我起身行到床邊坐低,向後灘喺床上想小睡片刻,但空白一片嘅大腦太清楚,我完全冇辦法入睡

我起身行出房,行到去廚房打開零食櫃,望一望入面嘅零食,但又冇食零食嘅胃口,我又默默地將櫃門閂上

我行去廁所洗一洗面,然後番房灘喺床上拎起手機

「冇message⋯」我望住手機嘅螢幕喃喃自語道

我坐起身掀開窗簾,外面落緊細雨,雨水打喺我房嘅玻璃窗上,發出「噠噠噠」嘅聲音



喺只有我一人嘅房間內,雨水打落玻璃嘅聲音格外響亮,什至好似打到入我心一樣⋯

「今日陰天呀⋯」我望住窗上嘅水珠細聲地講道



我唔知我幾時瞓著咗,當我醒嘅時候,房間內漆黑一片,望向房門,見到底雨嘅門縫有光滲入嚟

「媽媽番咗嚟啦⋯」我喺心裏講道



我拎起比我放咗喺枕頭邊嘅手機,螢幕一亮嘅時候,螢幕上冇一個message係岑諾新send比我,失望嘅感覺從心底湧上嚟

「算啦算啦⋯」我輕嘆一口氣後安慰自己道,「或者佢都唔知點算⋯」

我彷彿為佢搵一個合理嘅借口一樣嚟安慰自己,但我嘅心卻冇平靜落嚟

我將手機放埋一邊,從書包中拎出功課,坐喺書枱前安靜地做功課

食完晚飯之後我又番去自己房,我坐喺書枱前發呆



「岑諾新⋯心入面到底點諗?佢肯同我解釋,其實都唔係完全冇將我放喺眼內⋯」我心裏又開始對自己勸說起嚟,「算啦,都係主動搵佢一下⋯」

我嘅手伸向放喺一旁叉緊電嘅手機,喺拎起手機嘅時候,我嘅動作又止住

「如果佢係真係要主動搵番孫慧伶,咁佢唔喺你面前都可以㗎。」

「冇人話佢一定要喺你面前光明正大咁對孫慧伶主動,如果孫慧伶主動,但佢唔推開呢?」

詠妍早幾日同我講過嘅嘢,喺我嘅腦海中一閃而過,我又默默地將手機放低喺原位

如果佢係真係對孫慧伶仲有意,唔一定要話比我知⋯

我不禁又諗起嗰日佢伸手護住孫慧伶嘅畫面⋯嗰一刻嘅畫面就好似烙咗喺我心底一樣,我總會記起⋯

的確今日嘅事,唔係佢主動,但佢冇推開孫慧伶,就係佢嘅錯⋯唔係代表住喺佢心入面,其實孫慧伶仲有一席位咩⋯?



「算啦⋯我想自己靜下⋯」我喺心裏默默地道



翌日番學嘅路上,我同岑諾新都冇咩點同對方講嘢

我同佢都冇踏出一步提起琴日嘅事,就好似咩都冇發生過一樣,但卻明顯地有着距離感

「你番嚟啦~」詠妍一見我番嚟,即刻就朝我行過嚟

「做咩呀?」我朝locker嘅方向行去

「你同佢今日做咩咁有隔閡嘅⋯?」詠妍企喺我身旁細聲地問道



「嗯⋯」我心裏一沉,用喉嚨發音輕嗯一聲,「只係琴日嘈咗兩句⋯」

「吓⋯你同佢唔會係因為嗰兩個人而嘈呀嘛⋯」詠妍遲疑地問道

「嗯⋯」我微微點頭,「小事⋯」

「你地冷戰呀⋯?」詠妍輕皺起眉頭問道

我頓時一怔,呆咗一呆,我同岑諾新冷戰緊⋯?

我抬頭望向窗外,呀⋯落雨啦⋯

X⋯X⋯X

我同蔣倩盈,今日咩都冇講過⋯今次係第一次⋯



上堂嘅鐘聲響起我拎起我嘅嘢去上Physics堂,今日都係跟小組坐,下半堂係自修

上緊自修嘅時候,我放喺褲袋嘅手機一震,我將手機拎出嚟望一眼,見到係孫慧伶Whatsapp我

孫慧伶:你地冇事嗎⋯?

我望向孫慧伶,見佢一臉擔心咁望向我

「冇」我回覆道

孫慧伶:令佢誤會嘅話就唔好⋯你同佢解釋下⋯?

「解釋咗」



琴日番到屋企之後,我完全冇搵過蔣倩盈,但佢亦冇搵我,就係咁樣,我地就冷戰起嚟⋯

我都唔知點解,我同佢之間會變成咁樣突然間⋯

琴日望住佢委屈到喊起嚟嘅時候,我隱隱約約地感覺到佢收起咗好多事喺心入面,但佢同我講嘅都只係一小部份⋯

但我的確因為佢講咗一句張景彥都冇咁樣對過佢而在意⋯




IG Link: https://www.instagram.com/nd_cotttoncandy/?hl=zh-t