「紫盈呀,其實你係由幾時開始鍾意我?」長吻後,二人在沙灘漫步了一回便一同坐到沙灘上吹著海風欣賞著滿天星星的夜景,然後李乘風問道。
 
「如果我話由第一眼望見你開始你信唔信?」周紫盈望了望李乘風然後調皮地說。
 
「唔信… 我魅力不至於大到咁啦~」李乘風微笑著答答。
 
「真係去到鍾意可能唔係嘅… 但由中一見你第一眼開始就留意到有哩個人存在囉~」周紫盈回想著中一時的情怳亦露出甜甜的笑容。
 
「真係咁誇張?」
 


周紫盈:「因為我鍾意靚仔嘛~ 不過到到中二同你同班我就發現你原來唔止靚仔咁簡單… 你連讀書、運動、音樂每一樣都無懈可擊,加上你個人叻得嚟又無架子,平易近人又熱心助人,根本無人會唔鍾意你。然後喺中二嗰年嘅陸運會見到你田徑場上嘅英姿,我就知我走唔甩,開始比你完全吸引住… 為咗咁,我仲專登入咗田徑隊希望可以同你接觸多啲添…」
 
「竟然係咁!? 我真係唔知你原來係為咗我入田徑隊喎…」李乘風一臉驚訝。
 
「連欣欣都知你竟然唔知,真係遲鈍! 不過之後,我地都只係維持喺普通朋友關係,直至你斷手Miss Lui叫我幫手照顧你,我地嘅關係先可以有啲突破…」周紫盈初初一副沒你乎的樣子。
 
但說起Miss Lui,二人本身溫馨滿滿的心情都有點回落但又裝作沒事。
 
「嗰段時間我都真係好感激你㗎…」李乘風亦回想著那時發生的事。
 


「之後到到Musical,本身我完全無興趣㗎,但知你做咗男主角後,我就同自己講為咗可以同你拉近距離,我一定要做到女主角! 於是我上網一夜間睇完嗰個連登故,努力揣摩Rachel哩個角色,然後晚晚係咁練習,好彩最後比我成功搶到個角色! 其實因為咁,我仲開始鍾意咗睇唔同嘅連登故添~」周紫盈續說。
 
李乘風:「咁問心嗰句,嗰15個候選者我覺得你真係做得最好嗰個,所以係實至名歸~」
 
「咁都係好彩我預先識你同你熟無咁生硬啫~ 你知唔知另外嗰啲參賽者一見到你就個個紅都面晒仲邊可能會做得好呀~ 同你一齊綵排嗰半年我真係好開心,日日可以同你咁近距離接觸同你傾偈… 之後我仲乘機爭取做你女朋友,雖然只係假扮,但我都已經好開心…每日幻想著有日可以做你真正嘅女朋友…」
 
「原來係咁! 唔怪得嗰陣Miss… Miss Lui話你立心不良啦~」想起了Miss Lui李乘風又窒了一窒。
 
察覺到李乘風的停頓,周紫盈幽怨地望了望李乘風,然後又繼續說
 


「係呀,我係發姣呀~鬼叫我咁鍾意你咩!只要有機會我咩都會試! 不過隨著Musical落幕,我地嘅關係又再疏遠返,所以我真係好唔捨得musical完… 然後有晚同你食飯,我間接表白比你拒絕咗後,我嘅心情簡直跌到落谷底,嗰晚仲喺屋企喊咗好耐…」想起當時情況周紫盈臉上也有點傷感。
 
「傷害咗你對唔住呀…」李乘風內疚說道。
 
「傻啦,唔可以怪你… 不過嗰陣知道咗你已經有鍾意嘅人,我真係好唔開心,然後就決心要放棄你,於是先開始嘗試同唔同男仔接觸甚至出街,結果就有嗰晚比人帶咗入後巷嘅事發生, 好彩最後有你嘅出現我先無事... 而比你救返後我終於接受事實就係咁耐以嚟始終無一個人可以好似你咁令我心動…」說到這裏,周紫盈臉上露出了濃濃的愛意。
 
「原來係咁… 其實嗰晚,我係咁啱比人飛唔想返屋企先喺街流離浪蕩亂咁行,見到你本身都無咩心情理你,但最後都係敵唔過良心讉責…」李乘風有點不好意思地坦白。
 
「衰人! 不過咁咪正正証明我地係有緣份囉~」周紫盈撓著李乘風並把頭放到他的肩膊上。
 
「咁都係靠你努力爭取啫~」李乘風亦把頭枕在周紫盈的頭上。
 
「係呀, 嗰晚後我就知我放棄唔到你… 之後聽到你話你同Miss..你個ex分咗手,我喺替你心痛之餘但又有啲替自己仲有機會而開心… 你會唔會覺得我好衰?」周紫盈坦白後有點膽怯問道。
 
