只要一同孫慧伶有關嘅事,蔣倩盈就會變得小心翼翼,生怕會講錯啲咩令我唔高興一樣

聽講比人遺棄過一次嘅貓同狗喺搵到新家人之後,做事都會變得小心翼翼,每做一樣嘢都會瞻前顧後,怕又比人拋棄一樣

蔣倩盈你到底怕啲咩?見到佢咁樣,心裏不禁有啲嬲,但我冇責備佢嘅想法

「唔洗為孫慧伶嘅事同我道歉,我唔在意。」我淡然地講道同時輕輕拖住佢隻手,佢隻手明顯地有啲凍,「喺你眼中,我真係咁在意孫慧伶?」

蔣倩盈默默地抬眼望咗我一眼,佢大概係諗緊應該要點樣答我先好



「你真係要我講呀?」蔣倩盈緩緩開口,抬頭望向我,我點一點頭後,蔣倩盈又耷低頭望住自己包咗紗布嘅手,「因為我太清楚知道你有幾中意佢啦⋯我又唔係喺咩都唔知嘅情況下同你一齊⋯我又點會唔知?聽咗咁多,講咗咁多,我又點會唔了解?嘻⋯感覺到㗎嘛~」

蔣倩盈望一望我,然後又耷低頭

「嘻,放低一個人,邊有咁容易喎~咁所以,就算你宜家個心入面係有孫慧伶嘅話,我都唔會覺得係你嘅錯呀~」蔣倩盈望向我笑咗一笑,「我地都係試下咋嘛⋯」

「蔣倩盈。」我不禁皺起眉頭,怒氣比啱啱更大,「咩叫做『我地都係試下咋嘛』?你當初唔係同我講你係認真㗎咩?下下都提住孫慧伶,但又唔在意我心入面有佢,你到底係唔係真係真心想試下同我喺埋一齊?」

「你突然間做咩⋯」蔣倩盈無辜地望住我,「我冇唔認真呀,我都有努力呀⋯你做咩突然間咁樣⋯?」



「Sorry,係我語氣重咗。」我愣了一下然後講道

我做咩突然間就咁樣同佢講嘢⋯?我啱啱嘅反應,好似嚇到蔣倩盈

「你都要番去啦。」我連忙起身講道,唔想停留喺呢個難以形容嘅感覺之中

「嗯嗯!」蔣倩盈企起身,伸手拉住我嘅手腕,然後比咗個goodbye hug我,「你番到去話我知呀⋯」

「好。」我點點頭,比佢早一步鬆開手,不過我都係喺見到佢入咗大堂之後先再轉身走



X⋯X⋯X

啱啱岑諾新,係唔係嬲啦⋯?定係其實係我嘅錯覺嚟?

「我係邊度做得唔夠好⋯?」我蹲喺衣櫃前打算拎衫褲去沖涼,「好似過咗火,激嬲咗佢啦⋯」

我其實都唔係想要成日提住孫慧伶,但我唔咁樣嘅話,我冇辦法知道岑諾新嘅心中仲有幾在意佢⋯

我只係⋯唔想咁明顯咁令岑諾新察覺到我開始在意,所以先要咁樣問⋯

我拎住衫行到去廁所,正打算要除衫嘅時候,我望向自已貼住紗布嘅手,諗起啱啱岑諾新細心幫我貼紗布嘅模樣

「嘻⋯」我嘅嘴角自動上揚起嚟

喺佢專心咁幫我貼醫生膠布嘅時候,我有偷偷咁望咗佢一眼,想偷偷地望下嗰一刻嘅佢會係咩表情



但佢成日都目無表情,搞到我難以去窺探佢嘅內心,但我嘅心臟喺抬眼望到佢嘅一刻,跳得好厲害

喺佢冷漠嘅外表下,其實藏起咗一份溫柔

每一次見到佢嘅溫柔、見佢比我嘅每一個小驚喜,我都不禁諗:「佢之前都會咁樣對孫慧伶⋯」

喺佢一臉認真、帶着責備嘅語氣問我係唔係真係真心想試下同佢一齊嘅時候,我心裏有啲愕然,但亦有啲⋯開心⋯

我沖完涼後番到自己房,然後坐低喺床上

「紗布⋯今晚再換啦~」我望一望手上嘅紗布後將替換嘅紗布同膠生膠布放到一旁

我拎起手機,打開IG沉默咗兩秒,然後拉到去message嘅頁面,岑諾新嘅icon已經係message頭二嘅常客嚟~



岑諾新:番到屋企

呢個係岑諾新喺7分鐘前send比我嘅message

「Okay~仲嬲緊呀?」

本來我仲諗緊佢幾時會睇,點知message先send出去10秒,message嘅下方就彈出「seen」

岑諾新:冇嬲

我諗緊覆佢啲咩嘅時候,見到佢輸入中,我等咗一陣,只見「Typing⋯」彈上又彈落

「佢想講啲咩⋯?」我不禁覺得疑惑又好奇,佢想講啲咩要打咁耐?

岑諾新:嗯



嗯⋯?嗯⋯!?佢打咗成分鐘,就係打咗個冇意思嘅「嗯」比我?算點呀?

「今個星期六有冇嘢做?一齊出去?」我問道

岑諾新:可以,想去邊?

「未諗到呀,到時再話你知?」

我完全諗唔到去邊好,但就係覺得要出去約會下,增進一下感情

「唔⋯去邊度好呢⋯?」我坐喺書枱前喃喃自語,沉思着星期六嗰陣要同佢一齊去邊好






IG Link: https://www.instagram.com/nd_cotttoncandy/?hl=zh-tw