「真係一個意外!一個誤會嚟!」我連忙講道,「真係!啱啱係個櫃門跌落嚟,孫慧伶先拉咗我一下,佢撞到後面張枱,我又比佢絆到先會咁!」

「嗯。」蔣倩盈用喉嚨發音回答,佢嘅聲音都微微顫抖着

「你唔信我?」我輕皺起眉頭問道,「真係意外啦,真係誤會嚟!真係㗎!」

蔣倩盈冇出聲,但雙眼卻愈嚟愈紅,佢緩緩撇開臉唔望我亦唔出聲;佢喺撇開臉後微微耷低頭,然後悄悄地伸手抹眼淚

見到佢嘅委屈,我好心痛⋯



「你信我好唔好?真係一場誤會嚟⋯」我拉一拉蔣倩盈隻手,佢連朝我行近一步都唔願意

我見佢企喺原地,我主動地朝佢行咗一步,拉起佢隻手

「岑諾新,我冇你想像中咁大量。」蔣倩盈抬頭望住我,抽一抽鼻子,聲音微微顫抖着講道,「你要我同張景彥保持距離,咁你啱啱同孫慧伶嘅距離,保持咗幾多?」

蔣倩盈嘅雙眼紅紅的,面對佢嘅質問,我忽然語塞了

「上次你見到張景彥拍我額頭,所以你嬲我,但明明嗰日係你先護住孫慧伶,我睇到㗎!喺架運貨車經過嘅時候,你下意識就伸手護住孫慧伶,你當我睇唔到?」蔣倩盈嘅眼淚再一次喺眼眶打轉,佢望住我嘅雙眸中,係失望、係傷心,「今次,你同佢靠得幾近⋯?你要我同張景彥保持距離,咁你係點樣同孫慧伶保持距離?」



蔣倩盈質問我,我無言以對同時亦心虛了⋯我好似真係冇諗過自己做得好唔好,淨係諗住佢同張景彥有冇好好咁保持距離

「我⋯對唔住,唔會有下次啦⋯」我心疼地幫佢抹眼淚,「真係。」

蔣倩盈一直唔出聲亦唔望我,我輕輕地拉住佢隻手,佢一直默默地抹眼淚,又默默地抽抽鼻子

今次做project,令佢覺得委屈⋯感覺佢忍咗好耐先講出口,如果唔係委屈咗好耐,佢唔會喊⋯

「你知唔知就連以前同張景彥一齊嘅時候,佢都冇試過咁樣做咁樣對我⋯!」蔣倩盈嘅聲音一秒沙啞起嚟,淚水從眼眶湧出,「佢以前再中意孫慧伶,佢都唔會當住我面咁樣做⋯!」



「你拎我同張景彥比⋯?」我聽到佢講嘅嘢不禁一怔,「你係唔係唔記得佢以前點對你?」

「我冇唔記得,我都記得⋯!」蔣倩盈用手背抹眼淚,「所以我話,連佢都冇試過咁樣對我!」

我完全愣住了,佢⋯拎我同張景彥比較⋯佢話就算係張景彥都冇咁樣對佢⋯

即係佢覺得,張景彥都冇令佢委屈到咁⋯?我冇張景彥好⋯?

「蔣倩盈,你講多次⋯你啱啱講咩⋯?」我直勾勾地望住佢,認真地再問佢一次

蔣倩盈咩都冇講,只係抬頭用通紅嘅雙眼望住我,眼裏全是委屈同不滿,然後將我隻手推開

啱啱佢講嘅說話,係一時衝動而已⋯?

「我話,張景彥都冇咁對我。」蔣倩盈真係再重複一次佢講嘅嘢,「你係第一個。」



蔣倩盈真係講多一次,佢知唔知自己講緊啲咩⋯?佢拎我同張景彥比,佢覺得張景彥好啲?

張景彥令佢喊咗幾多次?委屈咗幾多次?佢係唔係唔記得咗喺佢同張景彥分開之後最難受嘅嗰段日子,係我同佢一齊,係我陪住佢?

宜家因係咁樣一個唔小心,就拎我同張景彥比較,話張景彥都冇咁對過佢

佢心入面係覺得張景彥比我好,所以先講得出啱啱嗰番說話

蔣倩盈你到底有幾中意張景彥,先可以令你覺得我比唔上嗰個令你委屈落淚咗無數次嘅人⋯?

因為啱啱嘅一個誤會而抵消晒我對你嘅好,然後講出張景彥都冇咁對過你之類嘅說話⋯

喺你心底入面嘅嗰個人,其實一直都係張景彥⋯



我冇再講任何嘢,蔣倩盈都冇再出聲,我同佢都選擇咗沉默

「我番去啦,唔洗送我。」良久,蔣倩盈緩緩開口講道

蔣倩盈望一望我,我企喺原地冇郁,蔣倩盈就自己轉身走

我知道我應該要伸手拉佢,但係我心入面過唔去⋯我嘅內心仲未接受到佢拎我同張景彥比較

如果張景彥對佢好,我可能都冇咁嬲,但問題係,張景彥對佢唔好⋯一啲都唔好⋯

佢唔記得晒張景彥點對佢⋯?佢話唔係,佢記得⋯

張景彥嘅靠近,蔣倩盈冇迴避⋯嗰日我放番落到嚟,見到佢同張景彥一齊有講有笑,見到張景彥靠近佢,但佢冇避

我除咗愣了一愣,就好似冇其他嘅想法,回過神後嘅第一個諗法係⋯佢心入面其實仲有張景彥嘅位置⋯



X⋯X⋯X

我一個人番到屋企樓下,我回頭望咗一眼,佢冇追上嚟

誤會⋯意外⋯會唔會真係有咁多意外?咁啱佢叫我落嚟,然後就有意外發生喺佢同孫慧伶身上

佢見到我嘅時候,仲要呆咗一下先回神過嚟,我點知佢地喺我到之前維持咗嗰個狀況幾耐?

我介意嘅,係呢樣⋯

由佢同孫慧伶抽到同一組做project開始,我就感覺到不安,如果冇呢個project,一切都唔會變成咁

初戀難忘呀⋯或者詠妍講嘅係啱,我咁在意係因為我知道佢地嘅全部⋯



我一個人坐喺書枱前發呆,大腦都空白一片,咩都唔想諗




IG Link: https://www.instagram.com/nd_cotttoncandy/?hl=zh-t