［愛情純愛］既然忘記唔到佢，不如試下中意我⋯？: 119. 大事不妙⋯！

「唔⋯該⋯」我企番好，然後抬起頭，嗰個人就企喺我面前

點解會係張景彥⋯？我愕一愕然，佢嘅手仍然捉住我嘅手腕，我同佢企得好近，我同佢嘅鞋頭之間都只剩一道小縫

張景彥忽然間朝我身後嘅方向望去，然後鬆開我隻手，朝我友善地微微一笑講道：「下次小心。」

「倩、倩盈⋯！」喺張景彥對我講嘅同時，詠妍拉拉我嘅衫角，故意壓着聲線細聲地講道

張景彥講完之後繞過詠妍，從詠妍嘅身旁朝樓上行去



我有啲好奇啱啱我後面有啲咩，佢望緊詠妍？我回頭望過去，睇下佢到底⋯望到⋯啲咩⋯

岑諾新企咗喺上面，佢身旁企着楊朗然，楊朗然同詠妍嘅表情一模一樣，完全就係刻住「大事不妙」四個字喺臉上，楊朗然直接倒抽一口涼氣

「我⋯」我望住岑諾新想要解釋嘅時候突然間啞口無言

岑諾新淡然地望咗我一眼，咩都冇講，行到中間扶手嗰邊落樓梯，直接從我身旁經過

「大、大佬⋯！」楊朗然見到岑諾新嘅反應，慌張咗一秒，然後快步跟喺岑諾新嘅身後落樓梯



我企喺原地⋯呆咗⋯咩事呀啱啱⋯？我望向詠妍，詠妍一臉慌張咁望住我

「好似大型捉姦現場咁⋯哈⋯」詠妍都目瞪口呆，無言地笑咗一聲

「點算呀⋯？」我無助地問詠妍

「我、我點知呀⋯我都唔知佢幾時喺度⋯」詠妍都無助地望住我，手指住啱啱岑諾新企嘅位置，「我擰轉頭嘅時候佢就喺度啦⋯」

宜家最無助嗰個，係我呀⋯！



⋯

放完第二個小息開始上堂之後，我總係偷偷地望向岑諾新

「我真係冇心㗎⋯！」我喺心裏無辜地喊冤

岑諾新專心地聽書，我心裏淨係擔心緊我陣間要點樣同佢解釋先好

我真係唔係特登㗎⋯！我都唔知佢會咁啱喺我面前行上嚟⋯！

最後嘅兩堂我心裏得不安嘅感覺，本來仲以為可以因為數學統測合格而開心一陣添㗎⋯

「叮噹叮噹⋯叮噹叮噹～」

放學嘅鐘聲響起，我仲諗緊點算好呀⋯！今日做咩咁快就放學㗎⋯！



老師喺出面老師枱執緊嘢，岑諾新起身時將櫈推後嘅聲音響亮，我抬頭望向佢，但岑諾新卻望都冇望我，徑直地走向locker嘅方向

我頓時拎起要放入locker嘅嘢行執locker嗰邊，迅速地將自己嘅嘢都放入locker後攝手攝腳地行到岑諾新嘅身旁

「我⋯執好啦，等埋你～」我主動地先開口對岑諾新講道

「嗯。」岑諾新冷冷地回答我

明明平日佢好多時都係咁答我呀⋯但呢一刻呢個「嗯」好明顯冷淡咗好多

我回頭望向詠妍嘅方向，詠妍苦笑咗一下，我望向楊朗然嘅方向，楊朗然都只係默默地笑咗一笑，而我，都只可以一臉無言

岑諾新開完locker行番埋位，我跟喺佢身後行番埋位行到一半嘅時候，忽然間比楊朗然同詠妍拉住咗



「做咩呀？」我細聲地問道

「你好似上次佢嬲咁氹番佢就係啦⋯！」楊朗然細聲地對我講道

「你同佢講啲咩情話呀～嗲佢兩下就係啦！」詠妍捉住我嘅手提點道，「咩寶寶BB親愛的都好啦⋯！」

「我冇諗過佢會見到仲會嬲㗎嘛⋯！」我慌張地講道

「你氹嘅話一定可以啦！」楊朗然對我講道

岑諾新執好嘢孭起書包，然後朝企喺壁報板前講悄悄話嘅我地望過嚟，我頓時小急步行番埋位，回頭望咗楊朗然同詠妍一眼，佢兩個為我無聲大氣，我都深呼吸一口然後孭起書包同佢一齊離開課室

佢一直都冇同我講嘢，什至望都唔望我一眼，上次都好似試過一次⋯

我同佢兩個人企喺巴士站等車，佢寧願望下巴士幾時嚟都唔望我，我心裏都慌張死啦⋯！



企喺佢身旁嘅我坐立不安，我偷偷地抬眼瞄佢一眼，佢一時耷低頭睇手機，一時望向遠方睇下巴士幾時嚟，就係唔望我！

我試探般對佢伸手，試下拖佢，佢應該唔會甩開我隻手之類掛⋯

「佢冇甩開我～我就知佢唔會咁狠心～」我喺心中暗自歡喜地講道

我悄悄地用指腹將佢嘅指縫撐開，然後同佢十指緊扣地拖住手，佢冇甩開我隻手，只係冷淡地望咗我一眼

真冷淡定同平時一樣時，我都係分得清嘅！

巴士嚟到，我同岑諾新一如既往咁上樓上，喺較後嘅位置坐低

「岑諾新⋯！」我叫佢嘅同時，握一握緊佢隻手






IG Link: https://www.instagram.com/nd_cotttoncandy/?hl=zh-tw