［愛情純愛］既然忘記唔到佢，不如試下中意我⋯？: 151. 隔閡

我嘅大腦一片空白，訊息量突然間有啲大⋯

我連忙拎起手機再睇一次孫慧伶嘅story，佢冇責怪張景彥嘅意思，反而po出合照，佢地和平分手啦⋯

「唔知岑諾新知唔知佢地分咗手⋯」呢個想法喺我嘅大腦中浮現

今日番到嚟之後，岑諾新叫住我之後欲言又止

「佢係唔係早就知道孫慧伶同張景彥分咗手⋯？」我又不禁喺心裏問道，「佢想同我講啲咩⋯？」



不安嘅感覺又再一次喺我嘅內心蔓延⋯

今日岑諾新想同我講嘅，會唔會就係關於佢同孫慧伶⋯？

宜家孫慧伶回復單身，咁係唔係岑諾新就有可能會番轉頭？而且又係咁啱喺佢地一齊做完project之後，孫慧伶就同張景彥分咗手

「我同孫慧伶，好難講⋯」

「雖然成日都話當局者迷，旁觀者清，但有時候，真係當局者先會清楚。」



當日張景彥係咁樣講⋯其實佢一早就知道，自己同孫慧伶會分手，所以佢嗰日先咁樣講

我明明有一刻諗過佢地會唔會分手，明明有諗過孫慧伶會唔會仲中意岑諾新⋯

岑諾新今日，一定⋯係想同我講孫慧伶同張景彥分咗手嘅事⋯

佢心入面，有孫慧伶嗎⋯？佢心入面，仲有留一個位置比孫慧伶⋯？

「之後再講」嘅意思⋯係佢要考慮清楚先再話我知⋯？



「佢到底想同我講咩⋯？」我細聲地自言自語起嚟，心裏只剩下不安

⋯

呢兩、三日都一直落雨，今日一大清早就烏雲密佈⋯陰天雨天真係會影響人嘅心情⋯

我行到去巴士站嘅時候，我見到岑諾新企喺度等緊我

我行到佢面前，對佢微微一笑，岑諾新見到我後便收起手機

我地一齊行到去等車嘅隊後排隊，我抬頭望一望岑諾新，猶疑緊好唔好開口追問佢關於琴日嘅事

我一抬起頭，岑諾新剛好微微耷低頭望向我，我同佢嘅視線頓時撞上，我頓時一怔

岑諾新先一步將視線緩緩移開，伸手放到我頭上輕摸兩下，然後默默地將手收回



「係迴避⋯」我心裏有啲失望，失落嘅感覺浮上嚟，「睇嚟佢真係考慮緊⋯」

X⋯X⋯X

我偷偷地用眼睛嘅餘光望向蔣倩盈，佢就好似咩都冇發生過一樣，偶爾耷低頭，偶爾又抬頭望下車嚟到未

我琴晚睇IG嘅時候，先知道孫慧伶同張景彥分咗手

蔣倩盈對於張景彥嘅靠近唔抗拒，係唔係因為佢早就從張景彥口中得知佢地會分手嘅消息⋯？

佢有為佢留位置⋯？係我多心定⋯

「你知唔知佢地分咗手？」



「你心入面仲有冇佢？」

明明我係想咁樣問佢，明明我係想從佢嘅反應中觀察佢係唔係有放嗰個人喺心上

但我問唔出口⋯我都會怕見到佢最真實嘅反應，都會怕知道答案⋯

我同佢幾時先結束呢種冷淡⋯？真係想問佢其實點諗⋯

「有車啦。」蔣倩盈伸手拉咗我一下，我回神望向遠處，見到巴士駛緊過嚟

蔣倩盈宜家都唔會主動拖我，都係拉我嘅手腕⋯

我地都冇明言，但感覺到我地之間嘅距離，開始拉遠⋯

X⋯X⋯X



傍晚嘅時候，我又一次一個人到海傍散步⋯我同岑諾新好似愈嚟愈有隔閡⋯

走着走着，我離遠就見到一個熟悉嘅身影坐喺欄杆上望住對岸，係張景彥

「你做咩喺度？」我行到佢身旁，輕輕一躍坐到欄杆上，坐喺佢嘅身旁同佢一齊望海

張景彥望一望我，然後又若無其事地繼續望海

「你⋯一早就知？」我忍唔住心裏嘅好奇問道

「一早就知啲咩？」張景彥望咗我一眼，輕輕一笑反問道，「知我同孫慧伶會分手？嗯⋯係⋯」

果然，張景彥一早就預料到佢同孫慧伶嘅感情好快就會走向終結⋯但我對於佢嘅直白有啲意外



「點解⋯？」我忍唔住問道

我想聽到答案，想知道佢地分手嘅原因，係唔係我心入面諗緊嘅原因

「你明明就知道答案呀～」張景彥輕輕一笑回答道，佢嘅聲線聽起嚟好輕鬆，「你只係唔敢承認嗰個係正確答案。」

我愣了一下，佢同孫慧伶分手嘅原因，係因為孫慧伶發現自己都係中意岑諾新⋯

「嗯⋯」我下意識輕聲地嗯咗一聲，不禁深呼吸一口，「呼⋯」

「放心，係佢啫，我冇咁諗。」張景彥笑一笑道，「我淨係想同你做朋友，亦只會係朋友。」




IG Link: https://www.instagram.com/nd_cotttoncandy/?hl=zh-t