［愛情純愛］既然忘記唔到佢，不如試下中意我⋯？: 128. 我要了

我地幾個坐喺一旁食飯，都係聽佢地講下嘢，講下最近啲無謂嘢搞笑嘢，男仔邊有咁多心事要傾？

佢地幾個食飽飯之後又開始講女仔，我都係喺一邊聽，我都好少會加把口同佢地一齊講

「我地班啲女仔其實都幾靚，靚女多過隔離班好多。」

「嗯嗯！感覺身材都唔錯添呀！」

「我地班啲女真係唔差，趁仲未畢業快啲搵番個嚟做女朋友！」



「話出pool就出pool呀？你估係呼吸咁簡單？」

「楊朗然你同班女咁熟，有冇中意邊個呀？」阿風忽然間問楊朗然，我都不禁望一望佢

「冇囉⋯」楊朗然反一下白眼講道，「你係點樣得出我會有中意嘅人嘅結論？」

「張希童囉～你兩個好似都幾熟㗎～」另一個男仔講道

「熟就要一齊㗎啦咩？」楊朗然一臉無奈地講道，「我又唔恨出pool嘅～」



楊朗然咁講又好似真係，都冇聽過佢話中意邊個留意邊個，佢真係好似完全冇對邊個女仔有興趣一樣

「你覺得邊個靚？」楊朗然忽然間用手肘撞咗我一下問道

「你想玩死佢咩？佢有女㗎啦～唔可以亂講嘢。」阿風即刻一臉認真咁講道，但我冇諗過下一秒佢卻微笑着望我：「不過我地唔會同你條女亂講㗎嘛～你可以大膽講。」

我都唔知我可以點⋯佢地係想挖個墳比我⋯？但佢地一個二個都一臉期待咁望住我⋯

「冇留意其他女仔，最靚嗰個我要咗啦～」我笑住講出一個一定唔會死嘅答案，「就係咁。」



「Wu～」佢地即刻就起哄，見佢地起哄，我不禁失笑

「點呀⋯？」我笑問道，「想點呀你地？」

「蔣倩盈喺度嘅話，佢一定冧死！」阿風講道

「你兩個都拍咗拖大半年，仲咁sweet嘅？」坐我對面嘅男仔笑道

大半年，其實都唔係真係有大半年，所以宜家其實仲係我同蔣倩盈嘅熱戀期，應該

「Okay啦。」我聳聳肩道

「不過我都覺得蔣倩盈唔差，樣同性格都。」楊朗然忽然間講道，然後佢望我一眼又道：「我冇其他意思。」

「咁佢性格又真係幾好嘅～」我附和佢講道



「大佬，你喺呢度唔洗咁講㗎喎～」阿風伸手拍一拍我

「我冇講大話，佢真係好。」我用認真嘅語氣講道

「你睇你幾識揀呀岑諾新～」阿風笑道，拍咗我膊頭兩下

「一講曹操，曹操就到呀！」坐我對面嘅男仔講道

我回頭望過去，見到蔣倩盈同余詠妍佢地一齊，佢地仲行緊過嚟呢邊

佢地行到過嚟，企喺我地坐緊嘅枱隔離，因為佢地落嚟買嘢飲，飲品機剛好喺我地隔離，而呢部機什至係蔣倩盈去慣嗰部

「蔣倩盈你啱啱唔喺度真係嘥晒～」阿風對蔣倩盈講道，我瞬間望向阿風



「你地講倩盈壞話呀？」余詠妍即刻比反應，「講咗啲咩壞話呀！」

「我地大佬喺度，邊敢講佢壞話？」楊朗然嘅手搭喺我膊頭上面，「而且我地大佬係護妻狂魔嚟～」

「我講事實又係護妻狂魔？」我無奈地拎起放喺我面前嘅嘢飲飲咗一啖，「你班人真係抽到水就抽⋯」

我嘅視線落喺啱啱彎腰拎嘢飲嘅蔣倩盈身上，蔣倩盈拎住佢啱啱買嘅蜜桃茶行到嚟我身旁

「你講咗啲咩呀？」蔣倩盈一臉好奇咁樣望住我問道

「冇。」我望住蔣倩盈，微微一笑講道，「冇講啲咩。」

「聽完會打冷震⋯！」楊朗然雙手抱住自己嘅雙臂

「好似係你地自己問我⋯」我無奈地望咗佢地一眼，「我都係講事實啫。」



「所以你講咗啲咩呀到底？」蔣倩盈雙手捉住我嘅手臂搖咗兩下，「你同佢地講咗咩呀？我都想知呀～」

「冇咩呀，唔好聽佢地亂講啦⋯」我無奈地笑咗一笑

「好啦～我地番上去先啦～」蔣倩盈鬆開我隻手，然後從裙袋中拎咗筒糖出嚟放到我面前後就同余詠妍佢地一齊番去

我坐好起嚟，拎起放喺我面前嘅糖，回頭望向蔣倩盈

蔣倩盈好似知道我會擰轉頭一樣，佢都回頭望我，對我甜甜一笑，笑到我心都甜埋

「哦～」佢地又開始起哄，面對佢地嘅起哄，我沒好氣地笑着搖頭

「點呀又⋯」我無奈地將糖嘅包裝拆開，食咗一粒糖，「又想點呀⋯又想講咩呀？」



「我都想我有個咁好嘅女朋友呀～」阿風一臉羨慕地講道

「自己搵。」我淡然地講道

糖好甜，但都比唔上啱啱蔣倩盈嘅笑容甜，我成個腦都係蔣倩盈嘅甜美笑容⋯

食完飯再坐多咗一陣，我地都番課室，唔留喺小食部




IG Link: https://www.instagram.com/nd_cotttoncandy/?hl=zh-tw