「我唔係呢個意思⋯」我搖搖頭

我又點會係唔中意岑諾新⋯?我中意佢,當然中意佢,我亦冇打算為咗張景彥而停落嚟或者為佢回頭,張景彥做過啲咩,我嘅難受都烙喺心底,我講過,我唔會比佢傷第二次

詠妍忽然間輕輕拉咗我一下,我望向前方見到張景彥朝我地迎面行嚟,我下意識就迴避佢嘅身影,朝其他地方望去

張景彥望咗我一眼,我眼尾嘅餘光見到佢嘅視線落喺我身上一秒,但大概因為詠妍喺我旁邊,而且我地喺學校,所以佢唔會同我搭話

張景彥喺詠妍嗰邊走過,我喺佢行過咗之後偷偷地回頭望咗一眼,詠妍頓時拉一拉我隻手



「你做咩要咁心虛啫?」詠妍輕皺起眉頭,「唔通佢仲可以喺學校光明正大咁同你講嘢咩?」

「我怕啫。」我細聲地講道,「我都唔知佢想點,我好怕佢會同我講嘢,佢一同我講嘢,我就周身唔自在⋯」

「蔣倩盈,佢會唔會係想搵你復合?」詠妍忽然間腦洞大開咁同我講

「吓?唔會掛,咁驚?」我聽到詠妍咁講,心裏一顫,淨係諗下都覺得好可怕,「一定唔會係,你唔好亂講⋯!」

詠妍係最明白所有事情嘅來龍去脈嘅人,所以佢極力阻止我對張景彥心軟



「知啦知啦,知你心入面已經有岑諾新啦⋯」詠妍沒好氣地講道,「你陣間就番去搵岑諾新撒個嬌啦⋯我都冇你咁好氣⋯」

去完廁所番到課室,我行番埋位嘅時候,視線自動地嘅停喺岑諾新嘅身上,佢正坐喺位低頭溫緊物理

陣間係elective嘅堂,佢有物理測驗,所以我都係唔好打擾佢溫書比較好

望住佢一副專注溫書嘅模樣,我嘅心跳變快,總覺得望住認真專注時嘅佢,魂魄都要比佢勾走似的

岑諾新偶然抬頭,剛好就同我嘅視線對上,佢見到我望佢望得入神一樣,佢默默地笑咗一笑,然後又耷低頭繼續溫書



我不禁臉頰一熱,然後行番去自己位坐低

最近我愈嚟愈覺得佢好睇,應該話佢本來就好睇,只係最近我愈嚟愈中意望住佢

以前我覺得岑諾新就好似一座冰山一樣,講句嘢都冷淡過人,但宜家我卻覺得佢好似比我逐步逐步融化緊一樣

「倩盈你笑咩呀?」希童唔知幾時行到嚟我旁邊,佢探頭望住我

「嗯?冇笑咩呀~」我下意識否認道,然後搖搖頭

「大佬!過去未?」楊朗然行到過嚟,企喺岑諾新嘅身旁

「過去。」岑諾新講完之後,佢推開張櫈企起身

楊朗然見岑諾新起身拎起書便先行一步,行喺岑諾新嘅前面



岑諾新行出位,我企喺位攬住書同筆袋等埋希童,忽然間感覺到有人輕拍咗我嘅後腦勺一下

我抬頭望,見到岑諾新嘅手緩緩垂低,佢回頭望向我,對我輕輕一笑

「無聊⋯」我耷低頭笑一笑,細聲地講道

我伸手放喺自己嘅後腦勺上,心裏嘅甜意瞬間散發出嚟,明明冇食糖,但卻感覺甜甜膩膩

「倩盈!」希童企喺自己位叫我一聲,我望向佢,然後就行出位同佢一齊去上堂

X⋯X⋯X

「叮噹叮噹,叮噹叮噹~」



放Lunch嘅鐘聲響起,亦到咗落堂嘅時間

「喂喂,今日喺小食部食飯!」楊朗然行過嚟拍我,「阿風佢地一齊。」

「你係唔係講廢話?唔通阿風佢地會突然自己出去食?」我無奈地講道,「掉低我同你兩個人喺學校?」

「大佬,我都係提一提你啫~」楊朗然即刻笑笑口講道,「你唔好對我咁冷淡啦~你咁樣會單身一世⋯」

「你暗戀我咩?」我望住楊朗然無奈地講道

「吓?梗係唔係啦!」楊朗然即刻講道,然後一臉嫌棄咁望住我,「我中意女人㗎⋯你有女㗎啦⋯」

「咁我對你冷淡同我會唔會單身一世有咩關係?」我更加無奈

我對楊朗然其實一直都係咁嘅態度,我唔係因為討厭佢而咁樣對佢,佢都習慣咗我係咁樣,只係佢中意抱怨一下我對佢冷淡



楊朗然同我都friend咗一時間,我冇同佢講,但我其實覺得佢稱得上係我好兄弟

我同楊朗然番到課室,我行番埋自己位罷嘢,我望向阿風個位,佢上堂啲嘢放晒喺枱面,佢應該落咗去

「你今日同佢地食飯定同我食呀?」蔣倩盈行到我身旁,雙手放喺背後,一副乖巧嘅模樣

「我今日同楊朗然佢地食飯。」我微微彎腰將啲嘢收入櫃桶,「佢地唔同你食飯?」

「唔係呀,不過諗住先問一問你咋嘛~」蔣倩盈笑咗一笑,然後忽然間提手,手放到我嘅後頸




IG Link: https://www.instagram.com/nd_cotttoncandy/?hl=zh-tw