「我⋯!」我一時間竟然無言以對,唔知講咩好

我望住岑諾新,岑諾新望咗我一眼之後緩緩地撇開臉唔望我

「岑諾新⋯你話咗已經唔嬲⋯」我一臉無辜地講道,我抬起頭微微踮起腳尖望住佢,雙手搭喺佢膊頭上,「唔可以反口。」

我定睛望住佢,岑諾新悄悄地將視線落喺我身上同我對望着

「都話嬲唔落。」岑諾新對我柔聲地講道



岑諾新將喺我額前嘅髮絲撓到耳背,佢微微耷低頭,唇輕輕地碰咗我嘅唇一下

「捨得番去未?」岑諾新柔聲問我

「捨得!」我有啲羞澀地點點頭,然後將手放喺佢嘅額頭上,「你快啲番去休息,陣間又頭痛⋯」

「知啦。」岑諾新微微點頭

「頭痛嘅話記得食藥呀⋯」我提醒道,「知唔知?今晚早啲瞓。」



「知啦知啦。」岑諾新沒好氣地笑,「你當我係3歲小朋友咩?」

「好啦,咁我番去啦~」我鬆開攬住佢嘅雙手,「你番到去話我知。」

我番到屋企之後,坐喺梳化上,回想起今日小息嘅狀況⋯

當下我真係嚇到心跳都停止咗一樣,明明我咩虧心事都冇做,但係我當下好怕岑諾新會誤會啲咩,怕佢會以為我同張景彥之間仲有啲咩⋯

但諗到佢親口承認佢因為見到我比張景彥扶住而呷醋,我有啲心花怒放嘅感覺⋯第一次,有人為我呷醋⋯感覺好新鮮,好開心



我感覺到放喺裙袋嘅手機嘅震動,我拎出嚟一睇,見到係張景彥搵我

張景彥:你冇事?

咩我有冇事?講緊咩⋯突然間無啦啦又搵我做咩⋯

「?」

張景彥:岑諾新佢冇誤會啲咩嗎?

張景彥:如果佢誤會咗,唔好意思

「冇,佢冇誤會」我淡然地回覆道

咁你想佢誤會啲咩?想佢誤會我同你有嘢?定覺得我同你夾埋?



張景彥:咁就好

我望住佢send過嚟嘅message,我無奈地白了一眼

「咁就好⋯比你累死⋯搞到我比佢嬲咗⋯」我鎖上手機螢幕,自言自語地講道,「真係多謝你⋯」

我喺梳化都坐夠,起身去沖個涼,溫一溫書,聽日好似有默書,溫一下

我一直坐喺書枱前溫書直到夜晚6點幾,然後先收起書,灘喺床上休息一陣

「呀⋯好攰呀⋯個腦都要停止運作啦⋯」我灘喺床上自言自語地講道,「溫個書都溫到咁,攰死⋯」

我灘喺床上望住天花板,不禁喺起岑諾新,唔知佢做緊啲咩呢⋯



「有啲掛住佢⋯」我將手臂蓋喺眼前,細細聲地講道

我將手臂從眼前移開,指腹輕輕地放喺唇上,諗起今日嘅kiss⋯今日嘅kiss好甜,呢種甜係因為知道佢呷醋嘅甜⋯

「我今日好似有啲⋯太主動⋯」我嘅嘴角微微上揚,心裏甜甜地講道,「但結果好似都唔錯⋯」

X⋯X⋯X

「呼⋯」我番到屋企,坐喺書枱前將領呔解開

我坐定咗喺度就唔想郁,好攰,有啲眼瞓⋯琴晚同蔣倩盈一直傾計傾到2點幾快3點,朝早7點又起身番學

我拎起手機,send咗一個「番到屋企」嘅message比佢

今日真係事多⋯其實我知張景彥只係扶一扶佢,但我就係下唔到氣⋯我都只係嬲正常人會嬲嘅嘢



蔣倩盈:Okay~

我望一望震動嘅手機,見到係蔣倩盈嘅回覆

我好似比我想像中⋯更在乎佢同張景彥嘅關係⋯我就係唔中意佢同張景彥喺一個咁近嘅距離⋯

「煩⋯」我喃喃自語地講道,然後將除咗落嚟嘅呔掉到床上

但今日嘅佢,比平日嘅佢⋯更加主動⋯

「哥哥!哥哥!」我嘅房門忽然間比人一下子打開,岑諾嵐一番到嚟就即刻好嘈

「你好嘈⋯」我無奈地講道,「驚死人唔知你番咗嚟⋯」



「哥哥你睇!」嵐嵐跑到我張櫈旁邊,將一份小測遞咗比我,「我考滿分!」

我接過佢份卷,佢份卷上又真係寫住大大個「100」喺度,老師仲貼咗張貼紙喺佢份卷上

我望一望嵐嵐,佢雙手捉住我嘅前臂,好似期待緊啲咩一樣望住我

「叻啦叻啦⋯」我無奈一笑,伸手摸一摸佢嘅頭頂,「下次都努力拎100分。」

「哥哥!你上次話我測驗連續拎三次100分就買嗰個狸貓公仔比我㗎!」嵐嵐微微鼓起兩泡腮對我講道,「我要狸貓公仔!」




IG Link: https://www.instagram.com/nd_cotttoncandy/?hl=zh-tw