［愛情純愛］既然忘記唔到佢，不如試下中意我⋯？: 95. 喜歡的感覺

同佢相處嘅時候嗰種感覺好舒服，冇咗嗰種「我要一直喺佢身上追逐佢」嘅感覺⋯

佢就喺我身旁，同我嘅距離好近，唔係明明已經企喺身旁，但喺兩個人之間就好似有層薄膜一樣

佢地有相同亦有所不同，比我嘅感覺亦好唔一樣

⋯

放學之後，我同岑諾新好似平時一樣搭巴士番屋企



「睇緊啲咩咁入神？」岑諾新問我

我嘅視線從手機螢幕上移開抬頭望佢，佢望住我嘅手機螢幕時，我下意識將手機向自己嘅方向垂直

「唔比得我睇？」岑諾新嘅視線從我嘅手機上移開，定睛望住我

「都唔係唔睇得嘅⋯」我望一望手機然後笑咗一笑，「不過未必係你會感興趣睇嘅嘢。」

岑諾新疑惑地望咗我一眼，我望咗手機嘅內容一眼，然後將手機遞比佢睇



岑諾新無奈地移開視線，因為我睇緊嘅都係啲我同詠妍佢地都有follow開嘅靚仔

我微微側頭望住岑諾新，好奇佢有咩反應，但佢咩都冇講，只係坐喺我隔離睇手機

「你比我睇呀？」我小心翼翼地問道，「真係？我真係繼續睇㗎啦喎～」

「嗯，睇。」岑諾新望向我，微微抬一抬下巴，淡淡然咁講道

我定睛地望住岑諾新，輕輕抿唇，瞄咗手機嘅螢幕一眼



「我真～係繼續睇㗎啦～」我故意強調地對佢講道

「嗯，睇。」岑諾新依舊淡定地回答我，從佢嘅眼神中都睇唔出一絲嘅動搖

「哦⋯好啦～」我笑一笑，然後解鎖手機，打算真係繼續睇

岑諾新你批准㗎～我問咗你，你比我睇㗎～咁我真係睇㗎啦～

「咦⋯？」我忽然眼前一黑，感覺到嘅係佢嘅手傳嚟嘅溫度，「你做咩掩住我對眼啦⋯！」

「你真係夠膽繼續睇。」岑諾新用平淡嘅語氣講道，「我成個人坐咗喺你隔離。」

「喂⋯！係你話比我睇㗎！我問咗你⋯」我捉住佢嘅手向下拉，理直氣壯咁望住佢

「我話比你睇你就真係睇？」岑諾新反問道，明明佢冇皺眉，但我都可以察覺到佢嘅不滿



「哦～咁你一早講唔比我睇咪得囉～」望住佢呢個傲嬌嘅模樣，我嘅心裏不禁覺得喜滋滋的，有啲新鮮

我試探般伸手挽住佢嘅手臂，稍微湊近佢，默默地留意佢嘅反應；佢冇避開嘅意思，只係默默咁瞄咗我一眼，臉頰上都寫住「不悅」兩個字

「好啦好啦～唔睇唔睇～」我邊心情愉悅地笑邊將手機收番入裙袋中，「唔嬲唔嬲～」

「冇嬲。」岑諾新仲口不對心咁講道

「哦，你話冇嬲就冇嬲啦～」我笑了笑講道，微微側頭將頭靠喺佢嘅膊頭上

我心裏有啲緊張，手心都有啲出汗，大概係真係決定一齊之後，第一次咁做，所以有啲緊張嘅感覺

「笑得咁開心做咩？」岑諾新望向我問道



「冇咩～」我搖搖頭，「就落車，落定去。」

岑諾新一如往常地喺落樓梯嘅時候行喺我前面，喺我身後已經冇人，所以我企咗喺第一級上面，岑諾新企喺下層嘅地面上

喺巴士剎車停落嚟嘅時候，我微微前傾，但左手捉住扶手，右手搭喺岑諾新嘅膊頭上；本來就面對住我企嘅岑諾新喺巴士剎車嘅時候伸手輕輕攬住我，比我搭喺佢膊頭上嘅手落得仲快

我怔住定睛望住佢，岑諾新正望住車頭嘅位置，或者係睇緊幾時到站啦

喺巴士駛到我地平時落車嘅站埋站時，岑諾新望向我，佢見到早就定睛望住佢嘅我時怔咗一秒，然後鬆開攬住我嘅手，捉住我嘅手腕同我一齊落車

「嘻嘻⋯」我一落車企好喺地下，頓時笑嘻嘻地挽住佢嘅手臂

「笑咩？」岑諾新滿臉疑惑地問我

「冇咩～開心咪笑囉～」我搖搖頭，「中意同你一齊咪笑囉～」



「中意同我一齊？」岑諾新輕輕一笑後問我

「嗯，唔中意嘅話就唔會係咁啦～」我點頭，然後順手地喺裙袋中拎出今日晏就買嘅嗰筒糖糖比佢，「食嗎？」

「嗯。」岑諾新點頭，佢伸手拎接過筒糖嘅時候，我又將筒糖拎走唔比佢

「嘻～又唔想咁輕易比你。」我調皮地吐一吐舌頭，「不過都係比你食啦～」

我將筒糖放到佢手中，抬起頭臉帶着微笑定睛望住佢，佢亦望住我，但喺佢嘅表情中夾雜咗一份疑惑

「做咩呀？」我望住佢嘅疑惑表情問道

「冇。」岑諾新輕輕一笑後講道，「冇咩。」



「嘻，奇奇怪怪～」我輕輕一笑，細聲地講道

X⋯X⋯X

「我番到啦～我地星期六係唔係出去呀？」蔣倩盈行到我面前轉身面向我

「嗯，你唔係想出去咩？」我向下瞄咗一眼，佢仍然拖住我冇鬆開手

「嗯係呀～但我仲未諗到去邊好⋯」蔣倩盈抿一抿唇後講道

「再諗。」我講道，「冇所謂，都係睇你。」

其實去邊都冇咩所謂，主要都係睇佢想去邊度挽，佢想行街又好，睇戲都好，去邊都可以，反正都係佢開心就可以，我喺隔離陪佢就係，女仔都係中意咁樣




IG Link: https://www.instagram.com/nd_cotttoncandy/?hl=zh-tw