［愛情純愛］既然忘記唔到佢，不如試下中意我⋯？: 110. 沒這個必要

「你做緊咩呀？」我頓時將話題轉移開

「呃⋯啱啱打緊機，不過宜家冇打。」岑諾新好似有啲怕我會嬲一樣，猶疑咗一下先講

「哦⋯好啦～」我回答道，「你要唔要番去打機先呀？反正我地番學都會見。」

「唔洗，有人掛住我，我當然要陪咗佢先。」岑諾新淡定地講道

「你真係唔洗去打機？」我再問多一次



「晏啲先。」岑諾新講道，「陪你先。」

聽到佢講出先陪我嘅說話，心入面頓時覺得甜甜的，有種被重視嘅感覺

喺一段關係中，最重要嘅係雙向付出

如果只有一個人付出，咁遲早付出嘅一方都會因為攰而離開

希望我同岑諾新呢段關係，可以一直好好咁維繫落去⋯



⋯

翌日中午

「倩盈呀，你幫我去附近超級市場買嘢呀～」我媽啱啱番到嚟屋企便對我講道

「買咩呀？你啱啱唔係出去買完嘢咩？」我從梳化起身行到去廚房，「你唔一次過買埋？」

「我唔記得咗買呀嘛～嚟啦～你幫我去買兩盒雞蛋啦好唔好？」我媽企喺洗手盆前回頭望向我講道，「最多比錢你順便買啲零食番嚟啦～」



「唔⋯」我諗咗一陣，咁對我又冇壞處嘅，「好啦～」

我換咗件衫就出門口，去到附近嘅超級市場幫我媽買嘢

我推住手推車行到雪櫃嗰邊，從架上拎咗兩盒雞蛋放到手推車中，當然，買兩盒雞蛋就唔洗手推車嘅，不過如果話要加埋零食啦喎⋯又唔同講法啦～

「買咩零食呢～」我一邊喃喃自語，一邊行到去零食架前，「食薯片好唔好？定買糖番去食？」

我沿住貨架行，邊行邊打量着貨架上嘅零食，見到中意食嘅就拎一包兩包落嚟放到車中

「拎一包呢個先～」我隨手又喺架上拎咗一包薯片落嚟放到車中，「買唔買啲糖好呢？」

我企喺原地轉身，望向身後放滿各式各樣糖果嘅貨架

「都係買啲啦～」我行到去貨架前，搵到我中意食嘅糖，然後將佢地都放到車中



我買完嘢喺超級市場行出嚟嘅時候，左手拎住一大袋重重嘅零袋，右手攬住兩盒雞蛋

「快啲番屋企⋯好重⋯」我喺心中講道，然後默默地加快咗腳步

「倩盈！」

喺我行出商場行多幾步之後，我忽然間聽到有人叫我，我下意識就回頭望，我怔了一怔

「張景彥⋯？」我喺心裏講出呢個朝我行嚟嘅人

「今日星期日，咁都撞到你。」張景彥自然地對我微微一笑講道

「咁啱呀⋯」我有啲無奈又有啲不情願地苦笑一下講道



我宜家只想轉身就走，我完全唔想多留一秒，每一次同佢單獨喺一個地方，我都覺得好唔自在

「我嚟開呢邊，所以先喺呢度。」張景彥自然地講道，完全唔覺得有咩唔自在一樣

「哦⋯係呀⋯」我微微點頭故作了解，然後連忙講道，「我都要番去啦⋯！」

「你一個人拎唔拎到？好似好重咁⋯」張景彥望向我手上拎住嘅嘢

「我拎到㗎啦！」我下意識縮一縮手，將左手稍微收到身後，「我走先啦，拜拜！」

我連忙轉身就走，喺我轉身嘅一刻，我收起咗笑容

今日到底係啲咩日子？黑色星期日？點解咁都會撞到張景彥？

佢平時好日都唔嚟呢邊⋯呃⋯都會嚟嘅，送孫慧伶番屋企嘅話⋯



「我都太黑仔啦掛⋯」我喺走遠咗之後細細聲地自然自語講道，「今日係星期日呀⋯」

我拎住雞蛋同零食番到屋企，將零食放到零食櫃中，雞蛋就咁放咗喺洗手盆旁邊，然後行番房換件衫

「我都太黑仔啦掛⋯」我坐喺書枱前諗起啱啱撞到張景彥時不禁又講道

以前想撞佢嘅時候，去到邊都撞啱到佢；宜家啱洗啦，就下下都會見到佢⋯搞咩呀⋯次序亂晒⋯

佢有女朋友㗎啦，比人見到佢同我一齊嘅話，幾唔好呢⋯

「見到佢就只會有啲唔好嘅回憶⋯」我仰頭望住天花板，手輕拍着額頭

見到張景彥，我諗起嘅都係佢之前對我嘅冷淡⋯去到今日，我唔想同佢做番朋友⋯我唔想大家誤會



我唔想岑諾新誤會我係唔係對張景彥心軟落嚟⋯我唔想孫慧伶誤會我同張景彥之間嘅關係⋯更唔想張景彥誤會我已經忘記過去可以同佢做番朋友⋯

對大家都唔好嘅結果，冇出現嘅必要

「好，就係咁。」我拍一下手，令自己嘅思緒變得清晰，「唔會做番朋友，冇留戀嘅必要。」

⋯

「我就話嘛～套劇好好睇，你又唔信，琴晚睇咗啦，信啦～」希童對詠妍講道

「信啦！係真好睇！即刻就忍唔住睇番晒咁多集！」詠妍激動地講道

我地啱啱食完飯，行緊番去學校，講緊琴日希童推薦嘅校園戀愛劇

本來詠妍仲話佢冇興趣，結果琴晚佢自己一次過睇晒11集，補埋之前嘅集數




IG Link: https://www.instagram.com/nd_cotttoncandy/?hl=zh-tw