［愛情純愛］既然忘記唔到佢，不如試下中意我⋯？: 97. 想起了那人

我好似冇見過嗰個女仔喺我面前臉頰泛起紅霞嘅模樣，嚟到呢一刻，我連佢有冇真正中意過我都唔知

諗起佢，我嘅腦海中浮現出嚟嘅都只係我不斷氹佢開心嘅事，不斷咁討佢歡心

曾經都有中意過？定其實佢從一開始就冇中意過我？冷靜落嚟一諗，原來如此

因為係我追佢，係我落力討佢歡心，所以佢就可以咁樣⋯？

不過算啦，唔想再深究⋯我都揀咗同蔣倩盈試下，而且一直諗起孫慧伶嘅話，只會令我更容易咁拎佢同蔣倩盈做比較



⋯

星期六

「你諗好去邊未呀？」我問蔣倩盈，「想去邊？」

「去睇戲好唔好呀？」蔣倩盈興致勃勃咁問道，「最近上咗套新戲呀～我想睇。」

「咩戲？」我好奇地問道



「恐怖片～想睇呀～」蔣倩盈將電影嘅搜尋結果遞比我睇，「唔⋯不過你想唔想睇呢套？或者你有冇其他嘢想做？」

「冇，你想睇戲嘅話，我地就去睇戲。」我抬頭望一望地鐵車廂內嘅站牌，「下個站落車？」

「嗯嗯！」蔣倩盈點點頭，然低頭又耷低頭睇手機

我嘅視線落喺蔣倩盈身上時，見到佢臉上帶着淡淡嘅笑容，唔知點解見到佢開心嘅時候，我心入面都會有啲開心

我地買完飛之後，我將戲飛遞比佢，記得上次佢keep戲飛嘅時候好開心



蔣倩盈接過戲飛，然後將戲飛小心翼翼咁收入銀包，只係好小事，但佢都好似好開心一樣

望住佢好似小朋友一樣開心，我嘅心中莫名其妙地有種衝動想伸手摸摸佢頭，我垂着嘅手一直蠢蠢欲動想提起

我輕輕地握緊了拳，先忍一下手⋯

「仲有時間，不如去食啲嘢先再番嚟睇戲呀～」蔣倩盈直接伸手拖住我，「周圍睇下食咩呀可以～」

我同佢喺商場行咗一圈，但佢都好似諗唔到食咩好

「食唔食呢間？」我指住其中一間餐廳

「你想試呢間呀？可以呀～」蔣倩盈瞬間就贊成我嘅提議

我地一齊食完嘢再行多陣就去睇戲



我冇諗過蔣倩盈居然會想睇恐怖片，佢睇得恐怖片應該唔太驚？唔⋯反正我就唔驚呢啲嘢，所以睇就睇

「咔—咔—咔—」「呀！！！」

原來佢唔係唔驚，佢係又要驚又要睇⋯

蔣倩盈嘅手緊緊地捉住我隻手，佢嘅左手掩住眼⋯

「呀！！！呀！！！」

女主角每一次尖叫，同每一個驚嚇位，蔣倩盈都會嚇到成個人震咗一下

我將我同佢之間嘅扶手向上推起，然後拖住佢隻手，希望佢可以安心啲就係



我隻手一拖住佢，佢便緊緊地捉住我隻手，亦朝我嘅方向坐近咁少少

「睇嚟真係好驚⋯」我喺心裏一笑，然後伸手輕輕地將佢個頭往我膊頭方向輕按

蔣倩盈真係乖乖咁將頭靠喺我嘅膊頭上，有啲可愛⋯

當電影完場嘅時候，影院內嘅燈緩緩亮起，蔣倩盈望一望我，然後又撇開臉

「出晒手汗⋯」蔣倩盈鬆開手，我都feel到我嘅手心都係手汗，「嘻嘻⋯去個toilet先～」

我企喺售票處附近等蔣倩盈出嚟，陣間食咩好？今晚食咩⋯

放喺褲袋嘅手機震咗一下，我拎嚟一睇，係我媽嘅WhatsApp⋯

「行得啦～」蔣倩盈一蹦一跳地行到我面前，「做咩咁嘅表情？有嘢要講？」



「嵐嵐陣間放興趣班但冇人接⋯」我收起手機，啱啱收到我媽嘅message就係講緊呢樣嘢

「哦～去囉～」蔣倩盈爽快地回答道，「係唔係都係上次嗰度？」

「係。」我點點頭，「今晚我屋企冇人，嵐嵐唔可以一個人喺屋企⋯」

⋯

仲記得同孫慧伶一齊嘅時候

孫慧伶：星期六陪我去街呀～

「我晏就要去接妹妹放興趣班，但都可以同你行一陣」



孫慧伶：我打算夜晚食埋飯㗎喎，你打算點？帶埋你個妹一齊？

「星期六我爸媽唔喺屋企，我冇理由掉低我個妹一個人」

孫慧伶：算啦算啦，唔出啦，我約第二個出去

孫慧伶：邊有人拍拖出街帶住個妹㗎

⋯

「唔⋯好似上次咁帶埋嵐嵐一齊去食飯？」蔣倩盈提議道




IG Link: https://www.instagram.com/nd_cotttoncandy/?hl=zh-tw