我望住岑諾新,微微點頭,對佢一笑,不禁將佢攬得更用力

「其實我應該要信佢先係⋯張景彥講得啱,我唔夠自信⋯我應該要更自信先係~」我喺心裏對自己講道,我知道我應該要信佢

我抬眼望向佢,輕輕抿唇

「岑諾新,你同孫慧伶喺完咗project之後,都要保持距離。」我一臉認真地講道,用着不忿嘅聲線對佢要求道,「冇理由你就可以要求我同張景彥保持距離,但你自己同孫慧伶唔洗⋯咁樣對我太唔公平!」

「係係,我會啦!」岑諾新輕輕地捏咗我嘅臉頰一下,朝我一笑,「完咗呢個project,我就同佢保持一個遠遠嘅距離!」



「算你啦~」我聽到岑諾新親口答應我,心裏安心嘅感覺慢慢地番嚟

岑諾新身上淡淡嘅味道,依舊令我感覺安心

今日岑諾新著住長袖冷衫,我伸手捉一下佢右手手腕,佢手上有戴住我嘅髮圈

「唔洗check,我著得冷衫都會戴住。」岑諾新淡定地講道,「唔著冷衫都會袋住。」

聽到佢咁樣講,我嘅嘴角都忍唔住上揚起嚟,心裏忍唔住開心



「好啦~唔準唔見㗎!我用開呢款髮圈。」我垂低手輕左地拖住佢嘅手

「知啦,一定唔會唔見。」岑諾新緊緊地將我拖實,「好唔好?」

「好!」我微微點頭



番到學校上堂嘅時候,我悄悄地望向岑諾新,見到岑諾新托住腮,視線落喺我身上,剛好同我對上視線



我強忍着笑意,但嘴角都係按捺不住上揚起嚟

「做咩呀?」我細細聲咁問岑諾新

岑諾新望住我,笑咗一笑後默默地耷低頭,我一臉疑惑咁望住佢,但岑諾新卻搖搖頭

岑諾新拎起筆抬頭望向黑板,耷低頭又喺書上寫了寫

我望住佢,想知道佢啱啱笑緊啲咩呀⋯

「過份⋯引起我嘅好奇心之後就自己專心上堂⋯」我微微鼓起兩泡腮、扁着嘴同時喺心裏抱怨道

我不忘又偷瞄佢一眼,見佢一手拎住筆一手托住腮,我一時冇為意自己望住都佢到入咗神⋯

「科長出嚟派嘢。」阿sir忽然叫道



岑諾新作為呢科嘅科長緩緩地企咗起身,同另一個科長一齊行出去拎起放喺枱上嘅嘢

我嘅視線不禁又固定喺佢嘅身上,唔知道係因為我心底裏其實好中意佢,定係因為佢吸引到我嘅目光

我望住佢手捧住一疊簿喺課室行嚟行去,我嘅臉頰感覺熱熱的,我微微耷低頭,迴避佢嘅位置

岑諾新派完簿行番埋位,我抬頭望向佢嘅同時,佢亦望向我,我嘅嘴角自動上揚

佢行到我隔離嘅座位坐低,我接過從前面傳嚟嘅簿,打開功課簿睇下上次嘅功課比咗幾分

「倩盈,借你嗰本改正。」希童望向我對我伸手講道

「哦好呀~」我將我本簿合上然後遞比佢,「但你改邊題?」



「第5同9。」希童望一望自己本簿後又回頭向我講道

「第5題我都錯⋯」我收番本簿打開望一眼

「咦,咁你改完比我。」希童講道

「你第5題啱定錯?」我問岑諾新,「啱嘅話借我一下~」

「嗱。」岑諾新直接地將佢本功課簿遞比我

我喺枱上打開岑諾新嘅功課簿,佢寫嘅字好公整,好少男仔寫字會咁整潔整齊

我頓時喺我本簿上寫番正確答案,但我冇即刻將佢嘅功課簿歸還,而係再掀去前面睇下

「字好好睇⋯」我喺心裏稱讚道



我將我本簿連同岑諾新嘅簿一同還番比佢,岑諾新見我將自己嘅功課簿比佢,佢疑惑地望一望我,我指一指希童,示意佢將我嘅功課簿傳比希童做改正

岑諾新用我本簿輕拍一下希童嘅膊頭,希童另轉身接過我嘅功課簿

岑諾新望向我無奈地笑一笑,我微微側着頭望向佢,我地四目交投,對彼此微微一笑

呢一刻嘅小甜蜜係美好,或者真係我諗太多,我都只係因為宜家佢地一齊做project所以先會坐立不安

只要之後完咗project,佢地唔會有咁多交集,我就唔會總係心煩意亂⋯



我坐喺靠窗嘅位置,下意識地戴上左邊嘅耳機,因為岑諾新坐喺我嘅右邊



「下個月考試,考完試之後,我地出去玩,好唔好?」岑諾新微微側着頭望我問道,「我地都好似好耐冇出街。」

「嗯?好呀~」我聽到佢同我講嘢,緩緩地抬頭望向佢,我笑一笑,「咁就嚟考試嘛~」

「咁你諗定想去邊度行街去邊度玩。」岑諾新對我微笑道同時,伸手溫柔地摸摸我頭




IG Link: https://www.instagram.com/nd_cotttoncandy/?hl=zh-t