［愛情純愛］既然忘記唔到佢，不如試下中意我⋯？: 98. 比較

「你Okay？」我問道

「點解唔Okay？」蔣倩盈一臉疑惑地反問道，「上次都係咁啦，所以冇問題呀～我又冇咩所謂嘅～」

「上次邊度一樣⋯」我不禁細聲地講道

上次嘅我地都未真係決定一齊，只係算係普通朋友出個街，但今次⋯都叫做拍拖約會⋯？

「我真係冇問題～」蔣倩盈毫不介意地笑了笑，「佢幾點放？」



「宜家行定過去就差唔多。」我望一望手機螢幕上顯示嘅時間

「好呀～」佢點一點頭

我地行到外面，今日有微風

喺微風吹過嘅時候，有淡淡嘅香水味飄過，呢個味好似係⋯

上次出街嘅時候，蔣倩盈噴嘅香水味⋯



「好香⋯」我不禁喺心中講道

我同蔣倩盈入到室內，企喺中心外面等興趣班落堂，蔣倩盈遞咗筒糖比我，係嗰日嗰筒牛奶糖

「咦，嵐嵐有學琴，咁你以前係唔係都有學琴？」蔣倩盈忽然間問道

「識少少。」喺我接過筒糖嘅一刻，蔣倩盈企喺我身旁，佢隻手剛好貼住我隻手，「不過後來冇再學。」

「哦～」蔣倩盈嘅頭微微一側靠喺我嘅膊頭上



蔣倩盈拎出手機，無聊地打開IG story嘅前置鏡頭，順手地影咗張相就po喺story

「以前你都要嚟接嵐嵐放興趣班㗎？」蔣倩盈望住興趣班中心嘅門口

「間中，有時屋企冇人，咁咪我嚟接佢。」我瞄咗佢一眼後講道，「不過，多數都係我媽嚟接。」

「以前⋯」蔣倩盈忽然間企番好，但卻欲言又止起嚟，微微耷低頭，雙手喺身前輕扣着，「以前都會？」

「唔會⋯」我搖搖頭，「佢唔比，如果係好似咁樣嘅話，佢即刻就會發脾氣話唔出。」

「點解呀？」蔣倩盈不解地問我，「你冇同佢解釋？」

「有，只係佢唔中意。」我無奈一笑講道，「佢會覺得我唔夠重視同佢一齊。」

「吓⋯？但冇理由掉低嵐嵐一個人呀～」蔣倩盈講道



「嗯⋯所以我都冇辦法⋯」我微微耷低頭講道，「佢會覺得我唔重視佢，但我又唔可以掉低嵐嵐一個喺屋企。」

「你係唔重視佢嘅話，就唔會為佢難受咗咁耐啦⋯」蔣倩盈細聲地講道，抬頭望我嘅時候擺出一個似笑非笑嘅表情

我同佢對上視線，佢啱啱講嘅一句我聽到，我冇否認嘅打算，畢竟係一個事實

「你冇錯㗎，你對佢已經好好⋯」蔣倩盈又講道，佢嘅臉上掛着惋惜嘅表情

「陣間去食晚飯之前，不如再行多陣呀～」蔣倩盈行到我面前抬頭望住我講道

見到佢一臉天真咁笑，我又不禁嘴角上揚

「好呀。」我點點頭同意佢嘅提議



「叮嚀～」隨住清脆嘅一聲，興趣班中心嘅玻璃門打開，嵐嵐喺入面行出嚟

「哥哥！」嵐嵐直接就跑向我，跑到嚟我面前先見到仲有另一個人嚟接佢，「姐姐～」

「嗨～」蔣倩盈笑着同嵐嵐打招呼

「今晚係唔係食埋飯先番屋企？」嵐嵐問我

「嗯，你想食咩？」我問道

「唔知，未肚餓。」嵐嵐搖搖頭

「去行多陣先去食飯啦～」蔣倩盈望住嵐嵐講道

⋯



「耶～」一個7歲嘅小妹妹同一個就嚟17歲嘅女仔一齊跑咗入去冒險樂園

我跟喺後面行，到底呢啲地方有咩好玩⋯？

「挽一陣㗎咋⋯」我無奈地講道

「哦！」佢兩個興高采烈咁笑道

錢真係可以買到快樂⋯？呢啲完全係嘥錢嘅地方，我嚟嘅次數一隻手都數得晒⋯因為太唔實際，又嘥錢⋯

但我今日為咗眼前兩個女仔嘥咗一次錢去買佢地嘅快樂

「嵐嵐你想挽啲咩呀？姐姐可以陪你玩呀～」蔣倩盈微微彎腰，手輕輕扶住袋



「我想玩嗰個！」嵐嵐指住喺另一邊嘅籃球機

「好！」蔣倩盈點點頭便跟住嵐嵐跑過去

我今日只係嚟陪玩，反正我對呢啲咁童真嘅地方冇咩興趣就係⋯




IG Link: https://www.instagram.com/nd_cotttoncandy/?hl=zh-tw