［愛情純愛］既然忘記唔到佢，不如試下中意我⋯？: 111. 不想碰面

「難怪琴晚都唔覆我地機啦～」我用手肘撞一撞詠妍，「原來掛住煲劇！」

「忍唔住，真係好好睇嘛～」詠妍一臉無辜地講道，「點知會咁正啫～」

我地行喺路上，我眼睛嘅餘光見到張景彥喺一旁嘅嘅餐廳同佢嘅朋友一齊行出嚟

我下意識就移開視線，迴避佢所在嘅位置，然後更加緊貼住詠妍行

番到學校之後，我有啲口渴，便拉住詠妍同我一齊去買嘢飲



「你去買，我想去廁所⋯」詠妍好似好急一樣喺原地輕跳兩下，然後甩開我隻手轉身就朝廁所跑去

我望住詠妍飛奔嘅身影，只可以無奈一笑，然後轉身獨自一人行去小食部

「要枝蘋果綠茶。」我對阿姨講道

阿姨聽到之後轉身，喺雪櫃中拎出一枝蘋果綠茶放到我面前嘅枱上，我自動自覺地將$7.5放到枱上，阿姨順手就將錢收走放入收銀機

「阿姨，要枝水。」



先前腳行開，張景彥後腳就嚟到⋯我眼尾瞄到佢，但我打算扮睇唔到佢就係⋯

「又見到你。」張景彥行到我身旁對我講道

係呀⋯又見到你⋯真係黑仔到⋯

「嗯⋯」我無奈一笑，「咁啱呀⋯」

「你唔番上去呀？就嚟夠鐘上堂啦喎⋯」張景彥望一望手錶然後問我



「我等埋詠妍。」我簡單又直接咁回答，想快啲終止我同佢嘅對話

我一直望住走廊嗰邊，見到詠妍嘅身影時，我心中頓時鬆一口氣

「詠妍！」我跑向詠妍，立馬捉住詠妍嘅手，拉住佢轉身朝後梯行去，「行後梯番上去⋯！」

「吓⋯？」喺狀況外嘅詠妍就咁樣比我拉住行

我拉住詠妍行到去後梯，踏上梯級嘅瞬間，我輕呼一口氣

「做咩突然行後梯？」詠妍回神過來便問道，「同埋你啱啱點解會同張景彥一齊？」

「咪就係唔想同佢一齊，所以先要行後梯⋯！」我回頭望咗一眼，確定身後冇人，「買枝嘢飲都可以撞到佢⋯」

「你最近好似成日都見到佢咁嘅最近⋯」詠妍輕皺起眉頭對我講道



「我都唔知點解我成日都會見到佢⋯」我無奈地嘆咗一口氣，「以前想成日撞到佢嗰陣又撞唔到佢，到宜家我唔想成日見到佢嘅時候，就成日都撞到佢⋯」

「比岑諾新知道嘅話，點算？」詠妍忽然間問道

我頓時怔了一怔，係呢⋯岑諾新知道嘅話，會講啲咩⋯？

佢應該會⋯先淡然地同我講「嗯，我知道」，然後默默地呷醋，諗起都覺得可愛

「唔知道⋯」我無奈一笑講道，「反正，我又唔係中意張景彥⋯」

「張景彥真係好奇怪⋯唔知孫慧伶知唔知佢咁樣搵番你呢～」詠妍提起孫慧伶，「定佢兩個真係嗌咗交呢？」

「如果係因為咁樣嘅話，咁佢當我係咩？我又唔係當初嗰個我⋯」我堅決地講道，「我唔會再一次為佢停低⋯」



張景彥，無論你同孫慧伶之間發生咗咩事都好，都已經與我無關⋯

我行到番去課室，岑諾新正坐喺位睇手機，枱上放着嚟緊呢堂嘅書

見到岑諾新之後，我心裏更加肯定，我同張景彥，已經冇可能

「做咩一番到嚟就一直望住我？」岑諾新察覺到我嘅視線一直停留喺佢身上

「嘻⋯冇咩呀～」我笑着搖搖頭

「奇奇怪怪⋯」岑諾新無奈一笑

啱啱嘅事，都係唔好同佢講比較好，我唔想佢諗太多，唔想因為張景彥影響到我同佢之間嘅關係

我喺自己嘅位坐低，雙手托住下巴，微微側着頭望向岑諾新



「岑諾新。」我叫咗佢一聲，佢抬頭望向我，視線離開手機嘅螢幕，「今日放學，係唔係一齊番去？」

「你約咗佢地咩？」岑諾新問我，佢下意識覺得我唔同佢走嘅話，應該都係同詠妍佢地一齊

「唔係呀～」我笑一笑講道，「都問一問你嘛～」

希童忽然間回頭望住我，然後又望咗岑諾新一眼，我察覺到希童嘅視線，便有啲不解地同希童對望

「你地，考慮下我嘅感受⋯」希童無奈地講道，「係咁閃閃閃⋯我要盲啦⋯」

「邊有閃你呀⋯！」我無奈地反一下白眼，「好正常嘅對話囉！」

我朝岑諾新望咗一眼，岑諾新托住腮冇比啲咩反應，就係同平時一樣淡淡然的



⋯

放學嘅鐘聲響起，敬禮落堂之後，我企起身將要帶番屋企嘅書都放入書包入面，其他都放入locker

岑諾新拎住啱啱派番嚟但又要即堂收番嘅功課file行出去老師枱

我企喺原地望住佢，佢企喺老師旁邊，阿sir掀開佢嘅file check緊嘢一樣

「重改⋯？」我喺心中自言自語地問道

阿sir拎起佢個file，同岑諾新講咗兩句之後，岑諾新點點頭，然後將file交喺枱上，隨即行番位執嘢




IG Link: https://www.instagram.com/nd_cotttoncandy/?hl=zh-tw