「講明先呀,你唔可以飲凍嘢。」我對準備遞手叫落單嘅岑諾新講道,「陣間飲完又頭痛呀⋯」

「知啦知啦⋯」岑諾新有啲無奈咁笑一笑

落完單之後,我同佢都習以為常咁拎手機出嚟,我將手機放喺一旁,佢見我冇睇手機,佢都冇睇

岑諾新嘅手機一放低喺枱上時就震咗一震,我下意識就望向佢嘅手機,岑諾新拎起手機望咗一眼,又將手機放番低

佢一將手機放低,手機又震,佢又拎番起手機



「嘖⋯」岑諾新唔耐煩地嘖一聲,好少見佢會咁樣

應該話,好少會見岑諾新唔耐煩到有咁嘅反應,佢最多都係唔理,但今次居然出聲啦

「做咩呀?」我有啲好奇,但又有啲怕佢嬲,唯有小心翼翼地問道

「冇咩,無謂嘢嚟。」岑諾新將手機放番喺枱上

「哦⋯」我微微點頭,冇將啱啱嘅事放喺心上



我喺等緊嘢食嚟嘅時候,反正都冇嘢做,拎起手機睇一陣都唔過分

我習慣地睇IG,剛好第一個story就係張景彥嘅story,我順手就㩒入去睇

張景彥同佢班friend一齊食飯,下一個story咁啱係孫慧伶嘅story,孫慧伶又係一樣同自己嘅朋友一齊

「佢兩個最近好似冇點一齊咁⋯」我喺心裏講道

之前佢地好似糖黐豆咁樣成日一齊,佢兩個嘅story都係佢地一齊去食嘢去玩嘅放閃嘢嚟



最近好少見到佢兩個一齊嘅story,多數都係佢地各有各同朋友一齊,好間中先會有一齊嘅story

「聽講佢兩個最近關係唔係幾好⋯」

我諗起詠妍之前同我講嘅嘢,唔通係真嘅⋯?

算啦,就算佢地嘅關係真係一般,咁都唔關我事⋯我都係唔好諗咁多比較好

「發咩呆?」岑諾新問我,佢嘅一聲真係即刻令我回神過嚟

「嗯?冇呀~」我微微一笑,搖搖頭

「陣間數學堂好似會派數學統測。」岑諾新忽然提起統測

「吓!?」我頓時慌張起嚟,「今、今日派!?」



「係呀⋯」岑諾新見到我慌張嘅模樣,忍唔住笑咗出嚟,「你咁驚做咩?怕唔合格?」

「梗係怕⋯!」我哭喪著臉講道,「呢課我真係冇信心合格⋯啲角度轉嚟轉去,轉到我頭都暈⋯」

「但下個月就考試,必考,而且一定溝埋其他嘢嚟考。」岑諾新淡定咁講道

「希望我喺考試前可以理解到呢課講咩⋯」我講道,「如果今次合格嘅話,真係謝天謝地⋯!」

「你唔明,直接問我,我教你。」岑諾新輕輕一笑後講道

「嘻⋯好呀~」我點點頭,「就係等你話教我~」

岑諾新拎起啱啱放到佢面前嘅熱檸水飲咗一啖,我偷偷一笑後便耷低頭睇手機



「你最近好似都唔洗點補課咁嘅?」我提起補課嘅事

最近放學,岑諾新都唔洗補課,都可以同我一齊走,唔⋯其實就算佢補課,我地都係一齊走嘛

「最近上堂教嘢都幾快,又追得上進度,所以冇補課。」岑諾新托住頭講道,「唔洗補課咪好。」

都啱嘅~正正常常放學咪幾好,有邊個會唔想放學番屋企休息Hea下,想補課咁有趣㗎?

我地食完飯之後番學校,喺經過便利店嘅時候,我下意識就向便利店望去,見到張景彥同孫慧伶一齊

咦⋯?啱啱佢地兩個唔係分開食飯㗎咩⋯?

「喂!」忽然有人拍咗我一下,我整個人都窒咗一下,嚇咗我一跳

我同岑諾新同時回頭望,見到詠妍佢地三個一齊,睇嚟佢地都食完飯番學校



「嚇死我⋯」我拍拍心口,無奈地對詠妍反一下白眼,「仲以為邊個⋯」

「做咩嚇親你呀~你做咗咩虧心事?」詠妍開玩笑地問道

「冇囉⋯!」我連忙講道

我望咗岑諾新一眼,只見岑諾新耷低頭睇手機,冇聽到我地講緊啲咩,或者係因為一個男仔同幾個女仔一齊行覺得唔自在啦

食完lunch之後再上一堂,就又有一個15分鐘嘅小息

我同詠妍一齊出咗課室去一轉小食部,買個飲嘢迎接最後兩堂

「統測好彩合格咋⋯!」詠妍比我先一步講出口



「我正想咁樣講⋯做咩搶先講呀!」我高興地捉住詠妍嘅手,詠妍真不愧係我好朋友~我同佢真係特別心有靈犀,「我好彩都合格咋~」

「不過其實真係撞彩,上堂嗰陣真係明一半又唔明一半⋯考試點算呀⋯!」詠妍就好似今日晏就嘅我一樣,一副苦瓜乾嘅表情

「我都係咁諗呀!」我激動地講道,「我都諗緊考試點算呀!希望考試嗰陣唔好出啲咁難嘅題目。」

我再邁出一步行落下一級,豈料我踩咗個空,雖然前面係平地,但喺踩空前傾嘅一刻,都係嚇到心都離一離

「小心。」有人一下子捉住咗我嘅手腕




IG Link: https://www.instagram.com/nd_cotttoncandy/?hl=zh-tw