「都唔會…有人同我講過愛情係自私,所以都係人之常情…」李乘風搖了搖頭,把手搭上周紫盈的手上以示安慰。


 
「不過我無諗過嗰晚你會突然…主動錫我仲…格硬拎走埋人地嘅第一次…」想起那晚,一陣紅暈浮現在周紫盈臉上。
 
「嗰晚我真係好失常同失控… 對唔住呀…」想起當晚李乘風當然亦尷尬無比。
 
「嗰陣真係嚇親,仲好痛! 但同時間比你佔有嗰一刻,我又覺得自己好幸福… 感覺好似咁多年嘅夢想終於成真咁…」周紫盈回想起亦不自覺有點陶醉。
 
「你真係傻㗎...」李乘風感動,把周紫盈抱緊。
 
「你唔明㗎喇… 至少嗰一刻,我同你唔再只係朋友,而係實實在在有咗一層最親密嘅關係… 不過到到第二日你個衰人竟然想唔認帳! 嗰果刻我個心好似真係穿咗個窿咁…」周紫盈裝作生氣。
 
「我唔係咁嘅意思… 只係清醒返後覺得好對你唔住…」李乘風立刻解釋。
 
「點都好,我知難得有機會喺我面前,我一定要好好把握,於是就好厚顏無恥咁逼你比我留喺你身邊,因為我知善良嘅你當時一定唔會忍心拒絕我…結果你亦無令我失望~」這刻周紫盈就像一個小朋友成功做到一件事後臉上露出沾沾自喜的表情。
 


「原來我一早已經比你睇死食住…」李乘風笑著說。
 
「一開始我都唔知可唔可以令你忘記Miss.. 你個ex… 但我只可以同自己講只要繼續努力,我相信總有一天我可以感動到你… 乘風,你可唔可以話我聽我做唔做到?」周紫盈認真地問。
 
「我歌都唱埋,到哩刻你仲有懷疑咩?」李乘風吻了吻周紫盈額頭後說道。
 
「我想親口聽你講多次...」
 
「周紫盈,我愛你,以後我嘅心都只會有你一個!」李乘風堅定地說。
 
「咁到你話我聽你又係有幾時開始鍾意我?」甜甜地親回李乘風一口,周紫盈笑著問道。
 
「其實我都唔知…應該係比你一點一點咁慢慢感動到? 所以真係要講邊個moment開始,我都答唔出添…」李乘風想了想也想不出答案。
 
「唔緊要啦,哩刻你係鍾意我就夠㗎喇…」周紫盈的手撓得更實。


 
「仲有以後嘅將來~ 其實我真係好感激你為我一直以嚟嘅所有付出㗎... 喺你嘅愛下,我真正感受到咩叫被寵愛同埋幸福嘅甜! 多謝你鍾意我,多謝你一直無放棄我…」 這刻李乘風有點想哭的衝動。
 
「你把口都越嚟越甜呀~ 我真係覺得自己好幸福…」周紫盈閉上了眼睛靜靜地享受著這一切。
 
「紫盈… 其實你係咪知道咗邊個係我嘅ex?」靜了一會,李乘風問道。
 
「嗯…」周紫盈輕輕應了一聲。
 
「係幾時嘅事?」李乘風再問。
 
周紫盈:「由你同我講你個ex喺你最孤獨嘅時候比咗溫暖你嗰陣我就估到…」
 
「點解嘅?」李乘風好奇。
 


「因為我將你講過嘅每一句說話都放喺心,所以我知~ 而你,明顯就從來無將自己對我講過嘅說話放喺心,所以你唔知, 証明你講嘅嘢全部都無心唔可信呀!」周紫盈說笑地埋怨。
 
「我應承你以後唔會㗎喇! 我會記住晒我地之間所有嘅對話!」比起周紫盈對自己的上心,李乘風承認自己不足有點不好意思。
 
「哼! 聽住先啦~」
 
「咁點解你知道咗後唔講?」李乘風又好奇。
 
「有咩好講呢? 而且我知哩個秘密牽連可以有幾大,所以你唔想我知我咪繼續扮唔知囉!當然我亦 更加不屑用哩樣嘢去威脅你做啲咩, 哩一年我無同過任何人講哩個秘密㗎…」周紫盈帶點自傲地說。
 
「多謝你呀紫盈… 我真係無睇錯你! 不過唔怪得嗰日有人好心急咁要衝過嚟我地中間攝鏡啦~」李乘風突然想起畢業禮那日的情境。
 
「你仲好講! 一唔睇住你就想同人藕斷絲連…哼! 不過我都不得不佩服你,連Missie都溝到,我男朋友嘅魅力真係大到無得頂…」周紫盈對這是真心佩服。
 
「我同佢… 唔係你諗咁簡單嘅故事嚟㗎…」李乘風帶點唏噓地說。
 
「我無興趣知,唔駛講我聽, 亦都唔准你再諗,以後都唔准諗!」周紫盈裝作生氣道。
 
「知道!」
 
「眼瞓喇,抱我返酒店啦~」周紫盈起身邊拍著身上的沙子邊說道。
 
「眼瞓? 你有排都未有得瞓喎…」望著周紫盈短褲下的長腿李乘風突然換了一副笑淫淫的樣子。
 
「變態佬!」說完周紫盈便裝作害怕逃回酒店。
 
剛剛二人的深情對話,早已像吃了不知多少樽的催情劑。這晚,李乘風破了自己的紀錄,來了傳說中的一夜五連發,箇中的纏綿和銷魂,就只有當時人才能明白。