁兒戲？

「岑諾新對唔住，我冇心㗎⋯」蔣倩盈莫名其妙地對我道歉

「為咩道歉？」我帶着疑惑嘅語氣問道



「孫慧伶嘅事，同顯得好似唔係真心嘅事⋯」蔣倩盈微微耷低頭請道




IG Link: https://www.instagram.com/nd_cotttoncandy/?hl=zh-tw