［愛情純愛］既然忘記唔到佢，不如試下中意我⋯？: 102. 想逃跑

上堂嘅時候，我總係下意識望向岑諾新，當然唔係一直定睛望向佢，只係偷瞄佢一眼，然後又繼續聽書

「坐得咁近真係會忍唔住⋯」我喺心入面偷偷講嘅同時微微轉頭望向佢

我悄悄地偷望住佢，輪廓分明嘅臉、帶着骨感嘅手、專心聽書嘅認真、整潔嘅校服、坐着嘅姿勢⋯當呢啲條件套喺佢身上嘅時候，格外地，吸引⋯

喺我望得入神嘅時候，岑諾新抬起頭朝我望過嚟，我同佢，就係咁樣，莫名其妙地對上視線

岑諾新對我微微一笑，我不禁有啲腼腆起嚟，悄悄地將視線收回；我托住腮，手拎住筆，喺微微耷低頭嘅同時輕輕抿唇



「心跳⋯又加速啦⋯！」我邊感受着心跳邊喺心中講道

最近，心跳總係會突然變快⋯例如喺佢靠近我嘅時候⋯喺佢嘅目光投向我嘅時候⋯喺佢拖起我隻手嘅時候⋯

「岑諾新，你中意我嗎？」我喺心裏柔聲問道

喺我將目光投向佢嘅時候，陽光嘅光線打入課室，剛好照到佢嘅座位，顯得佢⋯有啲耀眼⋯

「孫慧伶真係走寶⋯咁好嘅男仔都唔要⋯」我喺心中講道，我係⋯打從心底咁樣覺得



冷淡又溫柔，帥氣又可愛⋯孫慧伶真係冇察覺到嗎⋯？岑諾新嘅好⋯到底佢係恃寵而驕定係單純不愛⋯？

一個會花盡心思氹佢開心嘅人，一個會用盡一切辦法博佢一笑嘅人，孫慧伶都唔將呢啲事放喺眼中⋯？

「我今日要補課。」喺我回神嘅時候，都已經響起放學嘅鐘聲

岑諾新起身行到我身旁，我抬起頭凝視佢

「明明就好令人心動⋯」我喺心中回想起佢比我嘅小驚喜，「佢唔珍惜你，佢會後悔⋯」



「做咩？」佢見我冇出聲便開口問我，「唔舒服？」

「唔係⋯」我搖搖頭

「唔舒服嘅話番去先，唔洗等我。」岑諾新轉身拎起筆袋，我見佢打算走，瞬間提手拉住佢，「做咩？」

「我等埋你先走。」我淡然地講道，然後鬆開手

岑諾新先愣了一下，然後微微點頭：「嗯。」

喺其他人都走晒後，該走嘅走，該補課嘅去補課後，課室裏，又只剩我一人，我習慣了

我抬頭望咗一眼時間，然後踏出課室，行到去走廊企喺矮牆前面

我將手交搭喺矮牆上，微風輕輕吹過，今日無論係陽光定係微風都格外柔和，特別溫柔



「今日係等佢放學嘅日子呢～」我伸咗一個懶腰，企喺原地吹吹風

「你喺度嘅仲？」一把聲音朝我傳嚟，我望向聲音傳嚟嘅方向

「嗯⋯」我微微點頭，瞬間就將視線移開，可以令我有呢種無奈又想逃走感覺嘅人，除咗張景彥仲可以有邊個？

「等人？」張景彥向我搭話，佢都太明顯咁同我搭話啦掛⋯

「嗯，等岑諾新，佢補課嘛～」我一直眺望遠處，唔想同佢有對上視線嘅一刻

張景彥行到我嘅旁邊同我一齊企，我地之間嘅距離大概係可以企多兩個人左右嘅距離，但我唔想同佢一齊企喺度，唔想比人覺得我同佢之間仲有啲咩關係⋯

「佢要一直企喺我隔離企到幾時？佢等緊孫慧伶？」我不禁喺心中諗道



佢企喺我隔離令到我渾身唔自在，行開又唔係，但繼續企喺度又會唔知點咁⋯

「你等緊孫慧伶？」我無奈地開口問道，「佢補課？」

「係呀，佢叫我等埋先走，所以咪喺度等佢。」張景彥講道，佢提起孫慧伶嘅時候，臉上掛着我從想都冇見過嘅笑容

我都唔知道佢點解要特登過嚟同我搭話⋯

「哦～幾好呀～」我笑一笑講道

我同佢又靜咗落嚟，我拎出手機，耷低頭睇手機，唔想再開口講嘢，希望佢識做啲，自己行開

「之前嘅事⋯」張景彥忽然間又開口，我眼睛嘅餘光見到佢望住我，「果然，我都係差你一個真誠嘅道歉。」

「哦⋯唔洗呀⋯」我望向佢後輕輕一笑，搖搖頭，「過咗去啦已經，我亦都冇再放喺心上，大家都開心就可以啦。」



「都係⋯見你宜家同佢一齊，好開心。」張景彥撇開臉望向遠處，「佢對你好好啦應該～」

「嗯！當然呀～」我點點頭，「同佢一齊嘅每一日都好開心。」

「嗯，都幾好呀咁樣⋯」張景彥好似唔知可以講咩一樣，尷尬地回答我

「你應該都過得開心呀～」我無意間講咗一句，我冇要窒佢嘅心，只係順口咁就講咗出口，「同佢一齊。」

「哦，嗯。」張景彥好似有啲愕然，聽到我咁樣講，佢輕輕一笑，「聽起嚟，好似窒緊我一樣⋯」




IG Link: https://www.instagram.com/nd_cotttoncandy/?hl=zh-tw