［愛情純愛］既然忘記唔到佢，不如試下中意我⋯？: 124. 請保持距離

「我好重㗎⋯你抱唔到就放低我啦⋯」蔣倩盈瞄咗我一眼，紅着臉細聲地講道

「抱到。」我講道，「都唔係真係好重，好輕啫。」

「我咁大個人，可以輕得去邊？」蔣倩盈甜甜地笑起嚟，雙手捧住我嘅臉頰，「我唔係小朋友⋯」

「我抱得起就好。」我望住佢嘅笑容，跟住佢一齊笑，「點呀，洗唔洗飲嘢？屋企好似有維他奶同蜜桃茶⋯」

「睇下睇下～」蔣倩盈從我嘅懷中跳咗落地，然後拉住我行到房門前



望住蔣倩盈，我心裏默默地覺得，或者真係可 以一直同佢一齊，至少呢一刻我係咁諗，我中意同佢一齊嘅感覺

X⋯X⋯X

「好啦唔洗送我番去啦～」我對企喺門前嘅岑諾新講道，「你唔係話聽日有物理測驗咩？」

「唔⋯真係唔洗我送你番去？個測驗我Okay。」岑諾新有啲猶疑

「唔洗啦～呢度番去都好近啫，我自己番去就得啦。」我輕輕捏咗岑諾新嘅臉頰一下



「姐姐拜拜～姐姐下次再嚟屋企玩呀～」嵐嵐對我講道，佢嘅手中仲攬住隻熊啤啤公仔

「嗯好啦～我走啦拜拜～」我講道，喺升降機門打開嘅時候行入去

我落到樓下之後本來朝屋企嘅方向行，但行咗兩步之後，忽然間心血來潮想去超級市場兜個圈，順便睇下我中意食嗰隻即食麵有冇貨，買番兩pack番屋企都好嘛

我頓時轉身朝住超級市場嘅方向行去，一行入去我就朝住我嘅目標行去，行到去最旁邊放滿各式各樣即食麵嘅貨架前

「唔⋯好似⋯有啲高⋯」我抬頭望住放喺高位嘅即食麵



我貼住貨架但，伸直手去拎，我嘅指尖係可以掂到即食麵包裝嘅，只係拎落嚟有啲難度

我嘅指頂住即食麵包裝嘅底，將一袋即食麵慢慢托出嚟

「好彩我聰明⋯」我喺心裏不禁讚自己一下

我將即食麵托到出嚟，用力地掃咗包裝嘅底一下，整包即食麵頓時向下跌落嚟，但我嘅第一反應，係合埋眼，雙手擋喺面前，而唔係接住包麵

「咦⋯？」我回神嘅時候有啲疑惑，「冇嘢跌落嚟打我嘅？」

唔通係啱啱佢其實冇跌落嚟？我小心翼翼地抬頭望，包麵比人一手托住，我沿住嗰隻抬起嘅手望向手嘅主人

「張景彥⋯」我有啲愕然地講出對方嘅名，但我好快就將我嘅愕然壓落去，平淡地講道：「唔該⋯」

「你拎唔到唔叫人幫你拎？」張景彥對我笑一笑，一臉平靜地講道



「唔洗⋯」我接個佢手中拎住嘅即食麵，將即食麵抱喺懷中

「你成日都唔想麻煩人就真。」張景彥講到好似好了解我一樣，我都冇佢咁好氣

我行去比錢，比完錢即刻就拎住包即食麵走麵走唔切番屋企，但行咗出超級市場兩步，張景彥就行到我身旁，佢冇講啲咩，但佢卻同我行同一邊

我知道佢一定唔係順路番屋企，因為佢唔係住呢邊，佢之所以喺度，應該係買嘢掛⋯

同佢並肩而行嘅時候，我地冇傾計冇講嘢，大家都只係安靜地行喺行人路上，佢好似冇咩咁，但我覺得渾身唔自在⋯

「張景彥，你行呢邊嘅？搵孫慧伶？」我先打破沉默開口問佢，因為我真係覺得同佢一齊行嘅時候好唔舒服

「唔係，純粹同你一齊行番去。」張景彥望住我，臉上掛着淺淺嘅笑容



我聽到佢呢句說話，我更覺得唔舒服，佢係送我番屋企嘅意思，我未蠢到咁都get唔到，我默默地深呼吸，喺我正想開口同佢講叫佢唔洗咁做嘅時候，佢卻快我一步開口

「以前都好似冇送過你番屋企。」張景彥開口講道，「我好似成日都用唔同理由去敷衍你⋯」

佢又想講啲咩⋯？我無奈地望咗佢一眼，我拜托你唔好咁樣⋯

就算佢講嘅係事實咁又點⋯嚟到宜家呢一步，呢啲過咗去嘅事好重要咩？講嚟有咩意思？

「我好過份呀可⋯」張景彥忽然間又講道，我無言地望咗佢一眼，發現佢耷低頭苦笑着

「重要咩？我同你都分咗手啦，呢啲事重要咩？」我無奈地講道，唔等佢開口我又道：「都唔重要。」

「你仲會唔會怪我？」張景彥忽然間問道，佢今日做咩要咁樣奇奇怪怪？

「唉⋯我一直都冇怪你好唔好⋯」我更無奈，佢做咩要喺呢個問題上斟酌，「有啲事我一早知，冇怪你嘅必要，就係咁。」



張景彥聽到我咁講之後眉頭一皺，一臉認真咁望住我又問：「你確定你冇怪我？」

「Okay張景彥，如果你係覺得我有怪你，咁樣會令你個心安樂啲嘅話，咁你就當我有。」我嘅耐心比佢耗盡，我輕皺起眉頭，有啲唔耐煩咁講道

「我唔係呢個意思⋯」張景彥輕輕搖頭

「咩意思都好，我同你之間都應該保持一下距離，你有女朋友㗎啦張景彥。」我認真地向前行咗兩步，然後轉身望佢




IG Link: https://www.instagram.com/nd_cotttoncandy/?hl=zh-tw