［愛情純愛］既然忘記唔到佢，不如試下中意我⋯？: 94. 無心的話

「哦～」喺一聲拉櫈嘅聲音後，課室中嘅同學忽然起哄

岑諾新將櫈拉到去我身旁坐低，我抿着唇忍住笑意，我提起左手托住下巴，成個人稍微側向左邊，同坐喺我右邊嘅岑諾新拉開少少距離

我望咗岑諾新一眼，見佢耷低頭，臉上掛着無奈嘅笑容

唔知點解，我地坐近咗之後，好似令我同佢變得更尷尬⋯

「叮噹叮噹⋯叮噹叮噹～」



上半就終於完啦，終於到咗放飯時間，唔洗再坐喺呢個位

我將啲嘢收入桶櫃，打算起身去搵詠妍佢地食飯

「倩盈拜拜～食完飯見啦～」希童企起身回頭望向我講道

「吓⋯？你地唔同我食飯咩？」我疑惑地望住希童

「吓？」希童更疑惑咁望住我，然後指一指岑諾新，「你今日同佢食嘛⋯唔係咩？」



「哦⋯係喎⋯」我成個人一醒

「調咗位開心得滯呀？」希童倜侃我一樣講道，「食得開心啲啦～」

我望住希望行離坐位去搵詠妍同樂恩，我坐喺位望向岑諾新

「食咩？」岑諾新企起身，將銀包同手機放入褲袋

「今日想食漢堡包⋯」我講道



「嗯，拎嘢行。」岑諾新坐喺佢自己嘅枱邊等我

⋯

「你話呢⋯仲問我點解尷尬⋯」我無奈地抿一抿唇

「冇辦法，個位係抽籤抽。」岑諾新將汽水放番喺餐盤嘅角落，「唔想坐我隔離嘅話同Miss Yip講調位。」

「我又冇咁諗～」我隨即一笑講道，「只係突然間坐喺隔離，有啲唔知點咁啫⋯」

岑諾新抬眼望咗我一眼，嘴角微微上揚，我托住腮望住佢

「笑咩喎⋯」我將漢堡包嘅最後一啖放入口中，然後將包裝紙揉成一個紙團

「宜家呢個位都幾好呀唔係咩？」岑諾新講道



我總係睇唔穿佢嘅想法，佢嘅表情我真係睇唔透，唔知佢諗咩⋯

「你隻手點？」岑諾新忽然提起我隻手嘅事，我見到佢嘅視線落喺我貼咗紗布嘅手上

「冇咩事，琴晚搽咗藥膏，但宜家都係有啲紅囉隻手。」我輕輕㩒一㩒紗布，痛感隨即傳嚟，「不過已經冇琴日咁痛。」

岑諾新朝我伸手，將我左手嘅手腕捉住

「番到去記得再換紗布。」岑諾新望住我隻手講道，然後又抬眼望一望我，「唔好濕水。」

「知啦～」我心中覺得甜甜的，嘴角都忍唔住上揚起嚟，「我會記得換紗布㗎啦！不過你特登提我，我就一定會記得換～」

有人關心自己嘅感覺真係好好～心入面嗰種甜甜嘅感覺完全唔膩



我同岑諾新喺食完lunch番學校之前去咗一轉7仔，係因為我突然間想食糖，所以就去一轉7仔睇下，反正仲有時間嘛～

我企喺放咗各式各樣嘅糖嘅貨架前望，岑諾新企喺我背後背對住我，睇緊後面貨架上嘅嘢

「你想食咩？」岑諾新轉身問我，「未諗好？」

「諗好啦～食呢個啦～」我拎起一筒牛奶糖，上面仲要寫係「特濃牛奶」，「呢個好食。」

岑諾新企喺我身旁，望住我手上拎住嘅糖微微點一點頭，我望一望佢隻手，考慮咗一秒後挽住佢嘅手臂拉住佢同我一齊去比錢

我同佢一齊行出去嘅時候，見到張景彥剛好同佢幾個朋友一齊行入嚟7仔，我同張景彥對上視線，不過我都不以為意地將視線移開

費事啦～我都決定咗放低啦，免得大家都尷尬啦

比完錢之後，我同岑諾新便行出7仔，我拆開包裝袋然後遞咗一粒牛奶糖比佢



「嗱。」我將粒糖遞到佢面前，佢伸手出嚟接，「好食㗎～好嘢要開心share嘛～」

岑諾新將糖紙打開，將牛奶糖放到口中

「係唔係好好食呢～」我笑問道同時自己都食咗一粒，將糖紙揉成一個細細嘅紙團後放番喺糖盒中

我朝岑諾新伸手，示意佢將糖紙比我

「你比我食嘅我可以話唔好食咩？」岑諾新淡然地反問我

我怔了怔，朝佢伸出嘅手懸喺半空，佢若無其事地將糖紙摺成一個細嘅正方形後放到我手

「當然要話好食啦～」我頓時一笑後講道



我將糖紙放到盒中，喺將糖盒閂上嘅瞬間，我就好似將一份怦然心動收起喺盒中

佢對我講嘅嘢，好似計劃過但亦好似無意間講出口一樣，但我卻喺佢嘅話語間搵到令我怦然心動嘅地方




IG Link: https://www.instagram.com/nd_cotttoncandy/?hl=zh-tw