［愛情純愛］既然忘記唔到佢，不如試下中意我⋯？: 146. 剩下不安

此時岑諾新嘅手機螢幕一亮，岑諾新拎起手機睇，我假裝不在意地耷低頭睇自己嘅手機，但偷偷地用眼睛餘光瞄着佢嘅手機螢幕

「邊個Whatsapp佢⋯？」我喺心裏好奇道

佢用Face ID解鎖手機，message自然地完整彈出嚟

我不禁一怔、心臟一顫，然後默默地將視線移開

「孫慧伶點解會私下搵佢嘅⋯」我不禁喺心裏問道，本來嘅心情頓時一沉，「佢地做project唔係有group㗎咩⋯」



孫慧伶私下搵岑諾新，係唔係有咩事⋯？

佢地有私下傾計⋯？有講其他嘢⋯？孫慧伶點解會私下搵佢⋯係唔係有咩要私下同岑諾新討論⋯？

我冇睇到孫慧伶實際上send咗啲咩比岑諾新，只係見到係孫慧伶嘅名⋯

岑諾新好快咁打咗幾個字回覆，我當咩都睇唔到一樣耷低頭睇手機

「可能真係有啲咩關於project嘅重要嘢⋯」我喺心裏對自己解釋道



喺見到孫慧伶嘅名嘅一刻，一塊大石憑空出現壓喺我嘅胸口上⋯

「一隻手掌拍唔響⋯」喺我腦海中浮現出嚟嘅想法係呢個

上次張景彥都係咁樣同我講⋯

「我想講，中意一樣嘢係冇錯，畢竟最後嘅結果都唔係單方面擁有選擇權。」

我再一次記起上次張景彥對我講嘅另一句說話



「只要岑諾新唔踏出一步回頭⋯只要係咁樣⋯」我喺心裏略帶點不安地講道，我不禁偷望岑諾新一眼，「但佢咁樣，算唔算踏出咗細半步⋯？」

我嘅腦海中出現一個大大嘅問號，但我唔敢再諗落去，問題會愈變愈多

我微微側着頭，合上雙眼將頭靠喺岑諾新嘅膊頭上，喺呢個咁近嘅距離，我可以聞到佢身上嘅味道⋯

「攰？」岑諾新柔聲地問道

「嗯⋯少少⋯」我細聲地回答道，我係心攰，唔想再諗啱啱嘅事

「瞓一陣，落車叫你。」岑諾新講嘅同時，伸手將我嘅手拖實

「嗯，好⋯」我用疲倦嘅聲線回答，連點頭嘅力都冇

⋯



星期一

「我陣間搞掂之後再同你講，你喺課室等我。」岑諾新喺離開課室前對我講道

「知啦！」我笑了笑講道，「陣間你Okay嗰陣再喺DM我啦～」

「嗯，咁我去做project啦！」岑諾新伸手摸摸我頭，微微一笑講道，「我今日同佢地一齊喺視藝室，我孭埋書包落去。」

「好呀～」我點點頭，「咁你快啲去啦！就嚟夠鐘啦，唔好遲！」

「好啦，知啦！」岑諾新笑道，然後孭起書包就行

我同岑諾新又好似平時一樣，我其實都只係自己唔開心一下



如果我因為佢做一個project而嬲，好似顯得我唔夠大方，好小氣

而且再講，佢同孫慧伶之間，其實岑諾新冇主動啲咩⋯但如果佢都有主動⋯

兩日假期嘅時候，我都有同詠妍講過我最近嘅煩惱，詠妍冇主張要我對岑諾新點樣，只係⋯

「如果佢係真係要主動搵番孫慧伶，咁佢唔喺你面前都可以㗎。」嗰日詠妍係咁樣講，「佢係真係中意孫慧伶，你可以阻止佢？」

詠妍嘅說話，我放喺心上了⋯唔係詠妍嘅錯，詠妍唔係勸分，佢只係從旁觀者嘅角度出發

「你唔同佢講因為你驚佢答你佢真係對孫慧伶餘情未了？」

詠妍講中咗我嘅心聲，我怕嘅⋯的確係呢樣⋯

「你驚得幾多次？今次張景彥講得啱，一隻手掌拍唔響，岑諾新如果有意，咁你打算點？」



「冇人話佢一定要喺你面前光明正大咁對孫慧伶主動，如果孫慧伶主動，但佢唔推開呢？」

「我唔係要危言聳聽，但你自己諗下，你問都唔敢問佢⋯你與其怕，不如直接問佢。」

其實我一直都明白，詠妍冇危言聳聽，我亦知道我唔夠信岑諾新⋯但我問唔出口，我怕聽到答案⋯

如果岑諾新面對孫慧伶嘅主動唔拒絕嘅話⋯的確唔算係岑諾新主動，但⋯

「唉⋯」我不禁嘆咗一口氣

點解我冇就辦法完完全全咁相信岑諾新？點解我連問佢嘅勇氣都冇⋯？

「我覺得你知太多關於佢地嘅事，搞到你宜家咁忐忑，可能唔知好過知⋯」，詠妍亦講出咗解答，「你地都知太多對方同Ex嘅太多事，人地嘅Ex喺好遠都會擔心，何況你同佢嘅就喺眼前？」



我滿腦子都係不安⋯或者真係咩都唔知比較好，如果咩都唔知，咁我或者都唔會擔心到咁樣⋯

岑諾新⋯喺你嘅心入面，到底係唔係仲有孫慧伶⋯？




IG Link: https://www.instagram.com/nd_cotttoncandy/?hl=zh-t