「吓?我冇啦~」我無奈一笑,「只係,同到中意嘅人一齊,就要努力令對方開心嘛~」

我伸咗個懶腰,微風吹過,好舒服

「叮噹叮噹,叮噹叮噹~」代表住5點半嘅鐘聲響起

「放補課啦~」我回頭望向課室內嘅時鐘,「你快啲番過去啦~」

我講完之後冇等佢回答,轉身就行番入課室,結束我同佢之間早就應該完結嘅對話;岑諾新一個人拎住筆袋番嚟,我早就坐咗喺位等佢



岑諾新將書包拎起放到枱上,將筆袋收入書包,我靜悄悄地行到佢嘅背後,岑諾新好似感覺到我企得近咗一樣,轉身望過嚟

「企喺我後面想做啲咩?」岑諾新整個人轉身過嚟面向我,佢輕輕一笑後問道,「陣間撞到你。」

「冇咩呀~」我講嘅同時伸手攬住佢,課室唔會有人番嚟,因為只有岑諾新將書包放咗喺課室,上次比楊朗然見到只係巧合,「只係突然間覺得,孫慧伶放棄咗你,佢遲早會後悔啫~」

「做咩咁突然⋯?」岑諾新愕一愕然之後失笑問道

「冇咩,就係突然間咁樣覺得⋯」我抬頭望向佢



「番去啦,孭書包。」岑諾新打算轉身拎書包,我好快地拉住佢唔比佢轉過去,「做咩—」

喺岑諾新望向我嘅時候,我喺一個瞬間踮起腳尖,喺佢嘅臉頰上錫咗一啖,岑諾新隨即而嚟嘅反應只有震驚同愕然,我頓時整個人轉身背向佢

我嘅臉頰都發熱啦⋯!好似裝咗個發熱線咁⋯

「行啦,番去啦!」我頓時孭起書包,轉身對岑諾新講道

我因為呢個一時衝動嘅行為,而搞到宜家連望都唔敢望佢,坐喺巴士嘅時候都變得尷尷尬尬的⋯



「嚟緊係佢生日⋯」我望到手機顯示嘅日期時忽然間記起,再過幾日就係岑諾新嘅17歲生日,「佢會想點樣慶祝⋯?」

問下佢想點慶祝?但問佢嘅話會唔會好似冇咩驚喜咁樣?但唔問嘅話我又唔知佢中意點樣⋯

「岑諾新⋯!」我鼓起勇氣叫咗佢一聲,但我叫咗佢一聲之後,又問唔出口佢生日想點過

「嗯?」岑諾新見我叫完佢但又冇講嘢,有啲疑惑

「呃⋯冇咩⋯」我尷尬地笑咗一笑,搖搖頭,心裏又道:「都係唔好問佢啦⋯」

我有啲尷地耷低頭,放喺大腿上嘅雙手都因為唔自在而輕輕扣着

「⋯!」

忽然一隻手放喺我嘅後腦勺上,我有少少嚇咗一下嘅感覺



我稍微抬頭望向岑諾新,佢眼尾瞄咗我一眼之後,溫柔地摸咗我嘅後腦勺兩下便縮手

我望向佢時,佢定睛地望住我,見到佢朝我輕輕一笑嘅時候,我不自覺地,心動了⋯

我頓時將視線移開,目光再停留喺佢身上嘅話,我嘅臉頰會著火

「心臟,跳得好快⋯!」我耷低頭,輕閉上雙眼

心臟嘅跳動強而有力,觸動到我體內嘅每一條神經線都突突跳動

「下個站到,落定去。」岑諾新孭起書包企起身,然後回頭望向我

我地落到下一層,岑諾新隻手一直緊緊地拖實我,我完全唔敢正眼望佢⋯



「終於番到屋企樓下⋯」我心裏鬆咗一口氣,我連忙轉身望向岑諾新,「番到啦,聽日見!」

「哦⋯」岑諾新微微點頭,我頓時轉身朝大堂走去,「拜拜。」

我好似落荒而逃嘅人一樣,連忙逃離現場

「呼⋯」我一入到大堂即時鬆咗一口氣,我雙手捧住自己嘅臉頰,細細聲道:「今日太衝動⋯」

好啦好啦,要諗下送咩比佢做生日禮物⋯但我又唔知佢中意啲咩,好難送啱嘢比佢⋯

「再諗再諗⋯」我自言自語地講道



4月5日 23:59



坐喺床上嘅我緊張地拎住手機,一直望住喺左上角嘅時間,我等緊00:00嘅來臨

我一早就打好生日快樂比佢,我要做第一個同佢講生日快樂嘅人!

「好緊張好緊張⋯!」我望住手機嘅左上角喃喃自語,心跳得好快,「我只係send個生日快樂啫⋯!點解都會咁緊張⋯!」

一見左上角嘅時間由23:59跳到去00:00, 我即刻急不及待地㩒咗發送,將生日祝福send比佢

「我應該係第一個同你講生日快樂嘅人啦掛~」我再send多一個message比佢

我直盯着手機螢幕,等待message下方彈出seen嘅通知,佢一定冇咁早瞓嘅~

岑諾新:多謝,你咁準時,邊個會早過你



「當然~一到12點就準時send㗎嘛~」

岑諾新:(心心)

我第一次收到佢send嘅心心⋯!心裏有啲激動,喺見到心心嘅瞬間,我愕然啦⋯下一秒頓時忍唔住笑咗出嚟

「(心心)(臉紅)」我回覆道

我咁樣激動去嘅話,我今晚會唔會瞓唔著?




IG Link: https://www.instagram.com/nd_cotttoncandy/?hl=zh-tw