其實我提醒佢有女朋友嘅同時,都係提醒緊自己⋯我已經揀咗同岑諾新一齊,揀咗岑諾新,我就唔會後悔

岑諾新佢好好,真係好好,佢人好好,對我好好,我中意佢亦中意同佢一齊

我已經因為張景彥而重重咁跌過一次,我唔會再因為同一個人而跌第二次⋯

「你既然中意孫慧伶,你宜家同到佢一齊,你就好好珍惜佢,唔好再拉近我同你之間嘅距離。」我直白地講道,「陣間孫慧伶誤會咁點算?你想佢誤會你定誤會我?」

「蔣倩盈⋯」佢叫咗我一聲,我抬眼望佢



「嗯?」我無奈地應佢一聲,都唔知佢搞啲咩

「我都唔知點同你講⋯」張景彥好似自嘲一樣笑咗一笑

咩意思?咩叫唔知點同我講?佢想講啲咩⋯?佢同孫慧伶之間,唔會真係發生咗啲咩事呀嘛⋯

「其實都唔係啲咩大事⋯」張景彥輕輕一笑,「只係突然間覺得自己之前咁對你好過份,好似利用你嘅中意同你嘅理解而咁樣理直氣壯對你⋯」

嗯,好過份的確⋯因為我對佢嘅中意,因為我知道佢中意孫慧伶,所以佢就可以肆無忌憚咁踐踏我對佢嘅感情⋯



我承認,我的確有嬲過有怨過有恨過⋯但喺我同岑諾新一齊之後,好似慢慢咗放低咗⋯

我地唔可以一直因為過去嘅一件事而停滯不前,人會變月會圓,過去嘅事就由得佢過去啦⋯

「張景彥,嗰啲事都過咗去啦⋯我就算係要怪,我都已經怪完啦⋯」我心平氣和地對張景彥講道,「我同你嘅過去亦完結咗啦,你唔需要因為嗰啲事而內疚。」

張景彥望住我,我感覺佢好似有啲咩要同我講,但我唔想同佢有咁多嘅接觸

「你唔洗同我一齊行番去,好近,而且我唔慣。」我望住佢講道



或者佢聽到我咁講,會覺得我冷漠,但我總唔可能一直對佢都係一樣

我見佢冇出聲,我便自動轉身,攬住我啱啱買嘅即食麵番屋企,我轉身行咗一步,忽然比人拉住

「呀⋯!」我因為突如其來嘅被拉扯,不禁叫咗一聲

我猛然回頭,拉住我嘅,唔係張景彥仲可以係邊個?

「你咩事?」我輕輕挑眉,心裏更覺得唔耐煩

張景彥定睛望住我,我一直轉動着手腕想將佢嘅手甩開,豈料佢將我嘅手腕捉得更實

「張景彥,我叫你鬆開我。」我皺起眉頭,逼於無奈地開口道:「你唔好令我更討厭你。」

張景彥聽到我咁講之後有少許愕然,然後緩緩地將我嘅手腕鬆開,我見佢一鬆開我嘅手腕,頓時將手抽回



「你同我都係保持一下距離比較好。」我提醒道,然後連忙轉身走

我一番到屋企,成個人都鬆晒,啱啱張景彥嘅表現同神情,就好似有啲咩發生咗,有嘢要同我講一樣

但對於佢想講啲咩,我冇興趣知⋯佢同孫慧伶一齊,係佢揀,佢中意咗孫慧伶咁耐,同到人地一齊就好心佢珍惜下

「唉⋯煩死人⋯」我不禁細聲地講道

聽日同詠妍講一下先得,今日嘅事太衝擊⋯



翌日小息嘅時候,我同詠妍一齊出課室去廁所



一踏出課室嘅門口,我即刻拉住詠妍細細聲咁講:「我開始懷疑你上次話佢兩個關係唔好係真⋯」

「上次?佢兩個?邊個呀?」詠妍一時間理解唔到我講緊邊個,一臉疑惑咁望住我

「張景彥同孫慧伶呀⋯」我細聲地講道

「做咩突然間咁講?」詠妍對於我講起佢地有啲訝異,「佢搵你咩?定你又一時心軟呀?」

「呀?我冇囉⋯」我即刻否認自己心軟,「但琴日我又撞到佢,仲比佢捉住講咗一陣嘢⋯」

「吓!?」詠妍好大反應,即刻一臉緊張地捉住我,「佢同你講啲咩呀?」

「佢問我有冇怪佢,又話佢覺得之前咁對我好過份⋯」我諗起琴日張景彥同我講嘅嘢,「佢好奇怪,突然間好似懺悔一樣,搞到我好唔習慣⋯」

「佢做咩突然間咁好心?發神經定想睇下你會唔會心軟?」詠妍一提到張景彥就有啲嬲嬲地,「你唔好比佢咁樣講兩句就心軟呀蔣倩盈。」



「我唔會囉,你當我係邊個咁好恰?我只係覺得佢咁樣好反常⋯」我無奈一笑後又一臉認得地輕皺起眉頭,「我唔知佢係唔係因為同孫慧伶發生咗啲咩事,所以先番嚟搵番我⋯」

諗起琴日我提起孫慧伶嘅時候,佢答我唔知點同我講好,我就覺得可能佢地發生咗啲咩事

「就算係又好唔係都好啦,佢hurt咗你啦都,傷口係會好番,但傷過就係傷過,你會想比佢傷第二次?」詠妍輕輕拍我嘅手背,「當初係佢先放棄你,咁佢宜家番轉頭又當你係咩?」

「我唔知佢想點⋯亦冇必要知佢想點⋯」我微微耷低頭細聲地講道

「宜家你同岑諾新好好咁一齊,唔好因為一個唔值得嘅人而停低,特別係對張景彥。」詠妍提醒我講道,「唔通你唔中意岑諾新咩?」




IG Link: https://www.instagram.com/nd_cotttoncandy/?hl=zh-tw