［愛情純愛］既然忘記唔到佢，不如試下中意我⋯？: 129. 獨處

我番到課室後，直接就行去開locker拎嘢，唔想行兩轉

「岑諾新，我今日同佢地一齊走，唔同你一齊番去啦～」蔣倩盈企喺我嘅身旁講道

「嗯，好呀。」我微微點頭

「新，你到底同佢地講咗啲咩？」蔣倩盈叫咗我一聲，我愕一愕然，佢第一次叫我唔係叫全名，「佢地嘅反應搞到我都好想知！」

「你想知？真係咁想知？」我沒好氣地笑一笑



「嗯嗯！」蔣倩盈點點頭，「想知！你快啲話我聽啦！」

「只係炫耀一下，我有一個又靚又可愛嘅女朋友。」我低頭喺佢嘅耳邊，壓低聲線講道

蔣倩盈臉上頓時泛起淡淡嘅紅霞，佢抬頭望住我，臉上掛上甜美嘅笑容，佢呢個笑容再加上淡紅嘅臉頰，一副羞澀嘅表情，點令我唔心動⋯？

「我咁樣講你就笑得咁開心啦？」我望住眼前嘅女仔無奈地講道，「咁易滿足？」

蔣倩盈抬眼望我，忽然伸手拉住我嘅衫角，我再次耷低頭，佢湊近我嘅耳邊：「因為你把聲真係好好聽⋯！」



聽到佢突如其來嘅一句，我真係唔知要比咩反應佢先好，喺我仲未回神過來嘅時候，蔣倩盈已經先一步鬆開咗我，轉身就走

「蔣倩盈真係好可愛⋯」我不禁喺心入面講道

有時連我自己都覺得，佢真係成為我女朋友呢件事上，係我嘅幸運

我知道亦了解佢內心深處嘅傷，所以我更加唔願意令佢受到傷害

佢喺我面前為嗰個唔識珍惜佢嘅人喊過無數次，輕易咁為佢紅了眼眶⋯每次提起嗰個人，佢都會喊得好傷心



我真係唔想佢再一次咁樣受傷⋯真係⋯

見過佢嘅脆弱嘅我，只想好好咁珍惜佢⋯

⋯

放學嘅時候我一個人走，畢竟我冇特別想同楊朗然佢地去打機，所以我就先失陪

我落樓梯到2樓，再落嘅時候見到一個女仔捧住兩個疊起咗嘅紙皮箱行緊上嚟

「一個女仔拎兩個紙箱，仲要擋到前面睇唔到路⋯」我喺心裏默默地講道

嗰個女仔小心翼翼地提起左腳踏上一級，但我唔知佢係企唔穩定點，成個人向前跌，疊喺上面嘅紙皮箱一下子就跌咗落嚟

個女仔向前絆咗一下，連人帶箱咁雙膝跪咗喺樓梯上



本楚我想伸手扶一下個箱，但手都未伸到出嚟，佢已經跪咗喺樓梯上面

「嘶⋯」跪喺地上嘅孫慧伶輕皺起眉頭，有啲尷尬咁企番起身

我同佢嘅視線對上咗一秒，我瞄到佢嘅雙膝都紅咗

我收回視線，照樣落樓梯行過佢身邊時，佢忽然間叫咗我一聲

「新⋯！」

我聽到佢叫我，不禁停低步伐望向佢

「你介唔介意幫我拎一下？拎起視藝室⋯」孫慧伶有啲唔好意思咁望住我講道



我默默地喺心裏嘆咗一口氣，然後雙手拎起本來疊喺上面嘅紙皮箱，轉身就行番上2樓

算啦，佢膝頭都紅晒，一個女仔拎住兩個咁大嘅箱⋯我咁都唔幫佢嘅話好似太過份⋯

我聽到我嘅身後傳嚟佢拎住箱跟上我嘅聲音，但我完全冇興趣回頭望佢⋯

我行到去視藝室門前，伸手拉開視藝室嘅門，然後行入去將我手上攬住嘅紙箱放到最近門口嘅枱上後轉身就打算走

「新，可唔可以順手幫我將個箱拎到去store room？」孫慧伶卻又叫住咗我

我淡然地望佢一眼，然後轉身又再一次捧起個紙箱，行到去喺老師枱隔離嘅store room，伸手開store room嘅門，將個紙箱放低喺入面嘅空地上

「唔該。」孫慧伶跟喺我身後，將佢手上攬住嘅紙箱放到我啱啱放低嘅紙箱上面疊起，「麻煩你啦⋯」

「嗯。」我敷衍地回應咗佢之後就伸手打開store room嘅門，喺我隻手要掂到門柄之際，孫慧伶忽然間伸手捉住門柄，「你仲想點⋯」



我輕皺起眉頭同時將手收回，我望向孫慧伶，只見佢輕輕抿唇，好似有嘢想同我講一樣

「我已經幫你將啲嘢拎到嚟，你仲想點？」我冷淡地問道，呢種語氣同態度，我以前從來都唔會用嚟對孫慧伶

「我有嘢想問你⋯」孫慧伶擋喺門前唔比我出去

「嗯。」我淡然地回答

「你同蔣倩盈，係因為我同張景彥一齊，所以你地先一齊㗎係唔係⋯」孫慧伶問道，「你誠實答我⋯」




IG Link: https://www.instagram.com/nd_cotttoncandy/?hl=zh-tw