我唔想全晚都唔理佢,但我冇辦法踏出一步,佢講嘅嗰句說話,講到入我嘅心入面⋯

孫慧伶:唔洗擔心,佢中意你會明白你,再氹下佢就好了

「嗯」

喺落堂之後,我同楊朗然一齊落樓梯行番課室

「大佬你食唔食嘢?我去一轉小食部。」楊朗然對我講道



「唔啦,你去啦。」我搖搖頭

「哦⋯咁我落去啦,你番課室先啦~」楊朗然邊落樓梯邊講道

我到咗我地中五嗰層之後,就朝課室嗰邊行去,喺經過廁所門口嘅時候我望向前梯嘅方向,見到蔣倩盈⋯我不禁面色一沉,佢身邊企着張景彥,兩人有講有笑⋯

我垂着嘅手不禁用力地握緊拎喺手上嘅Physics書,怒氣瞬間聚起嚟

佢兩個都唔同科,都可以一齊番落嚟?蔣倩盈前日先同我講好咗話會同張景彥保持距離,然後今日又同人地行得咁埋



喺我行到番課室準備邁步行入課室之際,蔣倩盈從課室行出嚟,佢喺我面前停咗一停,抬頭望一望我,然後咩都冇講,側一側身就從我嘅身旁行咗出去

咩態度⋯?

X⋯X⋯X

我行出課室後直接朝住女廁嘅方向行去

我去完廁所從廁格行出嚟,企喺洗手盆前洗手



「咔—」我身後傳嚟廁格嘅開門聲,我見住孫慧伶從廁格中行出嚟

佢同我之間相隔咗一個洗手盆,我見到佢都冇心情⋯

我甩一甩手上嘅水,然後轉身繞過佢嘅背後準備離開女廁番課室

「蔣倩盈!」孫慧伶一下子將準備離開嘅我叫住

我停下步伐轉身望向佢,孫慧伶將水喉閂上,一臉誠懇咁望住我

「琴日嘅事,真係誤會嚟,你唔好怪阿新⋯」孫慧伶輕皺起眉頭,一臉抱歉地對我講道,「我見個櫃門要跌,怕撞到阿新先拉佢一下⋯!所以,你唔好誤會,唔好嬲佢⋯」

一口一個阿新⋯叫得真係親暱⋯

岑諾新話咗比佢知我嬲⋯?所以叫佢嚟做說客?



「佢都好在意你⋯」孫慧伶喺我準備開口時又講道

都?我喺心裏冷笑一聲,都在意,都,在意⋯

「嗯,冇事。」我淡然地回答,然後轉身頭也不回走出女廁

我番到課室,行到自己嘅座位坐低,我同岑諾新各自坐喺位做自己嘢,冇望對方亦冇講嘢

「叮噹叮噹,叮噹叮噹~」

上堂嘅鐘聲響起,我將書從櫃桶拎出嚟放到枱上,我托住腮發呆

今日我同岑諾新幾乎都冇講過嘢⋯我地之間,好似都冇人願意踏出一步先道歉⋯





今日放學之後,我同岑諾新一齊走,但我地卻仍然係零交流

我一直想開口對佢講啲咩,但一直都講唔出口,想對佢講嘅說話全都卡喺喉嚨

「我到啦⋯」我對佢講道

「嗯。」佢冷淡地回應道

我抬眼望咗佢一眼,然後默默地生着悶氣朝大堂行去

「蔣倩盈。」岑諾新叫住咗我,我回頭望向佢,心裏不禁有啲高興,佢都係肯主動先開口

「做咩?」我抑壓住心裏少少嘅喜悅,用着平淡嘅聲線問道



岑諾新望住我,我望住佢擺出一副欲言又止嘅模樣,心裏有啲疑惑亦有啲好奇,佢叫住我嘅意思係咩

「做咩⋯?」我再次追問道,本來喜滋滋嘅心情逐漸散去

「冇⋯都係之後再講⋯」岑諾新深呼吸一口後平靜地講道

佢苦惱緊啲咩⋯?我嘅直覺話我知,佢係有嘢想同我講

「嗯⋯」我帶着一份疑惑微微點頭,「拜拜⋯」

去到傍晚,我曲着腿坐喺梳化上開住電視聽聲,手拎住手機

當IG嘅頁面刷新後,隨即彈出幾個新嘅story



我一直睇人地嘅story,睇完一個又一個,指尖一直空敲着屏幕嘅右邊

「嗯⋯?」我比前一個story吸引到注意,特地跳番去前一個story睇清楚

我長按着手機螢幕,好讓story嘅計時停落嚟,我先可以睇清楚上面寫嘅嘢

「我地分開了,但係對大家都好嘅結果,要繼續幸福快樂」

孫慧伶喺一張佢同張景彥嘅合照下寫咗一句

「佢地分咗手⋯?」我不禁坐好起嚟,喺心裏有啲愕然地道




IG Link: https://www.instagram.com/nd_cotttoncandy/?hl=zh-t